Ձեր վստահելի աղբյուրը

Սահմանադրական դատարանի փոխնախագահ Ալվինա Գյուլումյանը համոզված է՝ ԱԺ երեկ ընդունած նախագիծն իր վրա չի ազդելու։

«Ես որպես շահագրգռված անձ, կարդացել եմ նախագիծը, արդեն ընդունված օրենքը և տեսել, որ այն իմ վրա չի տարածվում։ Նախկինում ինչ պաշտոններ եմ զբաղեցրել, դա կապ չունի, պաշտոնավորում նշանակում է, այդ նշանակումով պաշտոնավարել»,- մանրամասնեց նա։

Պատասխանելով հարցին, եթե պատգամավորները չվիճարկեն օրենքը, ապա ՍԴ դատավորները ինչպե՞ս կարող են այն բողոքարկել, ՍԴ փոխնախագահն ասաց՝ վարչական դատավարության կարգով։

«Կսպառեն ներպետական ատյանները, կդիմեն ՄԻԵԴ։ Ես անձամբ դա կանեմ, որովհետև իմ պարագայում ավելի քան վստահ եմ, որ բոլոր հիմքերն ունեմ մինչև վերջ հասցնելու ու հաղթանակ տանելու։ Հրանտ Նազարյանն ու Ֆելիքս Թոխյանը նույնպես, կարծում եմ, չեն լռի։ Բայց դա իրենց որոշելու հարցն է։ Դա իմ կարծիքն է»,-ասաց նա։

ՍԴ փոխնախագահն ընդգծեց՝ իր պաշտոնավարումն ինքնանպատակ չէ։

«Ես Եվրոպական դատարանից մեկ տարի շուտ վերադարձել եմ՝ լավ հաշվարկելով, որ այդ մեկ տարվա ընթացքում ես կստանայի այնքան աշխատավարձ, որքան այստեղ ընդհուպ մինչև 70 տարեկան պաշտոնավարելու դեպքում, դեռ մի բան էլ ավելի։ Բայց ես մտածել եմ, որ ունեմ այն ուժը, կարողությունները, որ կարողանամ իմ ձեռք բերած գիտելիքներն օգտագործել այստեղ։ Ինչ-որ մարդկանց համար դա հիմար որոշում է թվացել, ինչպե՞ս կարելի է Եվրոպան թողնել, հետ գալ, նույնիսկ ուղիղ այդպիսի արտահայտություններ են եղել։ Դա իմ տեսակն է, ես եկել եմ, որպեսզի իմ երկրում կարողանամ իրավունքի զարգացմանը նպաստել»,-նշեց ՍԴ փոխնախագահը։

Գյուլումյանը ձեռնպահ մնաց նախագծի սահմանադրականության վերաբերյալ գնահատական հնչեցնելուց երկու պատճառով՝ նախ վաղ է դրա համար, ապա չբացառեց, որ որևէ մեկը կդիմի ՍԴ, չի ցանկանում իրեն կաշկանդել։

Հարցին, թե կարո՞ղ են ԱԺ պատգամավորները դիմել ՍԴ, Ալվինա Գյուլումյւանը նկատեց՝ անկեղծ ասած, այդ հարցին պատասխանել չի կարող։

«Ենթադրում եմ, խնդրում եմ ուշադրություն դարձրեք, ենթադրում եմ, որ կարող են, բայց դա, իհարկե, քննարկվելիք հարց է, պետք է ուսումնասիրել։ Դուք գիտեք, ցանկացած դիմում, որ ՍԴ-ն ստանում է, մենք նայում ենք, արդյոք այդ դիմումը համապատասխանո՞ւմ է  օրենքով սահմանված պահանջներին, թե՞ ոչ»,- դատավորը։

Այն դիտարկմանը, եթե նախագիծն ուղարկվեր ՍԴ եզրակացության համար, կլինե՞ր շահերի բախում, թե՞ ոչ, Գյուլումյանն արձագանքեց, «եթե»-ով չի առաջնորդվում, իսկ ամբողջ աշխարհում ընդունված է, որ Սահմանդրական դատարանները քննության են առնում ցանկացած հարց։

«Եվ մեր Սահմանադրական դատարանն էլ նախկինում քննության է առել «Սահմանադրական դատարանի մասին» օրենքի դրույթների սահմանադրականության հարցը»,- հիշեցրեց  նա։

Ինչ վերաբերում է Վենետիկի հանձնաժողովի կարծիքին ու դրա արձագանքին, ՍԴ փոխնախագահը նկատեց, հանձնաժողովի ռեկոմենդացիաներում կան այնպիսի կետեր, որոնց իշխող քաղաքական ուժը չի հետևել։

«Բայց դրանք իհարկե խորհրդատվական եզրակացություն են։ Հնարավոր քննության կողմից, դրանք ևս հաշվի կառնվեն, այդ պատճառով այս առումով ևս ձեռնպահ կմնամ մեկնաբանությունից»,- ասաց նա։

Հիշեցնենք, որ ըստ ԱԺ-ում երեկ երկու ընթերցմամբ ընդունված օրենքի՝ դադարում են Սահմանադրական Դատարանի այն անդամների (դատավորների) լիազորությունները, որոնք պաշտոնավարել են 12 տարուց ավել և նրանց փոխարեն ընտրվելու են Սահմանադրական Դատարանի նոր անդամներ (դատավորներ):  Սահմանադրական Դատարանի մյուս անդամների (դատավորների) պաշտոնավարումը սահմանափակվում է 12 տարով։Դադարեցվում է Սահմանադրական Դատարանի Նախագահի պաշտոնավարումը։