Ձեր վստահելի աղբյուրը

Այսօր ՀՀ վարչապետ Նիկոլ Փաշինյանը աշխատանքային այցով Արարատի մարզի Սիս գյուղում էր, որտեղ հանդիպում ունեցավ համայնքի բնակիչների հետ։

Վարչապետի հետ հանդիպման ընթացքում Սիս գյուղի 10-ամյա բնակիչ Սամվելը, ով ամիսներ առաջ բողոքում էր համայնքի ճանապարհներից՝ հեգնանքով նշելով, որ մեքենաները իրենց գյուղի ճանապարհով 240 կմ/ժամ արագությամբ են սլանում, այժմ նշում է, որ ճանապարհը լավն է, բայց գյուղացիներին թույլ չի տալու, որ 240 կմ/ժամ արագությամբ երթևեկեն։

«Իմ պահանջը վարչապետից էդ էր, որ մեր գյուղի ճանապարհը սարքվի։ Հիմա արդեն մենք պիտի մեր գյուղը զարգացնենք։ Էն, ինչ գլոբալ խնդիր էր, հիմա լուծվել ա»,- նշում է Սիսի 10-ամյա բնակիչը։

Անդրադառնալով համայնքում կատարված ասֆալտապատման աշխատանքներին՝ Փաշինյանը փոքրիկից ճշտեց՝ արդյոք հետեւե՞լ է աշխատանքներին, ըստ փոքրիկի որակո՞վ է աշխատանքը։

«Առաջին օրվանից գործին հետեւել ենք, ընկերներիս հետ»,- ասաց տղան։

Վարչապետն էլ խորհուրդ տվեց նրան մաքուր պահել համայնքն ու լավ սովորել, փոքրիկն էլ նշեց, որ իրենք աշխատում են՝ երկուսն էլ լիարժեք անել։

Վերջում էլ կատակեց փոքրիկի հետ. «Աչքիս մի հատ ինտերվյու տաս, քլնգես նախարարին»։

Վարչապետը նկատողություն արեց մարզպետին

Համայնքով շրջող վարչապետին ուղեկցում էր նաև Արարատի մարզպետ Գարիկ Սարգսյանը, ում փողոցների որոշ ցեխակոլոլ հատվածների պատճառով վարչապետը նկատողություն արեց։

«Էս ի՞նչ ցեխ ա։ Էն գազալցակայանի մոտով գալիս եմ, ճամփի կեսը ցեխ է։ Ասենք, էդ գազալցակայանի տերը կարա էդ ճամփի կտորը ցեխից մարքի։ Մեծ բան չի, էլի։ Որ ցեխը լցվեց ասֆալտի վրա, պրոբլեմ է, չէ՞»,- նշեց Փաշինյանը։

Կարո՞ղ ա լքվածների գյուղ ա. Արաքսի բնակիչը՝ վարչապետին

«Մարզի աղբավայրին ուշադրություն դարձրեք։ Այդտեղ Երևանի աղբն էլ է թափվում, ու ամբողջ գիշեր դա վառում են, արդյունքում էլ ամբողջ մարզում գարշահոտ է։ Խնդրում եմ էդ հարցին ուշադրություն դարձրեք»,- այսպիսի կոչով վարչապետ Փաշինյանին դիմեցին Արարատի մարզի Արաքս գյուղի բնակիչները։

Բացի այդ, բնակիչները նշեցին, որ Մաիսիում բացվող «Թումո» կենտրոնի դիմաց ինչ-որ գործարան է բացվելու, ինչը կարող է խանգարել կենտրոն հաճախող երեխաներին։

Արարատի մարզպետ Գարիկ Սարգսյանը նշեց, որ հարցը քաղաքաշինության կոմիտեում է. «Հանրապետական նշանակության ճանապարհի վրա է սարքվում, եթե նորմերին համապատասխանի, ապա թույլ կտրվի շինարարություն անել»։

Նշենք, որ Արաքսի բնակիչներից մեկն էլ իր դժգոհությունը հայտնեց, որ իրենց համայնքը դարձել է լքվածների համայնք։

«Կարո՞ղ ա լքվածների գյուղ ա»,- նեղսրտեց բնակիչը։

Փաշինյանն էլ իր հերթին խոստացավ, հաջորդ այցի ընթացքում անպայման լինել նաև Արաքս գյուղում։

Հիշեցնենք, որ ՀՀ վարչապետ Նիկոլ Փաշինյանը աշխատանքային այցով Արարատի մարզում է։ Նա հանդիպել է Սիս գյուղի բնակիչներին և այժմ ներկա է Ռանչպար գյուղի մանկապարտեզի բացմանը։