Ձեր վստահելի աղբյուրը

Քաղտեխնոլոգ Արմեն Բադալյանը Երևանի քաղաքապետ Հայկ Մարությանին պաշտոնանկ անելու իշխանության քայլերը չի կապում վատ կառավարման, ենթադրյալ կոռուպցիոն խոսակցությունների հետ։ Ըստ նրա, դա ընդամենն առիթ է։

«Պատճառը դա չէ։ Եթե պատճառը չլիներ, հավատացեք, այդ հնարավոր կոռուպցիայի վրա ոնց աչք էին փակել, հիմա էլ կփակեին»,- Panorama.am-ի հետ զրույցում ասաց Ա. Բադալյանը։

Նա ընդգծեց, որ կա խնդիր. «Հայաստանում վերջին երեք տարում ձևավորվում է անձնիշխան կառավարման համակարգ։ Այսինքն կառավարման բոլոր մարմինները, որոնք քիչ թե շատ կշիռ ունեն, պետք է գտնվեն մի համակարգի մեջ, պայմանական անվանենք ուղղահայացի մեջ, որը պետք է սպասարկի մեկ մարդու քաղաքական շահերը։ Հասկանալի է, թե ով է այդ մեկ մարդը»,- նշեց քաղտեխնոլոգը։

Ըստ նրա, կարևոր չէ, դա կլինի, օրինակ, Ֆուտբոլի ֆեդարացիան, որը ՀԿ է, բայց ազդեցության ունի՝ ֆուտբոլի երկրպագուները բավականին շատ են, դատական համակարգը, որը ենթարկացնելու համար հատուկ օպերացիայի միջոցով  այնտեղ նշանակվեց նախկին պաշտոնյան, Երևանի պետական համալսարանը, որի ռեկտորին հանեցին ու բազմաթիվ չարչարանքներից հետո նշանակեցին իրենց թեկնածուին, ՏԻՄ մարմինները, որի դեպքում էլ թեև ՏԻՄ ընտրություններում ընդդիմությունը հաղթանակ է տարել, բայց «իրավապահ ուժերով» փոխում են ընտրության արդյունքները։

«Գործադիր, օրենսդիր մարմիններն այդ համակարգի մեջ են, միակ մարմինն այս պահի դրությամբ, որն այդ համակարգից դուրս է, Երևանի քաղաքապետն է, ոչ թե ավագանին։ Բնականաբար, այդպես չէր կարող շարունակվեր, պետք է մտցվեր այդ անձնիշխան համակարգի մեջ, ինչն այս պահին, առիթն օգտագործելով վատ կառավարման, ենթադրյալ կոռուպցիոն խոսակցությունները, փորձում են իրականացնել։ Կհաջողի, թե ոչ, չեմ կարող ասել։ Հնարավոր է հաջողվի և այդ համակարգը նույնպես կմտցվի մեկ մարդու ենթակայության տակ»,- ասաց քաղտեխնոլոգը։ 

Ինչո՞ւ է պետք Երևանը։

Երևանն ամենախոշոր համայնք է, ինչը, ըստ Ա. Բադալյանի, նշանակում է, ոչ միայն մեծ բյուջե ունի, խնդիրն այս պահին փողի պահը չէ, չնայած դա էլ է կարևոր, խնդիրն այն է, որ վարչական բավականին մեծ ռեսուրս է։

«Երևանում է կենտրոնացած բնակչության կեսը, վարչական ռեսուրսի կեսից ավելին։ Այդ իսկ պատճառով Երևանի վրա հսկողությունն ունի շատ մեծ նշանակություն։ Եթե դա հաջողվում է, կարող ենք ասել՝ Հայաստանի ողջ կառավարման համակարգը՝ օրենսդիր, գործադիր, դատական, ՏԻՄ մարմինների մեծ մասը, ազդեցիկ ՀԿ-ներ,  կրթական հաստատություններ, անցնում են մեկ մարդու իշխանության տակ»,- ասաց նա՝ միաժամանակ ընդգծելով, որ դա ինքնանպատակ չէ, պետք է խնդիրներ լուծի։

Իսկ խնդիրը, քաղտեխնոլոգի դիտարկմամբ, սահմանադրական բարեփոխումներն են ու պետական կառավարման համակարգը փոխելը։

Նա նշեց, որ Նիկոլ Փաշինյանը սահմանադրական բարեփոխումների հանձնաժողովի աշխատանքներն արագացրել է, ինչը նշանակում է, որ  Երևանի վարչական ռեսուրսին տիրապետելուց հետո շատ արագ Հայաստանում կգրվի սահմանադրության նախագահական կամ կիսանախագահական նոր ձևը ու կսկսվի, ամենայն հավականությամբ, հանրաքվեի գործընթացը։

«Հանրաքվեում հաջողության հասնելու գրավականներից մեկը Երևանի ենթակա քաղաքապետ ունենալն է։ Սա է ողջ ծրագիրը։ Իսկ Հայկ Մարությանն արդեն իրենց թիմից չէ, իրենց  հիմա պետք է մեկը, ով լինի թիմից»,- ասաց Ա. Բադալյանը։

Նրա խոսքով, այս ամբողջ գործընթացում Երևանի ավագանին կենսական նշանակություն ունի, անհանդուրժելի կլինի, որ Երևան համայնքի ղեկավարը չլինի իրենց ներկայացուցիչը։

«Սահմանադրական բարեփոխումներից հետո կսկսվի նախագահական ընտրապայքար, բնականաբար, Երևանի վարչական ռեսուրսը՝ համատիրություններ, դպրոցի, մանկապարտեզների տնօրեններ, սոցիալական տարբեր ծառայություններ, հիմնարկներ, որոնք ենթակա են Երևանի ղեկավարությանն, ընտրողների մեծ խմբի վրա ազդելու գործիք է»,- ասաց Արմեն Բադալյանը։