Ձեր վստահելի աղբյուրը

Անհետ կորած զինծառայողների հարազատներն այսօր կրկին հավաքվել են Էջմիածնի զորամասի դիմաց։ Նրանք հանդիպում են պահանջում զորամասի հրամանատարական կազմի հետ։ Անհետ կորած զինծառայող Վարդան Ադոյանի մայր  տիկին Անահիտն ասաց, որ նրանց դեռ որևէ մեկը չի մոտեցել։

Անհետ կորած զինծառայողների զորամասի դիմաց կրակ են վառել՝ տաքանալու համար, սպասում են, թե որևէ մեկն իրենց ի վերջո կընդունի՞, թե ո՞չ։​

Հիշեցնենք, որ երեկ երեկոյան նրանք նույնպես նստացույց էին սկսել։ Կրկին որևէ մեկը չէր մոտեցել, գիշերը հեռացել էին։

Հարազատներն արդեն 81 օր է տեղեկություն չունեն իրենց զինվոր որդիներից։ Նրանք անհետ կորել են Զանգելանի տարածքում։ Հարազատները ցանկանում են իմանալ՝ երբ է  սկսվելու որոնողական աշխատանքներ Զանգելանում։  Նշում են՝ թշնամու հետ չեն կարողանում բանակցել ու որոնողական աշխատանքներ սկսկել հենց Զանգելանի տարածքում։

«Այսօր ևս մեզ ներս չեն թողնում, մեր դիմաց զորամասի դերպասները փակ են։ Ոչ մեկ ոչ մի պատասխան չունի։ Մենք որոշել ենք՝ հենց այստեղ նստացույց ենք անելու, երեկոյան վրաններ կտեղադրենք, կմնանք այնքան, մինչև մեր երեխաներին հասցնեն մեզ»,- լրագրողներին ասաց Անահիտ Ադոյանը։

Նշում են, որ 81 օր իրենց ամեն օր խաբել են, հուսադրող որևէ քայլ չեն անում։

«Պատկերացնում եք՝ հրամանատար Արսեն Աբգարյանը զանգում է  ինձ, ասում է՝ Անահիտ ջան, մի հատ Ստեփանակերտ գեներալի հետ կկապվե՞ս, տեսնես, քեզ ի՞նչ են ասում։ Ես պետք է նրանց փոխարեն գեներալների հետ խոսե՞մ»,- զարմացած հարցնում է տիկին Անահիտը։

«Այսօր ինձ զանգել են, ասում են՝ եթե հնարավոր է ԱԱԾ պետի հետ կապվես, որպեսզի նա էլ կապվի Ադրբեջանի ԱԱԾ պետի հետ, համագործակցություն լինի, ԱԱԾ-ն անցնի այս գործին, որովհետև ՊՆ-ն էլ չի աշխատում»,- ասաց Անահիտ Ադոյանը։

Անհետ կորածների հարազատները նշում են՝ պետք է պատասխանատվության երթակվեն բոլոր նրանք, ովքեր 41 տղաներին տարել են այդ հատված ու չեն հասել օգնության։ 41-ից 1-ը վերադարձող գերիների թվում է եղել։ 22-ի նկարները տեսել են, որ գերի են, մնացած 18-ի մասին տեղեկություն չունեն։

Տիկին Անահիտը նշեց, որ այս օրերի ընթացքում պատկան որևէ մարմնի ներկայացուցիչ ոչ մեկի դուռը չի թակել, հարցրել, թե ինչպես են ապրում, ընտանիքը ոնց է գոյատևում։

«Տարան ու վե՞րջ»,- հուզված ու վրդովված հարցնում է անհետ կորած զինծառայողի մայրը։

Անհետ կորած  մեկ այլ զինծառայողի հայրն ասաց. «Գեներալ Անդրանիկ Մակարյանն է տարել, գցել այնտեղ, փախել։ Նա կողքները կանգնած  տեսել է, որ տղերքը ծուղակն են ընկել, ինքը  դարձել ու հետ է եկել։ Չի էլ փորձել երեխեքին օգնության հասնել։ Իր սարքածն է, ինադու տարել է երեխեքին, լցրել այնտեղ ու փախել։ Խաբեց, թե այդ օրը մառախուղ է եղել, ոչ մի բան չեն տեսել, բայց ով, այնտեղից դուրս է պրծել ու եկել է, ասում են՝ մառախուղ չի եղել։

Քիմիկներին իրավունք չունեին տանեին կռվելու։ Նրանք պետք է գնային ինչ որ գործողություն անեին, բայց առանց զրահաբաճկոնի տարել, գցել են ծուղակն ու փախել են։

Երկու ավտոբուս զորքը կանգնած է եղել 1 կմ հեռու, դիմել են՝ տեղերքին սպանում են, եկեք օգնության, ասել են՝ գեներալը հրաման չի տվել, որ գնանք օգնենք։ Ով այնտեղից դուրս է եկել, նա է պատմել մեզ»։

Անհետ կորած զինծառայողների ծնողներն արդեն բողոքի ակցիաներ արել են Էջմիածնի զորամասի մոտ, որտեղից իրենց որդիներին տարել են, կառավարության ու պաշտպանության նախարարության դիմաց։ Նրանց պահանջն է՝ որոնողական աշխատանքներ սկսել նաև Զանգելանի տարածքում, սակայն դեռ որևէ նորություն չունեն իրենց որդիներից։