Ձեր վստահելի աղբյուրը

ՀՀ քաղաքաշինության կոմիտեի նախագահի պարտականությունները կատարող Արմեն Ղուլարյանն այսօրվա կառավարության նիստում հայտնեց, որ իրենց հաշվարկներով Քանաքեռ-Զեյթուն վարչական շրջանի Յան Ռայնիսի փողոցի տարածքում մեկ քմ բնակմակերեսի միջինացված արժեքը 333 հազար դրամ է:

Հիմք ընդունելով այդ տվյալները կառավարությունն այսօր 18 մլրդ 207,5 մլն դրամ հատկացրեց օգոստոսին գազի պայթյունից  փլուզման հետևանքով անօթևան մնացած 12 ընտանիքներին բնակարանով ապահովելու համար:

Փոխվարչապետ Մհեր Գրիգորյանը արտակարգ իրավիճակների նախարար Ֆելիքս Ցոլակյանից փորձեց պարզել շենքի փլուզման պատճառները:

«Ես որքան հասկանում եմ՝ սա կամ պետք է լինի շահագործման կանոնների խախտում, կամ որևէ այլ հանգամանք: Այնուամենայնիվ, սա լավ առիթ է, որ պատճառները քննարկենք, հետևանքները հասկանանք, որովհետև այս ծախսն ինչ-որ ձևով պետք է արձանագրվի որպես պատճառված վնաս՝ ինչ-որ մեկի մեղքով»,- նկատեց Գրիգորյանը:

Ֆելիքս Ցոլակյանը պատասխանեց, որ դեպքի առիթով քրեական գործը է քննվում, որի մասին տեղեկություն չունի:

Հայտարարելով, որ քննությունը պետք է պարզի, թե ինչ հարաբերություններ են առաջանում՝ վարչապետ Նիկոլ Փաշինյանը հայտնեց, որ  անօթևան ընտանիքներն այս ընթացքում բնակվում են վարձով, որի գումարը կառավարությունն է տվել:Պատասխանելով վարչապետի հարցին՝ նրա օգնական Նաիրի Սարգսյանը հայտնեց, որ 11 ընտանիքի վարձով բնակարաններ են հատկացրել նույն թաղամասում, իսկ մինչ այդ բնակվել են հյուրանոցում:

Արմեն Ղուլարյանը նաև տեղեկացրել, որ  իրականացվել է շենքի կանգուն մնացած մասի տեխնիկական վիճակի հետազոտություն, եզրակացության համաձայն՝ շենքը գտնվում է հուսալի վիճակում և բնակեցվել է:

«Պետք  է հոգ տանել, որ այդտեղ մեկ էլ չհայտնվեն գարաժներ, չգիտեմ ինչեր, բուդկաներ, կրպակներ»,- անդրադառնալով փլուզված հատվածի հետագա տնօրինման հարցերին՝ հայտնեց վարչապետը և շեշտեց, որ այն պետք է վերադարձվի համայնքին և ազատ մնա:

Քննարկման ժամանակ նախագիծը խմբագրելու անհրաժեշտություն առաջացով և գործադիրն այն ընդունեց՝ պայմանով, որ ստորագրվի լրամշակումներից հետո: