Ոստիկանական հերթական գործը լուծում է ստանում ՍԴ-ում
ՍԴ-ն փետրվարի 18 նիստում բանավոր ընթացակարգով քննեց Մարդու իրավունքների պաշտպանի և ՀՀ վարչական դատարանի դիմումների հիման վրա՝ «Ոստիկանությունում ծառայության մասին» ՀՀ օրենքի 43-րդ հոդվածի, «ՀՀ ոստիկանության կարգապահական կանոնագիրքը հաստատելու մասին» օրենքի 16.1-ին հոդվածի ՝ սահմանադրությանը համապատասխանության հարցը։
Դիմող կողմը՝ Մարդու իրավունքների պաշտպան Արման Թաթոյանը, իր ելույթում նշեց, որ վիճարկվող իրավական նորմերով ոստիկանության ծառայողի նկատմամբ հարուցված քրեական գործի շրջանակում վերջինս միաժամանակ զրկվում է աշխատավարձի վճարման, սեփական նախաձեռնությամբ ոստիկանությունում ծառայությունից ազատվելու, այլ պաշտոնի նշանակվելու հնարավորություններից։ Վճարվում է հարկադիր պարապուրդի ժամանակահատվածի միայն առաջին 2 ամիսը։
Թաթոյանը հիմնավորեց, որ այդ նորմը հակասում է Սահմանադրության մի շարք դրույթներին. խտրականության արգելքը (հոդված 29), մասնավոր և ընտանեկան կյանքի, պատվի ու բարի համբավի անձեռնմխելիությունը (հոդված 31), աշխատանքի ընտրության ազատությունը և աշխատանքային իրավունքները (հոդված 57), անմեղության կանխավարկածը (հոդված 66), համաչափության սկզբունքը (հոդված 78), հիմնարար իրավունքների և ազատությունների դրույթները (հոդված 80)։
«ՍԴ ներկայացված դիմումս հիմնված է ոչ միայն խնդրո առարկա կարգավորումների և սահմանադրական իրավունքի երաշխիքների օրենսդրական մակարդակով վերլուծության, այլ նաև Մարդու իրավունքների պաշտպանին հասցեագրված բողոքների քննարկման վրա։ Ընդ որում, դիմումում արծածված խնդիրը բարձրացվել էր դեռևս 2017 և 2018 թվականներին՝ Մարդու իրավունքների պաշտպանի տարեկան հաղորդումներով»,- հայտարարեց Թաթոյանը։
Պատասխանող կողմը ներկայացնող ԱԺ Իրավական ապահովման և սպասարկման բաժնի պետ Գրիգորի Մովսիսյանը նշեց, որ խնդիրը չի վերաբերում միայն ոստիկանության ծառայությանը։ Հանրային այլ ծառայություններում նույնպես այդ խնդիրը կարգավորված չէ, որոշ դեպքերում նույնիսկ չի սահմանված 2 ամիս վարձատրություն ստանալու դրույթը։ ԱԺ–ի կարծիքով հարցի լուծումը պետք է լինի հավասարապես բոլոր պետական ծառայողների համար։
Մովսիսյանը նկատեց, որ Մարդու իրավունքների պաշտպանի դիտարկումներն ընդունելի են ԱԺ–ի և, դատելով կառավարության եզրակացությունից, նաև կառավարության համար։ ԱԺ ներկայացուցիչը նշեց, որ մյուս մարմինների նույնատիպ խնդիրները կարգավորելու համար Արդարադատության նախարարությունը նախաձեռնել է «Քրեական դատավարության մասին» օրենքում և Աշխատանքային օրենսգրքում փոփոխություններ և լրացում կատարելու մասին օրենսդրական փոփոխությունները, իսկ «Ոստիկանության ծառայության մասին» օրենքը չի ընդգրկվել, քանի որ գտնվել է ՍԴ տիրույթում և իրենք սպասում են բարձրագույն դատարանի որոշմանը։
ՍԴ անդամ Ֆելիքս Թոխյանը հարց ուղղեց Արման Թաթոյանին, թե որոշումը ոստիկանության քանի՞ ծառայողի է վերաբերելու։ Թաթոյանը պատասխանեց․ «Դրանք չեն գերազանցում մեկ տասնյակը, բայց այս որոշումը մեծ ազդեցություն կունենա նման օրենսդրության բացառման տեսանկյունից և կանխարգելիչ ազդեցություն կունենա»։
Ֆելիքս Թոխյանը ցանկացավ հարց ուղղել նաև ԱԺ ներկայացուցչին և Հրայր Թովմասյանից ճշտեց, թե իրենցի բացի էլի՞ հարց տվողներ կան։ Արձագանքելով ՍԴ նախագահի դրական պատասխանին՝ Թոխյանը ասաց՝ «էս խոշտանգում է»։ Հրայր Թովմասյանը հայտարարեց, որ դատարանը չի կիսում այդ պնդումը։
Դատական քննության վերջում եղավ առաջարկ հեռանալ դռնփակ խորհրդակցության՝ գործով որոշում կայացնելու։ Որոշման հրապարակման ժամի վերաբերյալ ՍԴ աշխատակազմը լրացուցիչ կտեղեկացնի։
Լրահոս
Տեսանյութեր
«Տավուշը հանուն հայրենիքի» շարժման անդամները քայլերթով գալու են Երևան. Բագրատ Սրբազան
