Ժողովրդից իշխանությունը վերցրել են 2018 թ-ին, և՝ ոչ թե հայերը, այլ թուրքերը. Արա Վարդանյան
«Իմ մոտ տպավորություն է, որ Նիկոլ Փաշինյանն ունի Ալիևին տված ինչ-որ խոստումներ, որոնց կատարումը ցանկանում է մի քանի օր ձգձգել, իսկ Ալիևը նրան հասկացրեց, որ այն իրեն չի հաջողվի, նաև դրանով է պայմանավորված գերիների չվերադարձնելը»,- ասուլիսում նման կարծիք հայտնեց «Հայաստան» համահայական հիմնադրամի նախկին տնօրեն Արա Վարդանյանն՝ անդրադառնալով Իլհամ Ալիևի վերջին հայտարարություններին:
Ըստ նրա, Նիկոլ Փաշինյանի օրոք Ալիևն այդ դիրքորոշմանը շատ ամուր է կանգնելու և մինչև Փաշինյանը չկատարի իր տված խոստումները՝ գերիների ամբողջական վերադարձ չի լինելու:
Արա Վարդանյանը թուրքի խոսք որակեց պատգամավոր Նազելի Բաղդասարյանի այն հայտարարությունը, թե վերջին օրերին գերիների մեծ խմբաքանակի վերադարձին խոչընդոտել են ընդդիմության հանրահավաքները:
Բանախոսը հասարակության ուշադրությունը հրավիրեց մի երևույթի վրա՝ երբ լրատվամիջոցներն ընդդիմությանը սատարողին հարցնում են իր դիրքորոշման պատճառների մասին, նրանք պատասխանում են, որ սիրում են իրենց երկիրը և չեն ուզում, որ այն թուրքերի ձեռքն ընկնի, իսկ երբ այդ հարցն ուղղում են Փաշինյանին սատարողներին, նրանք ասում են, որ Շուշին ադրբեջանական է և ավելի լավ է կին, երեխա, մայր մեռնեն, բայց նախկինները հետ չգան:
Ըստ Վարդանյանի՝ Նիկոլ Փաշինյանը, նման հայտարարությունների համար քաղաքացիներին վճարելով, փորձում է ներքին հարց լուծել, բայց խայտառակում է ամբողջ երկիրը և ծաղրի առարկա դարձնում միջազգային հանրության առաջ:
«Ի՞նչ կմտածի Ամերիկայում, կամ Եվրոպայի ցանկացած երկրում ապրող մարդը՝ լսելով, որ Հայաստանի բնակիչը, որը սատարում է երկրի իշխանությանը, ասում է, որ Շուշին ադրբեջանական է»,- նկատեց Վարդանյանը՝ հավելելով, որ դա այսօր պետական մոտեցում է և եթե այն չփոխեն, ապա Շուշին իրոք կդառնա ադրբեջանական, այնուհետև նաև՝ Հայաստանը:
Արա Վարդանյանն անդրադառնալով Փաշինյանի հայտարարությանը, թե ինքը թույլ չի տա, որ իշխանությունը վերցնեն ժողովրդի ձեռքից՝ շեշտեց, որ այն ժողովրդից վերցրել են 2018 թվականին, և՝ ոչ թե հայերը, այլ թուրքերը:
«Հիմա ընդդիմության խնդիրն է այդ իշխանությունը հետ բերել ժողովրդին, այսօր Հայաստանում անիշխանություն է, այսինքն՝ հայկական որևէ օղակ Հայաստանում չունի իշխանություն»,- նկատեց Արա Վարդանյանը՝ պարզաբանելով, որ այսօր Հայաստանում իշխանությունը պատկանում է թուրք-ադրբեջանական տանդեմին:
Ըստ բանախոսի՝ հիմա ժողովուրդը պետք է կանգնի ընդդիմության կողքին, անկախ նրանից՝ ընդունում է նրան, թե ոչ, քանի որ վտանգված է պետականությունը: