Ձեր վստահելի աղբյուրը

«Մեր երկրում սոցիալ-տնտեսական ծայրահեղ իրավիճակն էլ ավելի սրվեց համավարակի ֆոնին»,- Կառավարության շենքի մոտ ասաց «Հանուն սոցիալական արդարության» կուսակցության նախագահ Արման Ղուկասյանը։

Նրա խոսքով, սակայն, այս ընթացքում քաղաքացիները ստիպված են եղել կատարել իրենց վարկային պարտավորությունները, բանկերը որևէ օր չեն թուլացրել այդ բեռը։

«ՀՀ-ում օրենսդրությունը թույլ է տալիս վակային կազմակերպություններին զբաղվել վաշխառությամբ։ Բարձր տոկոսներով մարդկանց ուղղակի թալանում են, շատերն էլ հայտնվում են սև ցուցակներում։ Մենք պահանջում ենք վարկերի տոկոսների նվազեցում։ Դրա համար մեզ պետք են օրենսդրական կարգավորումներ, որոնց համաձայն, վարկային կազմակերպությունները չեն կարողանա մարդկանց տրամադրել վարկեր, որոնց պատճառով էլ ավելի կվատանա նրանց վիճակը։

Նաև պահանջում ենք ԿԲ-ի կողմից վարկային այդ կազմակերպությունների նկատմամբ այնպիսի վերահսկողություն սահմանել, որ նրանք չկարողանան մանևրել։ Վարկային կազմակերպությունները, որոնք այսօր օրինական թալանով են զբաղված, գործել են նախկին իշխանությունների օրոք, բայց այսօրվա լեգիտիմ իշխանությունը պետք է քաղաքական կամք ցուցաբերի և այս լրջագույն խնդրին լուծում տա»,- նշեց նա։

Ըստ ակցիայի մասնակցի, բանկային համակարգը ՀՀ քաղաքացիներին տանում է դեպի աղքատություն։ Նրա խոսքով, համավարակի ժամանակահատվածում հայաստանյան բանկերն ավելացրել են սպառողական վարկերի տոկոսադրույքները, ինչը, իր բնորոշմամբ, հանցագործություն է սեփական ժողովրդի նկատմամբ։

«Իսկ այն բանկերը, որոնք հայտարարեցին վարկային արձակուրդի մասին, իրականում երեք ամիս անց, այդ տոկոսները միանգամից պահանջեցին։ Լրջագույն խնդիր է նաև, որ դատական համակարգում առկա խնդիրների պատճառով կրկին տուժում են ՀՀ քաղաքացիները, դատական նիստերի ձգձգման պատճառով կրկին ավելանում է քաղաքացիների վարկային տոկոսների բեռը։ Խոսքը «Էքսպրես կրեդիտ» կազմակերպության մասին է, որից տուժողներն այսօր այստեղ են։ Միանշանակ է, որ ոլորտում արմատական բարեփոխումներ են պետք»,- նշեց նա։

Ակցիայի մասնակիցներից մեկն էլ ասաց, որ Հայաստանում գործում են ֆինանսական ճահիճներ։ Նրա պնդմամբ, հայաստանյան ֆինանսական համակարգը բաղկացած է մախինացիան սիրող ու պաշտող կառույցներից։ 

«Իմ ընտանիքը ևս վարկային համակարգի տուժած է՝ մեզնից խլել են գումար, տուն ու հող։ ՀՀ-ում գործում է ֆինանսական մաֆիա․ մեր իսկ երկրի վրա մեզանից խլում են մեր տունը։ Ես որպես տուժող պատմեմ, որ 63 մլն դրամ վարկ եմ վերցրել, ապա վերաֆինանսավորվել է այն՝ մինչև 74 մլն դրամ։ Մուծումներից հետո «Էքսպրես կրեդիտը» վերցնում է գույքադրված հողերը, տունը և դրան գումարած մոտ 50 մլն դրամ գումար։ Նմանատիպ վարկային թալան ես չեմ լսել, դա աննախադեպ է»,- շեշտեց ակցիայի մասնակիցը։