Ձեր վստահելի աղբյուրը

«Միակ պատճառաբանությունը, որ դրվել է Նիկոլ Փաշինյանի նկատմամբ քրեական գործ հարուցելու վերաբերյալ դիմումը մերժելու հիմքում Քրեական դատավարության օրենսգրքի 35 հոդվածի 1-ին մասի 8-րդ կետն է»,-Երևանի ընդհանուր իրավասության դատարանում այսօր հայտարարեց փաստաբան Արամ Օրբելյանը։

Նա մանրամասնեց, որ տվյալ հոդվածը սահմանում է՝ քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե անձի նկատմամբ կա նույն մեղադրանքով քրեական հետապնդում իրականացնելուց հրաժարվելու մասին հետաքննության մարմնի, քննիչի և դատախազի չվերացված որոշում։

Սակայն Օրբելյանը, վկայակոչելով Քրեական օրենսգիրքը նշեց, եթե դիմումում առկա է  նույնիսկ մեկ հանգամանք, որի վերաբերյալ քրեական գործ չի հարուցվել, ապա պետք է հարուցվի։
Փաստաբանն ասաց, իր ներկայացրած հաղորդման մեջ նշված են երկու տարվա ընթացքում Նիկոլ Փաշինյանի մի շարք գործողություններում, արտահայտություններում  առերևույթ հանցագործության էլեմենտներ։

«Հարգելի դատարան, երբ մենք լսում ենք Նիկոլ Փաշինյանի հայտարարությունները, պետք է մոռանանք, որ նա ժուռնալիստ է, խմբագիր է, որ ինքը թերթում գրում  էր, ԱԺ-ում շատ մեծ հումորով գործող իշխանությանը քննադատում էր, պետք է մենք պատկերացնենք երկրի վար-չա-պետ։ Մեղավոր չենք, որ վարչապետի պաշտոնը դարձել են ոչ լուրջ պաշտոն։ Բայց մենք պետք է դիտարկենք այն որպես երկրի թիվ մեկ պաշտոնյայի կողմից արված հայտարարություն։ Եվ սա շատ էական է»,-ասաց Արամ Օրբելյանը։

Նա ընդգծեց, եթե քրեաիրավական, քաղաքացիաիրավական գնահատական չի ստանում այդ հայտարարությունը, է վարչապետն իրեն պահում է այնպես, իրեն թույլ է տալիս այնպիսի հայտարարություններ, ինչ թույլ էր տալիս որպես ընդդիմադիր քաղաքական գործիչ, ունենում ենք այն, ինչ ունենք այսօր։

«Հետևաբար մենք կենտրոնական խնդիրն այն է, որ արդեն երկուսուկես տարի գործադիր իշխանությունը զրպարտել է դատական իշխանությանը, միջամտել է  դատական իշխանության գոծունեությանը, ճնշումներ է գործադրել  դատական իշխանության ներկայացուցիչների նկատմամբ, դատավորներին անվանել է «վնգստացող», որի իրավունքը որևէ մեկը չունի... Մենք բերել ենք ոչ մեկ հայտարարություն, ամբողջական շարք։ Բոլորը դա հասկացել են սպառնալիք, Ձեր փոխարեն ես լինեի, ես էլ կհասկանայի սպառնալիք, քննիչը որոշել է, որ որևէ խնդիր չկա։ Միայն նրա այն հայտարարությունը, որ «էս երկրում ինչի դատավոր կա՞, որ իմ ասածը չանի՞», արդեն քրեական հանցագործություն է, սակայն քննիչի կողմից այդ փաստի հանգամանքների վերաբերյալ քննություն չի իրականացվել»,-ասաց Օրբելյանը՝ դատարանին խնդելով վերացնել քրեական գործ չհարուցելու վերաբերյալ քննիչի որոշումը և չսպասել դատախազին։

Հիշեցնենք, որ դատական նիստն ընթանում էր դատավոր Մնացական Մարտիրոսյանի նախագահությամբ։ Փաստաբաններ Հովհանես Խուդոյանն ու Արամ Օրբելյանը բողոքարկում են ՀՔԾ-ի՝ Նիկոլ Փաշինյանի նկատմամբ քրեական գործ չհարուցելու վերաբերյալ որոշումը։

Դատավոր Մարտիրոսյանն ասաց, քանի որ դատարանը չի ստացել ոչ քննիչի որոշումը, անհարաժեշտ է  քննություն իրականացնել գործի նյութերի վերաբերյալ, որն իր մեջ ներառում է հաղորդումը, դրան հաջորդող փաստաթղթերը, քննիչի որոշումը, որիղ հետո եզրահանգումներ կարող է անել։ Դատարանը որոշեց կրկին վարույթ իրականացնող մարմին դիմել նյութերի անհրաժեշտության մասին, ասաց՝ հաջորդ նիստին պարտադիր չէ փաստաբանների ներկայությունը, քանի որ արդեն ներկայացրել են բողոքն ու պատճառաբանությունները։

Փաստաբան Հովհաննես Խուդոյանն էլ տեղեկացրեց, որ էլ. փոստի միջոցով քիչ առաջ ուղարկել է բոլոր նյութերը, այդ թվում քննիչի ու դատախազի որոշումները։

Դատավորը շնորհակալություն հայտնեց, հաջորդ նիստը նշանակվեց փետրվարի 17-ին ժամը 16։30-ին։