Ձեր վստահելի աղբյուրը

ՊՊԾ գնդի գրավման գործով դատական այսօրվա նիստը, ինչպես ևս մեկ շաբաթ առաջ, կրկին հետաձգվեց: Այս անգամ երկու շաբաթով:  Նախագահող դատավոր Մեսրոպ Մակյանը հայտարարեց, որ դատարանն ամբաստանյալ Մխիթար Ավետիսյանի պաշտանից նիստը հետաձգելու վերաբերյալ միջնորդություն է ստացել: Նշվում է, որ Մ. Ավետիսյանը վատառողջ է: Միջնորդությանը կցված է հիվանդանոցից տեղականք, որ ամբաստանյալը վիրահատվել է: Գործով ամբաստանյալ Վարուժան Ավետիսյանը նշեց, որ դիմել են հիվանդանոց պարզելու, թե որքան ժամանակով Մ. Ավետիսյանը անաշխատունակ կլինի, պատասխան են ստացել, որ չեն կարող հստակ ժամկետ նշել:

Մեղադրող դատախազը հայտարարեց, որ ամբաստանյալի բացակայության պարագայում չեն կարող շարունակ նիստը: Ամբաստանյալ Պավել Մանուկյանն ասաց, որ երբ իր ճնշումը բարձր էր ու չէր կարողանում ներկա լինել նիստերին, իրենից համաձայնություն են պահանջել, որ դատավարությունը շարունակեն առանց իրեն: Դատավոր Մակյանը հակադարձեց, որ ինքը նման համաձայնություն չի պահանջել:

«Հիմա ինչ՝ հնարավո՞ր չէ առանց Մխիթար Ավետիսյանի դատը շարունակենք, մեկա ինքը ոչ խոսում էր, ոչ… »,- հետաքրքրվեց Պ. Մանուկյանը:

Դատավորն ընթերցեց Քրեական դատավարության օրենսգրքի համապատասխան կետերը, թե երբ հնարավոր չէ  շարունակել գործի քննությունը: Մ. Մակյանն ասաց, որ պետք է նախ պարզեն, թե որքան ժամանակ Մ. Ավետիսյանը չի կարող մասնակցել նիստերին. եթե բուժման համար անհրաժեշտ լինի ամիսներ, իրենք կարող են նրա մասը գործից անջատել, իսկ մյուսների մասով շարունակել: 

«Քանի որ  մեծածավալ աշխատանք ենք կատարել, գտնվում ենք դատաքննության ավարտի փուլում, ողջամիտ եմ համարում մի քանի օր սպասել ու տեսնել, եթե առողջանում է  ու վերադառնում է  դատական նիստին, շարունակենք ու գնանք առաջ: Այս ընթացքում պետք է հասկանալ, թե ինչ վիճակում է Մխիթար Ավետիսյանի առողջական վիճակը, որից հետո կկայացնենք համապատասխան որոշում»,- ասաց նախագահող դատավորը:

Հաջորդ նիստը նշանակվեց հունվարի 29-ին:

Հիշեցնենք, որ ՊՊԾ գնդի գրավման գործով «Սասնա ծռեր» խմբի անդամներից կալանքի տակ շարունակում են մնալ ամբաստանյալներ Արմեն Բիլյանն ու Սմբատ Բարսեղյանը, որոնք մեղադրվում են նաև սպանության մեջ: Մյուսների նկատմամբ ընտրված խափանման միջոց կալանավորումը փոխվել է՝  պատգամավորների անձնական երաշխավորությամբ։ Պավել Մանուկյանն ազատ է արձակվել 1 միլիոն դրամ գրավի դիմաց։