Ձեր վստահելի աղբյուրը

«Որպես, վարչապետ, կառավարության ղեկավար, պատերազմի ժամանակ գերագույն հրամանատար ինչքա՞ն անադեկվատ որոշումներ եք կայացրել, որքան սահմաններ եք դուք հատել, որտեղ եք հատել այդ սահմանագիծը, որ Գլխավոր շտաբը և բանակի 40 գեներալներ որոշել են, որ դուք այլևս ի վիճակի չեք որպես վարչապետ ղեկավարելու և այլ ելք չկա՝ դուք պետք է հրաժարական տաք»,-ԱԺ-ում Նիկոլ Փաշինյանին հարց ուղղեց «Լուսավոր Հայաստան» խմբակցության պատգամավոր Անի Սամսոնյանը՝ ընթերցելով ԳՇ հայտարարությունը:

Պատգամավորը պահանջեց, որ հարցին պատասխանի Նիկոլ Փաշինյանը:

Հարցի պատասխանեց Տիգրան Ավինյանը՝ հայտնելով, որ ինքն է պատասխանում այդ հարցին, քանի որ պատասխանողի ընտրության լիազորությունն իրենց իրավունքն է:

Նա հայտնեց, որ այդ հայտարարությունը խնդրահարույց է, քանի որ զինվորականությունը և ԳՇ պետը քաղաքականության հետ չպետք է առնչվեն:

«Փաստն ունենք և դրա լուծման ճանապարհներն արդեն ուրվագծվում են»,- հայտարարեց Ավինյանը և անդրադառնալով Փաշինյանի՝ ոչ ադեկվատ լինելու որակմանը՝ նշեց, որ պատգամավորն ունի նման հայտարարություներ անելու իրավունք, իսկ քաղաքական հայտարարություններ անելու պատգամավորների և զինավորականների միջև տարբերությունը պետք է լինի հարատև, հակառակ պարագայում այն խարխլելու է պետականության հիմքերը:

«Չգիտեմ, միգուցե դուք թաքուն և աննկատ վարչապետ դառնալու միտք ունեք, դրա համար եք այս ամբիոնի մոտ վարչապետի պատասխանատվության հարցերին պատասխանում»,- արձագանքեց Սամսոնյանը  և կրկնեց, որ այնքան անադեկվատ որոշումներ են կայացրվել, որ ԶՈւ-ն ստիպված թողել է իր գործերը և զբաղվել պետության  գործով:

«Արդյոք խոստովանում եք, որ ձեր լրջագույն սխալները երկիրն հասցրել են կործանման եզրին»,- հարցրեց պատգամավորը և հավելեց, որ իշխանությունները որքան էլ մանիպուլյացիայի ենթարկեն ժողովրդին՝ որևէ ռազմական հեղաշրջման փորձ չի եղել հայտարարության մեջ:

Ռեկլամենտը խախտած Սամսոնյանին դիմեց Արարատ Միրզոյանը և բացականչեց, որ աշխատում եմ չընդհատել պատգամավորին, բայց նա էլ պետք է աշխատի չչարաշահել:

Ավինյանն էլ հայտնեց, որ թաքուն գործընթացները իր մոտ ասոցացվում են 17 կուսակցությունների կողմից ղեկավարվող պրոցեսների հետ:

«Որոնք որ մեզ թաքուն առարակում են, մեզ չէ՝ ընդհանուր, իրար մեջ, նաև՝ միգուցե ձեզ, առաջարկում են թաքուն պայմանավորվածություններ ձեռք բերել, միգուցե տարբեր գործիչների սիգնալներ են ուղարկում»,- հայտարարեց Ավինյանը և հավելեց, որ իրենք հրապարակային են գործում, և նկատեց, որ ԶՈՒ-ի հայտարարության վերաբերյալ իրենց կարծիքը  կիսում են իրենց բոլոր գործընկերները: