Հայտնվել ենք պետականությունը կորցնելու եզրագծից այն կողմ. Սամսոնյան
«Նիկոլ Փաշինյանը չխնայեց այն պատգամավորներին, որոնց խոսքը 2 րոպե լսելուց հետո հասկանում ես, որ դու ապրում ես շատ վտանգավոր պայմաններում»,- այսօր լրագրողների հետ զրույցում ասաց «Քաղաքացիական գիտակցություն» ՀԿ նախագահ Նարեկ Սամսոնյանը՝ անդրադառնալով սահմանադրական փոփոխությունների հանրաքվեին։
Վերջինիս խոսքով, նախագիծը ստորագրող պատգամավորները, ըստ էության, բացի Նիկոլ Փաշիյանի թիմակիցը լինելու համար վաստակած ցասմանը արժանանալու հեռանկարից, ստորագրելով փաստաթուղթը, իրենց անվան հետ կապեցին նաև սահմանադրական կարգի տապալումը, ինչը քրեական հանցագործություն է։
Ըստ Սամսոնյանի, փաստաթուղթը ստորագրելը փաստեց Արմեն Սարգսյանի ոչինչ լինելը. «Ցավոք, մենք Հայաստանում ունենք մարդ, ում սահմանադրական լիազորությունները թեև բավականին քիչ են, այնուամենայնիվ նա ունեցածն էլ օգտագործելու պատիվ և սկզբունքայնություն չունեցող մարդ է։ Նա ևս վերջնականորեն համալրեց այն քաղաքական դիակների շարքը, որտեղ վաղուց հավակնում էր հայտնվել։ Այսինքն՝ ունենք իրավիճակ, որտեղ հասարակությունը ևս մեկ անգամ սթրեսի է ենթարկվելու, ևս մեկ անգամ Նիկոլ Փաշինյանի ուղղակի ցանկության պատճառով մենք հայտնվել ենք պետականությունը կորցնելու եզրագծից այն կողմ»։
Սամսոնյանը նշեց՝ այսօր համոզվել է, որ քաղաքական ընդդիմություն ևս Հայաստանում չկա։
«Ես հիշում եմ 2008 թվականի նախագահական ընտրությունները, այնտեղ կար մարդ, ում գաղափարական իրավահաջորդն է Մարուքյանը. խոսքը Արթուր Բաղդասարյանի մասին է։ Հիշեք, թե ինչպես էր Բաղդասարյանը քննադատում Սերժ Սարգսյանին նախագահական ընտրությունների ժամանակ, անգամ հանրահավաք արեց և ասաց՝ կարող է ինձ սպանեն։ Մարուքյանի քաղաքական հոգեհայրը Բաղդասարյանն է, ինչ է նշանակում քննադատել այդքան, հետո ասել՝ «ոչ»-ի շտաբը ես չեմ վերցնում, և ով էլ վերցնի, օգնելու է իշխանություններին։ Էդ դեպքում ինչո՞ւ էր քննադատում, ուրեմն քննադատությամբ էլ է օգնել իշխանություններին։ Այն ինչ այսօր մենք ունենք, տանում է քաղաքական ճգնաժամի»,- ասաց Սամսոնյանը։
Նա նշեց, որ այսօր խորհրդարանում ընդդիմության վակուում է առաջացել։ Իսկ քաղաքական իշխանության օրակարգը ամբողջությամբ սպասարկում են 2 «ընդդիմադիր» խմբակցություններն ու մեկ քաղաքական ֆեյք Արման Բաբաջանյանը։
«Նիկոլ Փաշինյանին այսօր պետք է ունենալ իրեն ամբողջությամբ ենթակա ՍԴ նախագահ ու դատավորներ, որոնք ստորագրելու են թե՛ Արցախի հարցում իր զիջումները, թե՛ Ստամբուլյան կոնվենցիան, թե մնացած բոլոր հարցերը, որ իրեն պետք են»,- նշեց Սամսոնյանը։
Բանախոսը նաև կարծում է, որ Նիկոլ Փաշինյանը գիտակցում է՝ իր քաղաքական ռեյտինգը բավականին ցածր է, այդ է պատճառը, որ նա սփյուռքին կոչ է անում գալ Հայաստան։
«Նրանք վստահ չեն, որ հաղթելու են այստեղ, որովհետև «ոչ»-ի կողմնակիցները շատ են, իսկ Փաշինյանն ուղղակի մնալու է Մարուքյանի ու Ծառուկյանի հույսին։ Նա վստահ չէ, որ հաղթելու է այս ընտրություններում: Ես կարծում եմ, որ կա հակվածություն, և ընտրություններին կեղծիքը լինելու է պարտադիր։ Բոլորը զգում են, որ Հայաստանում իշխանափոխությունից 5 պակաս իրավիճակ է»,- ասաց Սամսոնյանը։
Հարակից հրապարակումներ`
- Դա ցայտնոտի մեջ գտնվող քաղաքական ուժի ղեկավարի խոսք էր. Սիմոնյանը՝ Մարուքյանի հայտարարության մասին
- «Քարոզարշավի ընթացքում ատելությունը և թշնամանքը այնպիսի մեծության կհասնեն, որ կարող է բախումներ լինել»
- Մարուքյան. «Ոչ»-ի ճակատ ձևավորել նշանակում է իշխանությանը շանս տալ շարունակել գեներացնել ատելություն
- ՍԴ աշխատակազմի ղեկավար. Այդ խելքով էլ այլ մարմիններում էլ ճգնաժամ են փնտրում
- ԵԽԽՎ-ն ՀՀ իշխանություններին կոչ է անում դիմել Վենետիկի հանձնաժողովին՝ կարծիքի համար