«Արալեզ» ասոցիացիայի ձգտումը՝ բաց և հարմարավետ քաղաքականություն վարել, ամենակարևորն է. EAKOP-ի գլխավոր քարտուղարի տեղակալ
Իրավատերերի միությունների Եվրասիական կոնֆեդերացիայի՝ EAKOP-ի կազմում ընդգրկված են հեղինակային և հարակից իրավունքներով զբաղվող կազմակերպություններ 11 երկրից։ Հայաստանից կազմակերպության գլխավոր գործընկերն է դառնալու «Արալեզ» հասարակական կազմակերպությունը (Հեղինակային, հարակից եւ մտավոր սեփականության իրավունքների պաշտպանության համահայկական ասոցիացիա)։
Այսօր «Արալեզ» հասարակական կազմակերպության նախաձեռնած ֆորումին ներկա էր նաև EAKOP-ի (Իրավատերերի միությունների Եվրասիական կոնֆեդերացիայի՝ ԻՄԵԿ) գլխավոր քարտուղարի տեղակալ Գրիգորի Տուրինցևը։
Լրագրողների հետ զրույցում նա ասաց, որ Իրավատերերի միությունների Եվրասիական կոնֆեդերացիայում ընդգրկված է 11 երկրներից (ԱՊՀ երկրները, նաև մի քանի արտասահմանյան) կազմակերպություններ:
Խոսելով ոլորտում կատարված տեղային ուսումնասիրության մասին, նա մի շարք խնդիրներ մատնանշեց․ «Մենք համագործակցում էինք Հայաստանը ներկայացնող մի կազմակերպության հետ, բայց մենք բազմաթիվ դժգոհություններ ենք ստացել այդ ընկերության հետ համագործակցող հեղինակներից, կատարողներից։
Երբ մենք սկսեցինք ուսումնասիրել բողոքներն ու ստացված հաշվետվությունները, զեկույցները, եկանք այն հետևության, որ Հայաստանում ներկայումս պաշտպանված չեն ոչ հեղինակների, ոչ կատարողների իրավունքները, հատկապես՝ հրապարակային կատարման առումով, այսինքն հասարակական վայրերում՝ սրճարաններում, ռեստորաններում, առևտրի կենտրոններում և այլն հնչող ձայնագրությունների առումով։
Ուստի, երբ ծանոթացանք «Արալեզի» ներկայացված զարգացման հայեցակարգին, տեսանք, որ, այնուամենայնիվ, «Արալեզ»-ի գործունեությունը ներկայումս ավելի շատ կենտրոնացած է բաց, հանրային քաղաքականության վրա, որը կձևավորի թափանցիկ շուկա և կհարմարեցվի շուկայի ոչ միայն խոշոր խաղացողների՝ հեռարձակողներ կամ ավելի մեծ իրավունքներով օգտվողների համար, «Արալեզը» պատրաստվում է աշխատել հենց հեղինակների ու կատարողների հետ։ Մարդիկ մեր ունեցած ամենաարժեքավոր բանն են»,- ասաց Գրիգորի Տուրինցևը։
Նրա խոսքով, այն սովորույթները, ավանդույթները, որոնք կան Հայաստանում, ցավոք սրտի, հիմա շատ են բարդացնում գործունեությունը։ Սակայն, այս փուլը հաղթահարվում է ցանկացած երկրում, որը նոր է սկսում այս ոլորտի կարգավորումներ սահմանել՝ ներդնելով և ունեցած փորձը արտերկրում, և ժամանակակից տեխնոլոգիաները։ Վերջ ի վերջո, հեղինակային ու հարակից իրավունքներով զբաղվող կազմակերպությունների գլխավոր նպատակն է գնահատել ու հատուցել ըստ արժանիի այն բոլոր հեղինակներին, որոնք ստեղծագործում են ի բարօրություն իրենց երկրի։
Նրանց իրավունքները պետք է պաշտպանված լինեն թե իրենց երկրում, թե արտասահմանում։ Եվ հենց դրան է միտված թե Կոնֆեդերացիայի, և թե «Արալեզ» ասոցիացիայի գործունեությունը։
«Շուկան մեկ օրում հնարավոր չէ փոխել։ Բայց պետք է անընդհատ շփվել բիզնեսի հետ, բացատրել պետության ներկայացուցիչներին, թե ինչու է դա կարևոր։ Մենք պետք է կառուցենք ամենաթափանցիկ ու քաղաքակիրթ շուկան։ Այսինքն, բացատրեք շուկայից օգտվողներին, թե ինչու է դա նրանց անհրաժեշտ։ Բայց եթե մենք դա ստիպենք նրանց, վրդովմունք կառաջացնենք, մանավանդ հիմա, երբ տնտեսության մեջ բավականին ծանր վիճակ է։
Հետևաբար, «Արալեզ»-ի ձգտումները՝ հեղինակներին մատուցել ավելի շատ ծառայություններ, դարձնել իր քաղաքականությունը բաց և առաջին հերթին հարմարավետ, հավանաբար, ամենակարևորն է»,- ասաց նա։
Գրիգորի Տուրինցևի խոսքով, առանց պետական աջակցության դժվար կլինի իրականացնել նմատիպ գործունեություն, քանի որ վերահսկողական ֆունկցիայի մի մասը կատարում է հենց պետությունը։
Հարակից հրապարակումներ`
- «Արալեզ» ՀԿ նախաձեռած ֆորումում ներկայացվեցին հեղինակների շահերը բավարարելու նոր տեխնիկական գործիքներ
- «Արալեզ» ՀԿ-ն՝ վահան հայ հեղինակների համար. Վիկտորյա Մալոյան