Ձեր վստահելի աղբյուրը

«Ինչ խելագարանոց են սարքել մեր երկիրը, որ մենք այստեղ հավաքվել ենք, որպեսզի մի բան լինի՝ ՀՀ նախագահը շարժվի օրենքով, այսինքն՝ իր պարտականությունը կատարի»,- այսօր «Հայրենիքի փրկության շարժման» հանրահավաքի ընթացքում ասաց շարժման համակարգող խորհրդի անդամ Գեղամ Մանուկյանը։

Նա որպես օրինակ ներկայացրեց դեպքը, երբ հրշեջը գնում է կրակ հանգցնելու, քանի որ դա իր պարտականությունն է, ու դրա համար առնանձնապես մարդիկ շնորհակալություն չեն ասում, կամ նույնը բժշկի դեպքում, երբ վերջինս շտապում է դեպքի վայր՝ շտապ բժշկական օգնություն ցույց տալու։

«Հիմա նախագահը, հրշեջը, շտապ օգնության աշխատողը նույն երկրին ծառայող պաշտոնյաներ են, ամենքն իր պատասխանատվության չափն ունի։ Հիմա պատկերացրեք՝ կրակը եղավ ու հրշեջը չմոտեցավ կրակին։ Ի՞նչ կանի քաղաքացին, ի՞նչ կանի ժողովուրդը։ Իսկ այս դեպքում մի ամբողջ երկրի ազգային անվտանգության հարցն է, բանակի միասնականության հարցն է։ Նույն հրշեջն ու շտապ օգնության աշխատողը ՀՀ նախագահն է, որն ունի 1 ժամ 5 րոպե ժամանակ՝ հասնելու դեպքի վայր»,- ասաց նա։

Ապա, անդրադառնալով ոստիկանության այսօրվա հայտարարությանը, թե հանրահավաքի ընթացքում կարող են սադրանքներ լինել՝ Գեղամ Մանուկյանը նշեց, որ վերջին 4 ամիսներին իրենց անցկացրած որևէ հանրահավաքի ընթացքում չի եղել դեպք, երբ իրենց համակիրները դիմեն սադրանքի։

«Հակադարձում եղել է, հակադարձում սադրիչներին։ Ամսի 25-ին, երբ Ազատության հրապարակում հավաքվելու կոչ եղավ, և երբ մեր քաղաքացիները հավաքվում էին Ազատության հրապարակում, Նիկոլ Փաշինյանը հատուկ հենց այդ նույն օրը իր երթի մասնակիցներին բերեց Մաշտոցի պողոտայով, որ բախում լինի։ Բարեբախտաբար բախումը մեծ չէր։ Հիմա հարց, պարոնայք ոստիկաններ, 4 ամսվա մեջ ուրիշ սադրանք տեսե՞լ եք։ Սադրիչը մեկն է, որի անունը Նիկոլ է»,- հայտարարեց նա։

Գեղամ Մանուկյանի խոսքն ուղեկցվեց ծափահարություններով։

Շարունակելով խոսքը՝ Գեղամ Մանուկյանը հարց տվեց. «Պետբյուջեի փողերը գյո՞լ են տվել, որ ԱԺ դարպասներն եք զոդում այսօր։ ԱԺ դարպասներից ինչի՞ եք վախենում։ Էս դարպասներն ո՞վ է բացել, ո՞վ է բացել առանց թույլտվության։ Ձեզ եմ հարցնում ՀՀ ոստիկաններ, 2018-ի հոկտեմբերի 2-ին ո՞ւր էիք, ձեզ եմ հարցնում ոստիկաններ, ձեզ։ Ո՞նց բացեցին էս դարպասները, ո՞նց մտավ Նիկոլը ներս, օրենքո՞վ»։

Նա հետաքրքրվեց նաև, թե ինչո՞ւ 2018-ի հոկտեմբերի 2-ին չկային այն պայթուցիկները, որոնք այսօր շարվել են ԱԺ շենքի շուրջբոլորը։

«Հերիք եղավ, բոլ եղավ։ Հարգելի դիպուկահարներ, չգիտեմ՝ ում վրա եք պահել նշանը, բայց Նիկոլը կոնկրետ մեր երկրի անվտանգությունն է նշանի տակ առել։ Ժողովրդի վրա նշան չբռնեք»,- ասաց Գեղամ Մանուկյանը։