Ձեր վստահելի աղբյուրը

Մայիսի 1-ից հունիսի 1-ը Հայաստանում տեղի է ունենում գառան մսով կերակրատեսակների #ԳԱՌուն IV փառատոնը։ 2022 թվականին փառատոնին մասնակցելու հայտեր են ներկայացվել Երևանից, Ծաղկաձորից, Դիլիջանից և Արցախից։ Կազմակերպիչները նշում են՝ զբոսաշրջիկները և տեղի բնակիչներն արդեն ընտրել են հավանած ուտեստները: Առանձին դիտարկվում են նաև այն ռեստորանները, որտեղ առավել ստեղծարար և հետաքրքիր կերպով է ներկայացված գառան մսով ճաշացանկը։

Ոլորտի ներսում կապերի ամրապնդման համար կազմակերպվեց երևանցի ռեստորատորների այցը Դիլիջան՝ քննարկելու և՛ զբոսաշրջային սեզոնի մեկնարկը, և՛ հյուրերին համեղ, վառ և ոճային տպավորելու փորձի փոխանակման համար:

Ինչպես նշեց փառատոնի գաղափարախոս, «Մարգարյան բիզնես խմբի» ղեկավար Կարեն Մարգարյանը, ռեստորանատերերը պետք է հնարավորինս հաճախ դուրս գան իրենց հարմարավետության սովորական շրջանակից, փնտրեն ու գտնեն նոր գաղափարներ և ուղղություններ: Փառատոնի շրջանակում  ոչ ֆորմալ հաղորդակցությունը լավագույն միջոցն է ոչ միայն միմյանց ավելի լավ ճանաչելու, փորձի փոխանակման, այլև մթնոլորտը զգալու, նոր նախագծերի խթան տալու համար։

Միջոցառման ծրագիրը ներառում էր այցելություններ Դիլիջանի #ԳԱՌուն-ի մասնակիցներին, ինչպես նաև՝ տեղի տեսարժան վայրեր և թանգարան:



«Թավա» և «Կճուճ» ռեստորանների հիմնադիր Վարդա Ավետիսյանը հյուրերի համար իսկական խնջույք էր պատրաստել՝ ներկայացնելով ոչ միայն գառան մսի ճաշացանկից ուտեստներ, այլև ֆիրմային աղանդեր ու խորտիկներ, որոնք վաղուց սիրված են զբոսաշրջիկների և հայաստանցիների կողմից։



«Երևանն այցելում է Դիլիջան» նախագծի հյուրերը հատկապես ընդգծեցին մարինադների զարմանալի համադրությունները, ոչ ստանդարտ սոուսները, իսկ մեղրի մեջ պատրաստված գառան մսով ուտեստը դուր եկավ բոլորին։

Այցելելով Ժիրայր Ավանյանին ImToon-ում՝ հյուրերը ծանոթացան հայկական տան ավանդույթներին, նկատեցին խաղաղ և հարմարավետ մթնոլորտը։ Գառան չքյուֆթան և սրունքն առանձնապես տպավորեցին հյուրերին։ Ռեստորանում ևս նման այցը, տարբեր ռեստորատորների՝ մեկ հարկի տակ համախմբելու և, որպես գեղեցիկ միջոցառման մաս, միավորելու հիանալի գաղափարը դուր եկան:



«Ուրախ էինք մեր ռեստորանում հյուրընկալել ԳԱՌուն փառատոնի մասնակիցներին և կազմակերպիչներին: Կարծում ենք՝ հրաշալի գաղափար է, որ տարբեր ռեստորատորներ հավաքվում են մի հարկի տակ: Հրաշալի երեկո էր, հյուրերին ներկայացրեցինք մեր մասնակից ուտեստներից երկուսը՝ գառան չքյուֆթան և սրունքը: Բարի երթ փառատոնին, կհանդիպենք այս ամիս»:



Փառատոնի անփոփոխ դեսպան, հայտնի դիզայներ և նկարիչ Արմեն Երիցյանը նշում է.

«Ճամփորդության ժամանակ փառատոնի հյուրերն ու ռեստորատորները վայելեցին Վարդայի կազմակերպած կոնցեպտուալ ճաշը։  «Թավա»-յի բոլոր ուտեստները՝ անգամ աղցանները և աղանդերը, մատուցվում էին թուջե տապակներով։ Մեզ տպավորել է համերի ֆանտաստիկ համադրությունը, Վարդան որոշակիորեն թրենդներ է սահմանում գաստրոնոմիայում։ Ուրախ եմ, որ ժամանակ ունեցանք և այցելեցինք նաև Անի Հարությունյանին (ArmFoodLab-ի հիմնադրին), որը պատրաստում է առանց խմորիչի համեղ հաց՝ տարբեր միջուկներով: Նա ապշեցնում է հացի հանդեպ իր վերաբերմունքով: Նրա համար հացը առանձնահատուկ կենդանի օրգանիզմ է: Ճամփորդության ապոթեոզը ընթրիքն էր  Հայաստանի ռեստորանային բիզնեսի մաեստրոյի, «Դոլմամա»-ի  տիրոջ, գաստրոնոմիական բազմաթիվ նորույթների հեղինակի «ԻմՏուն»  ռեստորանում։ Դիլիջանը սքանչելի քաղաք է, ճամփորդությունը՝ համեղ ու ջերմ։ Խորհուրդ եմ տալիս օգտվել առիթից և մինչև հունիսի 1-ը հասցնել այցելելու փառատոնի բոլոր մասնակիցներին և համտեսելու գառան մսով ուտեստներ»։



Լուսանկարիչ և դիզայներ, փառատոնի մշտական դեսպան Նատա Բրետտելլը նույնպես կիսվեց իր տպավորություններով. «Գիտե՞ք, թե ոնց են միմյանցից տարբերվում լավ ռեստորանը և սովորական ռեստորանը: Իմ կարծիքը կձևակերպեմ  ռեստորատոր Կարեն Մարգարյանի խոսքով՝ ռեստորանը պարզապես սնվելու տեղ չէ: Լավ ռեստորանը մշակույթ ու մտածելակերպ է փոխում, զարգացնում է ճաշակը։ Թերևս Դիլիջանի «Թավա»  -ն այդ ռեստորաններից մեկն է: Եթե «Կճուճ»-ը կճուճներում եփելու և հայկական խոհանոցի նոր մեկնաբանության մասին է, ապա «Թավա»-յում ամեն ինչ՝ նախուտեստներից մինչև հիմնական ուտեստներ, թուջե տապակներով ջեռոցում պատրաստելու մասին է: Ճաշացանկի հիմքում միջազգային խոհանոցն է՝ տեղական տավուշյան բաղադրիչներով: Ինձ ռեստորաններում գրավում են ոչ թե հերթական խորովածը կամ Կեսար աղցանը, այլ՝  նորույթներն ու ինքնատիպ ճաշատեսակները, որոնք հատուկ են միայն այդ ռեստորանին: Թեպետ ճաշացանկում նաև Կեսար աղցան կա՝ հատուկ ձևով պատրաստված թավայի մեջ և վայրի սնկով։ Ես փորձեցի և հավանեցի սալորաչրով, մեղրով և համեմունքներով գառան միսը: Այն հարգանքի տուրք էր՝ ուղղված Մարոկկոյի թաջինին: Հավանեցի սոուսները և  չորացրած լոլիկով ու թարխունով ծիրանահամ պեստոն, նաև՝ բաստուրմայով և հապալասով գերմանական նրբաբլիթները, այսպես կոչված՝ Dutch babies-ը։ Պարզ բան են թվում, բայց այնքան թարմ գաղափար է, որ համային ռեցեպտորները հրճվում են այդ նորույթներից: Առանձին հաճույք է հետևել Երևանի և Դիլիջանի ռեստորանատորների զրույցներին։ Նրանց խոսակցություններից հասկանում ես ոչ միայն այս բիզնեսի նրբությունները, վերելքներն ու վայրէջքները, այլ նաև այն, որ այս գործով պետք է զբաղվել միայն մի պայմանով, պայմանով, որ շատ եք սիրում և պատրաստ եք ապրել դրանով 24/7»:




Ըստ ռեստորատոր, The Club-ի համասեփականատեր Անդրանիկ Գրիգորյանի՝ փառատոնը դեռ զարգանալու տեղ ունի, կարելի է ավելացնել ու խաղարկել բազմաթիվ նոր գաղափարներ: Այդուհանդերձ, սա հիանալի պատրվակ է Դիլիջանում գաստրոնոմիական արկած փնտրելով մոլորվելու համար։



Փառատոնի գործընկերը՝ Meyron Wine-ը, ընդգծեց այն միջոցառումների անհրաժեշտությունը, որտեղ գինին և սնունդը ներդաշնակորեն լրացնում են միմյանց՝ բացահայտելով համի նոր երանգների հարստությունը: Պատահական չէ, որ գինին և գառան միսը մեր տարածաշրջանի հնագույն ավանդույթն են։