Ձեր վստահելի աղբյուրը

Հայաստանում դեռևս կան այնպիսի համայնքներ, որտեղ առհասարակ չի գործում հասարակական տրանսպորտ, ինչն անթույլատրելի է։ Մարզային և մայրաքաղաք Երևանի տրանսպորտային խնդիրները ներկայացված են Մարդու Իրավունքների Պաշտպանի անցած շաբաթ ներկայացրած 2019 տարեկան հաղորդման մեջ։

ՄԻՊ զեկույցի համաձայն, օրինակ, Շիրակի մարզի  Բարձրաշեն համայնքում բացակայում է հասարակական տրանսպորտը: Տրանսպորտի բացակայության պատճառով շատ համայնքների բնակիչներ մեծ դժվարությամբ են հասնում անգամ մարզկենտրոններ:

«Հասարակական տրանսպորտի բացակայության մասին խոսվում է բազմիցս և պետք է հստակորեն փաստել, որ տրանսպորտի բացակայությունը իրական խոչընդոտ է ստեղծում այնպիսի իրավունքների իրացման համար, ինչպիսիք են՝ կրթության կամ առողջության պահպանման իրավունքները»,- նշված է զեկույցում։

Տարածքային կառավարման և ենթակառուցվածքների նախարարությունից ստացվել են տվյալներ, որ 2019 թվականի ընթացքում իրականացվել են քայլեր ոլորտում առկա բացերը և խնդիրները հնարավորինս շտկելու ուղղությամբ: Մասնավորապես, ըստ նախարարության՝ նոր երթուղիներ են ավելացվել Կոտայքի մարզում՝ երկու բնակավայր ապահովվել է հասարակական տրանսպորտային կապով, իսկ Տավուշի մարզի Բերդ համայնքում գործարկվել է 6 նոր երթուղի: Մինչդեռ, այլ մարզերում նոր երթուղիներ չեն ավելացել:

Ինչ վերաբերում է Երևան քաղաքի հանրային ուղևորատար տրանսպորտի սպասարկմանը, նշվում է, որ  ընդհանուր որակի անբավարարության խնդիրները 2019 թվականին ևս շարունակում են արդիական մնալ:

Ինչպես նախորդ տարի, այնպես էլ ընթացիկ տարում նշված համակարգային խնդրի կարգավորման ուղղությամբ ձեռնարկված միջոցների կապակցությամբ Երևանի քաղաքապետարանը պարզաբանել է, որ Երևան քաղաքի հասարակական ուղևորատար  տրանսպորտի բարեփոխումների ամբողջ ծրագիրը (դրա շրջանակներում նոր երթուղային ցանցի ներդրման աշխատանքները) նախատեսվում է իրականացնել 2-4 տարվա ընթացքում:
Ինչպես նախորդ տարիների, այնպես էլ 2019 թվականի ընթացքում, քաղաքացիները բազմիցս արտահայտել են դժգոհություններ Երևանի հասարակական տրանսպորտի, հատկապես՝ ավտոբուսների ու միկրոավտոբուսների ոչ պատշաճ աշխատանքի վերաբերյալ։ շ

Այսպես, ընթացիկ տարում բողոքներով ներկայացվել է Երևան քաղաքի Նուբարաշեն վարչական շրջանի հասարակական տրանսպորտի ոչ պատշաճ սպասարկման խնդիրը: Մասնավորապես, բողոքի համաձայն՝ Նուբարաշենում գործող միակ հասարակական տրանսպորտը 10 համարի ավտոբուսն է, որն առավոտյան ժամերին ծանրաբեռնված է լինում, ինչի պատճառով բոլորը չէ, որ կարողանում են օգտվել տրանսպորտից:

Ըստ բողոքի՝ բնակիչները բազմիցս դիմել են Երևանի քաղաքապետարան, սակայն խնդրին լուծում չի տրվել: Երևանի քաղաքապետարանից տեղեկացրել են, որ 2020 թվականից Երևան քաղաքում ներդրվելու է հասարակական տրանսպորտի նոր ցանց, որի շրջանակներում կկարգավորվի նաև Նուբարաշենի տրանսպորտի հարցը:

2019 թվականին ևս Պաշտպանի աշխատակազմ բողոքներ են ստացվել «Կարեն Դեմիրճյանի անվան Երևանի մետրոպոլիտեն» ՓԲ ընկերության կողմից մետրոյով երթևեկողների թվի աճին զուգընթաց ուղևորափոխադրումն անվտանգ կազմակերպելու համար շարժակազմի և վագոնների թվի ավելացման հարցի վերաբերյալ:

Ըստ բողոքի՝ Երևանի մետրոպոլիտենն առավոտյան (8.30-9.30 սահմաններում) և երեկոյան, ժամերին աշխատում է խիստ ծանրաբեռնված ռեժիմով, իսկ երեկոյան (18.40-19.30 սահմաններում) շուրջ 5-7 րոպե պարբերականությամբ: Ընդ որում՝ աշխատանքը սովորաբար կազմակերպվում է 2 վագոնով, իսկ խիստ հազվադեպ դեպքերում՝ 3 վագոնով: Երևանի քաղաքապետարանից ստացված պարզաբանման համաձայն՝ 2019 թվականին ևս Երևանի մետրոպոլիտենով երթևեկողների թվի աճին զուգընթաց ուղևորափոխադրումն առավել անվտանգ և հարմարավետ կազմակերպելու, ուղևորների սպասարկման վիճակը բարելավելու նպատակով մշտապես դիտարկվել է գնացքների երթևեկության չվացուցակը՝ այն դարձնելով ավել արդյունավետ:

Մասնավորապես, առավոտյան և երեկոյան ծանրաբեռնված ժամերին երթևեկության գրաֆիկների մեջ կատարվել են փոփոխություններ՝ գիծ է դուրս բերվել լրացուցիչ գնացք, որի արդյունքում փոքրացել են շարժման միջակայքերը:

2020 թվականին, կանխատեսելով մետրոպոլիտենով ուղևորափոխադրումների ծավալների հետագա աճ, վագոնների նորոգումից հետո նախատեսվում է ավելացնել դրանց թիվը չորսով:

Հաշվի առնելով այս ամենը, ըստ ՄԻՊ զեկույցի, անհրաժեշտ է

1. բարձրացնել հասարակական տրանսպորտի սպասարկման որակը՝ սահմանելով վերահսկողության մեխանիզմներ հանրային ուղևորատար տրանսպորտով ուղևորների կանոնավոր փոխադրումներն իրականացնող կազմակերպությունների մատուցած ծառայությունների որակի նկատմամբ,
2. միջոցներ ձեռնարկել Երևան քաղաքի հասարակական տրանսպորտի (երթուղային ցանցի) բարեփոխման ծրագիրն առավել սեղմ ժամկետում իրականացնելու ուղղությամբ, 3. Երևան քաղաքում հասարակական տրանսպորտի նոր ցանցի ներդրման ընթացքում առաջին հերթին իրականացնել հասարակական տրանսպորտի ծառայություններն ապահովել այն վարչական շրջաններում, որտեղ առավել ակնառու է խնդրի կարգավորման անհրաժեշտությունը,
4. Երևանի մետրոպոլիտենով ուղևորահոսքի աճի մշտական դիտարկումների միջոցով ուղևորափոխադրումներն իրականացնել ուղևորահոսքի աճին զուգընթաց՝ ավելացնելով շարժակազմը և ընդլայնելով մետրոպոլիտենի ցանցը,
5. միջոցներ ձեռնարկել հանրապետության բոլոր մարզերում հասարակական տրանսպորտի ապահովման ուղղությամբ: