Ձեր վստահելի աղբյուրը

Կառավարության դիմաց ակցիա անող գյուղոլորտի աշխատակիցներին մոտեցավ էկոնոմիկայի նախարար Վահան Քերոբյանը: Առաջին հարցը, որ նրանք ուղղեցին նախարարին հետևյալն է՝ ինչու են կրճատել էկոնոմիկայի նախարարության գյուղատնտեական խորհրդատվության նորարարությունների և մոնիտորինգի վարչության մարզային բաժինների 69 հաստիք, 69 ընտանիքի ինչո՞ւ են թողնում սոված:

«Ձեր կառավարության որոշմամբ, 69 ընտանիք հացազուրկ է դառնում, ինչո՞վ է ապրելու 69 ընտանիքը, մի կողմ թողնենք գյուղացիներին տրվող խորհրդատվությունը»,- ասաց ակցիայի մասնակիցներից մեկը:

Վահան Քերոբյանը նախ ասաց, որ իր գործողությունը որևէ  կոնկրետ մարդու դեմ չէ: 

«69 ընտանիքի աշխատավարձը տալիս է 600 հազար աշխատող: Այդ մարդիկ, որ հարկեր են վճարում, ուզում են այս կառավարությունն արդյունավետ աշխատի, փողը ճիշտ ուղղությամբ ծախսվի: Օրինակ, վերջերս մի տեղ էի գնացել, հաստոց էին դրել, 20 մարդու աշխատանք էր անում, այդ 20 մարդուն ասացին, որ գնացեք տուն:  Հիմա ի՞նչ անենք,  մենք պետք է նախնադարյան մեթոդներով աշխատե՞նք…»,- ասաց նախարարը, բայց չկարողացավ ավարտել խոսքը:

«Գյուղատնտեսությունը համարում եք նախնադարյա՞ն»,- հացադրում արեց գյուղոլորտի մասնագետներից մեկը: 

«Ցանկացած արտադրողականության բարձրացմանն ուղղված գործողություն նշանակելու է այսօրվա աշխատատեղի կրճատում: Այսօրվա աշխատատեղերի փոխարեն ստեղծվելու են նոր աշխատատեղեր: Գեղարքունիքում շատ աշխատատեղեր կան, դիմեք, գնացեք, աշխատեք»,- ասաց Քերոբյանը՝ խոսքն ուղղելով Գեղարքունիքի վարչության աշխատակիցներին:

Աշխատակիցների դիտարկումներին, թե իրենք աշխատում են գյուղացու հետ, իրազեկավածության մակարդակն են բարձրացում, իրենց հարցնում են՝  ինտենսիվ այգին ո՞նց տնկեն, որտե՞ղ տնկենք, «մենք հաստոցի հետ չենք աշխատում»:

«Իրազեկվածության մակարդակը ցածր է, ո՞վ է բարձրացնելու: Օպտիմալացնելո՞վ եք այդ հարցը լուծելու»,- հարցրեց աշխատակիցներից մեկը:

«Ոչ, նոր տեխնոլոգիաներով»,- արձագանքեց Քերոբյանը:

«Նոր տեխնոլոգիաներից մարդը բան չի հասկանում, մոտենում է մեզ, որ մենք օգնենք իրեն »,-հակադարձեց գյուղոլորտի մասնագետը:

«Ինչո՞ւ եք թերագնահատում…»,- ասաց նախարարը:

«Մենք չենք թերագնահատում, այդ մարդը միայն հողի հետ է աշխատել»,- ասաց ակցիայի մեկ այլ մասնակից:

Նրանք ասացին, որ ակնկալում են նախարարից վերանայել որոշումը:

«Այն  աշխատանքը, որը դուք անում եք, պետք է արվի այլ ձև»,- նշեց Քերոբյանը:

Աշխատակիցներն ասացին, որ իրենց կրճատելով՝ գյուղատնտեսության գլխին մեծ քար է ընկնելու:

«Ի՞նչն է պակասելու»,- հետաքրքրվեց կառավարության ներկայացուցիչը:

«Գյուղացին զանգում է, խորհրդատվություն է ստանում, իր այգին է մշակում»,- կրկնեցին ակցիայի մասնակիցները:

Քերոբյանն ասաց, որ ինքն այնպես է անում, որ ստեղծվեն շատ այլ աշխատատեղեր:

«Այսինքն՝ ոչ գյուղոլորտում չէ՞»,- հարցրեց ակցիայի մասնակիցը:

Նախարարն արձագանքեց. «Հա, գիտեք ինչու…Գյուղացուն գնա, հարցրու, որ 150 հազար դրամով աշխատատեղ լինի, ի՞նչ կանես, կասի՝ կգնամ այդտեղ, կաշխատեմ»:

Մասնագետները նշեցին, որ այս ամենը տանում է նրանով, որ գյուղոլորտը վերանա, ամեն ինչ ներկրեն:

«Մոդելն այսպիսին է՝ գյուղատնտեսությունը պետք է խոշորանա:Ձեր կրճատումը կապված է  ձեր գործառույթներն այլ մարմիններին պատվիրակելու հետ: Վերջ: Խոստանում եմ՝ ես կնայեմ մաքսիմալ, ինչքան հնարավոր է ձեզ փոխհատուցում կտրամարդվի»,- ասաց նախարարը:

Որպես պատասխան  էկոնոմիկայի նախարարության աշխատակիցներն ասացին. «Մեզ փոխհատուցում պետք չէ, մենք ուզում ենք աշխատել»:

Վ.Քերոբյանը նշեց, որ եղել է մի օր, երբ 800 հոգի մարդ է կրճատել. «Արել եմ, որովհետև … հարկատուների փողերն է, ի՞նչ է՝ քամուն տանք»:

«Լրիվին կրճատեք, հանեք, պետք չէ այստեղ աշխատող»,- զայրացավ ակցիայի մասնակիցը:

Ակցիայի մեկ այլ մասնակից շարունակեց. «Ձեր նախարարության մեկ վարչության պետի, փոխնախարարի մեկ ամսվա աշխատավարձը կազմում է մի մարզի ողջ աշխատակազմի ծախսերը»:

Այնուհետև Վահան Քերոբյանը հեռացավ՝ էկոնոմիկայի նախարարության աշխատակիցների շատ հարցեր թողնելով անպատասխան:

Ակցիայի մասնակիցներն ասացին, որ իրենք Վահան Քերոբյանի պատասխանից որևէ բան չհասկացան:

«Մենք չհասկացանք, թե նախարարն ինչ է ասում: Հա, գնանք ուրիշ տեղ աշխատենք: Ես մասնագիտությամբ անասնաբույժ եմ, հաստատ չեմ կարող դպրոցում աշխատեմ կամ համակարգչի վրա»,- ասաց Լոռու բաժնի ավագ խորհրդատուն:

Նրանք նշում են՝ աշխատակիցների մեծ մասը կրճատվել է, իսկ  նախարարը ասում է՝ գնացեք տեքստիլում մտեք աշխատանքի, բայց իրենք չունեն դրա հնարավորությունը, այդտեղ աշխատելու հմտություններ: 

Ի դեպ, կառավարությունում լրագրողների հետ ճեպազրույցում Վահան Քերոբյանը նշեց, որ իրենց ջանքերն այս պահին ուղղված են գյուղատնտեսական արտադրողականության բարձրացմանը, բայց և այնպես, իրենք քայլեր են անում գյուղերում ոչ գյուատնտեսական աշխատատեղեր ստեղծելու համար։

«Մարդիկ չպետք է դատապարտված լինեն միայն գյուղատնտեսությամբ զբաղվելու։ Փորձում ենք այնպես անել, որ գյուղում ապրող մարդիկ գյուղատնտեսությամբ չզբաղվեն, այլ ունենան այլընտրանքներ»,- ասաց նա։

Խորհրդատվաական ծառայության հիմնադիր Վարդան Հայկազյանը լրագրողներին աաց, որ այս համակարգը «մահացել է» հիմարների պատճառով, որոնք չեն հասկանում, որ գյուղացուն պետք է կրթեն, քանի որ գյուղացին քեզ կերակրողն է:

Ակցիայի մասնակիցների խոսքով, Վահան Քերոբյանը գյուղատնտեսության հետ որևէ կապ չունի, նա չի պատկերացնում ոլորտը և ուղղակի մարդկանց է կրճատում: Այնուհետև գյուղոլորտի ազատված աշխատակիցները իրենց բողոքը շարունակեցին էկոնոմիկայի նախարարության մոտ: