Ձեր վստահելի աղբյուրը

«ՀՀ քաղաքացիներին միավորում է մեկ ընդհանուր բան՝ հայկական շահ, որի ընկալման տիրույթում պետք է փնտրել համազգային կոնսենսուսի այն կետերը, որոնք կկոնսոլիդացնեն համահայկական ամբողջ էներգիան և այն կուղղեն համազգային իղձերի և նպատակների իրականացմանը»,-խորհրդարանում հայտարարեց «Հայաստան» խմբակցության պատգամավոր Արթուր Ղազինյանը:

Նկատելով, որ ներկայում գտնվում ենք մի կետում, երբ լուծման եզրագծում են գտնվում հայակական շահի երկու հենասյուներ՝ Արթուր Ղազինյանը պարզաբանեց, որ խոսում է Թուրքիայի հետ հարաբերությունների և Արցախի մասին:

Անդրադառնալով առաջին խնդրին՝ պատգամավորը հիշեց, որ 1998 թվականին Հայոց ցեղասպանության հարցը դրվեց ՀՀ արտաքին քաղաքականության գերակա ուղղության շարքում և նպատակ դրվեց հասնել նրա ճանաչմանը:

«Այն ստացավ աշխարհասփյուռ հայության կոնսենսուսը և նպաստեց տարբեր երկրներում հայության կոնսոլիդացիային և հանգեցրեց մի կետի, երբ ցեղասպանության 90-ամյակի տարելիցին արդեն նշմարվում էին լուրջ վտանգներ Թուրքիայի համար և հայկական աշխարհի արդյունավետ աշխատանքի շնորհիվ կարող է գնալ Հայոց ցեղասպանության շղթայական ճանաչման գործընթաց»,- ասաց Ղազինյանը և նկատեց, որ այդ պատճառով էլ 2005 թվականի ապրիլի 22-ին Էրդողանը նամակ է գրել երկրորդ նախագահ Ռոբերտ Քոչարյանին՝ առաջարկելով պատմաբանների խումբ ստեղծել, որը մերժվել էր:

«Հայաստան» խմբակցության պատգամավորը շեշտեց, որ Թուրքիայի հետ հարաբերությունների գնալիս մտքում պետք է պահել հին հայկական ասացվածք՝ «Շան հետ ընկերություն արա, բայց փայտը ձեռքիցդ մի գցի» և բացատրեց, որ Թուրքիայից և Ադրբեջանից ստացվող ազդակները բնավ չեն խոսում այն մասին, որ այնտեղ ցանկանում են տեսնել ուժեղ հայկական պետականություն, բարգավաճող հայ ազգ և ուժեղ հայկական ինքնություն:

«Այսօր փայտը գցել ենք ձեռքներիցս, փայտ չունենք, խնդիրը դրանում է: Իհարկե պետք է Թուրքիայի հետ հարաբերություններ կարգավորել, բայց գոյաբանական վտանգը կանգնած է մեր գլուխներին»,- ասաց Ղազինյանը և հիշեցրեց, որ Թուրքիայի բոլոր ռազմավարական ծրագրերում իրենց հարևանությամբ հայկական պետականություն չկա:

Նա նկատեց, որ Թուրքիան իր կատարելիք գործողություններում մտքում ունենալու է, որ Հայաստանը չպետք է լինի, իսկ հայկական կողմը պետք է անընդհատ պատրաստ լինի՝ փայտը ձեռքին:

Անդրադառնալով Արցախի հիմնախնդրին՝ ընդդիմադիր պատգամավորը շեշտեց. «Երբեք, որևէ պարագայում, ամենավատ երազում էլ հնարավոր չէր պատկերացնել, որ Հայաստանում էլ կարող են հրաժարվել Արցախի ինքնորոշման իրավունքի ճանաչումից, միշտ կարծել եմ, որ այն հայկական շահի հենասյուներից է, որի շուրջ բոլորն ունեն կոնսենսուս»:

Արթուր Ղազինյանը շեշտեց, որ Արցախի ինքնորոշման իրավունքը բնական իրավունք է, որը ենթակա չէ չեղարկման որևէ մեկի կողմից և հիշեց Մոնթե Մելքոնյանի խոսքը, որ եթե կորցնենք Արցախը, ապա կշրջենք մեր պատմության վերջին էջը:

Դիմելով ՀՌՀ անդամի ՔՊ-ի թեկնածու Հակոբ Մովսեսին, որը մինչ այդ հայտարարեց, թե 30 տարի Հայաստանի պետականություն չի եղել՝ ընդդիմադիր պատգամավորն ասաց. «Մենք ունեցել ենք պետություն և հիմա էլ ունենք և այդ պետությունում դուք նախարար եք աշխատել»:

Ղազինյանը նկատեց, որ հազարավոր մարդկանց զրկանքների և արյան գնով է ձևավորել մեր պետությունը և չի կարելի հրաժարվել պետությունից: