Ձեր վստահելի աղբյուրը

«Ստեղծված իրավիճակում խիստ կարևոր է ԵԱՀԿ մոնիթորինգի կարողությունների ընդլայնումը»։ Վարչապետ Նիկոլ Փաշինյանի այս հայտարարությունն ուրախացրել է ԱԺ նախկին պատգամավոր, «Եվրոպական ինտեգրացիա» ՀԿ նախագահ Նաիրա Կարապետյանին։

Նա հիշեցրել է Սանկտ Պետերբուգի ու Վիեննայի պայմանավորվածություններին հասնելու համար նախկին իշխանությունների գործադրած ջանքերի մասին.

«Ուղղակի հրաշալի է, պարոն վարչապետ, որ վերջապես այս մտքին եք հանգել, ցավոք, շատ թանկ գին վճարելով:

5 քաջ տղաների կյանքի գնով:

Սահմանամերձ գյուղերի անմեղ երեխաների անամպ մանկության մեջ դրոշմված կրակոցների անջնջելի հետքի գնով:

Խաղաղ գյուղացիների ավիրված տների, անգամ՝ մանկապարտեզի գնով:

Զինծառայողների մայրերի և կանանց անքուն գիշերների, աղոթքների և արցունքների գնով:

Տեսա՞ք, պարոն վարչապետ, մեր բանակն ապացուցեց, որ ունի խելացի և պատրաստված հրամանատարներ և քաջ զինվորներ, որ փայլուն տիրապետում է հակառակորդին լռեցնելու մարտավարությանը, ունակ է հետ մղել անգամ հատուկ նշանակության ջոկատները, և կարիք չկա անհասկանալի «խաղաղության նախապատրաստումների», մենք պատրաստ ենք:

Գիտե՞ք, պարոն վարչապետ, թե ինչպիսի ջանքեր են գործադրվել Վիեննայում, Սանկտ Պետերբուրգում և Ժնևում, որպեսզի հասնել նրան, որ ԵԱՀԿ մոնիթորինգի կարողությունների ընդլայնումը պարտադրվի Ադրբեջանին:

Հիշու՞մ եք, պարոն վարչապետ, թե երբ և ինչպես այդ պարտադրումը դուրս եկավ շրջանառությունից: Հուշեմ՝ մի խորհրդավոր վերելակում մի «կիրթ» մարդու հետ Ձեր հանդիպումից հետո:

Տեղյա՞կ եք, պարոն վարչապետ, որ «կառուցողական» հակառակորդն այդ հանդիպումից հետո նոր թափով լծվեց իր դիրքերի «կառուցապատմամբ»՝ ռազմական և դիվանագիտական դիրքերի:

Այդ չարաբաստիկ վերելակից ի վեր այս ողջ ընթացքում բազմաթիվ մասնագետներ, փորձագետներ, քաղաքական գործիչներ թմբկահարում էին ԵԱՀԿ մոնիթորինգի կարողությունների ընդլայման անհրաժեշտության մասին, իսկ Դուք բաժանարար գիծ քաշեցիք և անգամ Ձեր այլախոհներին անվանեցիք «շնաբարո դուրսպրծուկներ»:

Անգամ այս օրերին Դուք և Ձեր թիմը զերծ չմնացիք «ներքին թշնամու» դեմ Ձեր պայքարից, երբ ամբողջ հասարակությունն իրոք մի բռունցք էր դարձել:

Այո, պարոն վարչապետ, ԵԱՀԿ մոնիթորինգի կարողությունները պետք է ընդլայնել, ուստի և ընդունե՛ք դասական, իսկ Ձեզ համար ճակատագրական դարձած արտահայտության փոխակերպումը.

«մենք ճիշտ էինք, Դուք՝ սխալ…»: