Պետք է լինել սառնասիրտ. Անդրանիկ Քոչարյանը՝ ադրբեջանցիների՝ Արցախի տարածք մտնելու մասին
«Ադրբեջանի իշխանություններն իրականացնում են լավ պլանավորված պրովակացիոն գործողություններ՝ դրանով լարվածություն ստեղծելով Արցախում և, բնականաբար, ակնկալիքն այն է, որ այդ լարվածությունը կտեղափոխվի նաև Հայաստան»,- խորհրդարանական ճեպազրույցների ժամանակ ասաց ԱԺ «Քաղաքացիական պայմանագիր» խմբակցության պատգամավոր Անդրանիկ Քոչարյանը՝ խոսելով ադրբեջանցի բնապահպանների կողմից Ստեփանակերտ-Գորիս մայրուղին փակելու մասին։
Նրա կարծիքով, պետք է լինել սառնասիրտ, իրենց ցանկություններն իրենց ցանկություններն են։
«Իսկ մեր նպատակները մնում են նույնը՝ անվտանգ կյանք մեր Արցախի հայրենակիցների համար և անվտանգության միջավայրի կառուցում Հայաստանի և Արցախի միասնական անվտանգային տարածքում»,- նշեց իշխող ուժի ներկայացուցիչը՝ հավելելով, որ Կաշենի հանքավայից հետո մեկ այլ առիթ կփնտրեն ադրբեջանցիները պրովակացիայի համար։
Ա. Քոչարյանը նշեց, որ օրեր առաջ ծագած այդ խնդիրը լուծվել է խաղաղապահ ուժերի մասնակցությամբ։
«Խաղաղապահ ուժերն ունեն հենց խաղաղապահ առաքելություն չեզոքացնելու նման լարվածությունը, իսկ մենք էլ այդ ժամանակահատվածը ճիշտ օգտագործենք, որպեսզի մեր անվտանգային միջավայրը վերականգնի իր ուժն ու բովանդակությունը»,- ասաց նա։
Ա. Քոչարյանը նշեց, որ Ադրբեջանը միշտ էլ ունի ավելի մեծ ծրագրեր, այլ բան, թե Հայաստանն ինչքանով է պատրաստ դիմակայել նրա այդ ծրագրերին։
«Եղել են ժամանակաշրջաններ, որտեղ մենք ոչ միայն դիմակայել ենք, նաև շատ հեռու ենք հետ շպրտել։ Կարծում եմ՝ Ադրբեջանը պետք է մի բան իմանա՝ նման քայլերով ինքը ստիպում է, որպեսզի Արցախն ու Հայաստանն իրենց անվտանգային միջավայրը դարձնեն շատ ավելի գերակա, և մեր անհաջողություններից դասեր քաղելու գործընթացը լինի շատ ավելի արագ քայլերով»,- ասաց Անդրանիկ Քոչարյանը։
Հարցին՝ իսկ ինչպե՞ս էին ադրբեջանցիները կարողացել հասնել հանքավայր, նա ասաց. «Կարծում եմ՝ այստեղ տեղի է ունեցել փոխհամաձայնեցված գործողություն, և դա շատ ճիշտ է։ Կարծում եմ՝ պետք է Արցախի իշխանությունները միշտ կարողանան նման ռիսկերը կառավարել և կառավարում են»։
Փոխհամաձայնեցված՝ ո՞ւմ միջև, ճշտող հարցին ի պատասխան նա ասաց. «Չեմ կարող ասել, բայց որ համաձայնություններն առկա են, դա էլ է փաստ»։
«Եթե լարվածության էլի նման դրսևորումներ լինեն, կարող է հաջորդ անգամ թույլ չտան, մեկ անգամ թույլ տան։ Սա գործընթաց է, և այս գործընթացը պետք է այնպես անել, որպեսզի չբերի ավելի խոշոր լարվածությունների, բայց նաև մեզ հնարավորություն տա արագ լուծելու մեր անվտանգային խնդիրները»,- ասաց Ա.Քոչարյանը։
Հարցին՝ հենց այս պահին էլ Արցախում իրավիճակը լարված է, ադրբեջանիցները փակել են ճանապարհ, փորձում են վրան տեղադրել, ինչի՞ հետևանք է սա, Անդրանիկ Քոչարյանն ասաց. «Ադրբեջանի կողմից պլանավորված պրովակացիաների հետևանք է։ Դա մեզ անընդհատ ուղեկցելու է։
Այստեղ մեր հրադադարը պահպանող ուժային բլոկը պետք է դրանից հետևություններ անի, կանխատեսի, գուցե նաև ադրբեջանական կողմին հեռու պահի նման մտադրություններից, քանի որ դա ոչ մի լավ բանի չի բերելու։
Վերջին հաշվով, եթե այսպես լարվածությունները շարունակեն ու ռեալ նպատակը լինի Լաչինի միջանցքը փակելը, դա բերելու է նրան, որ մեր հայրենակիցներին ոչ մեկն անպաշտպան չի կարող թողնել։ Եթե ադրբեջանցիները 90-ականների դասերը ուսումնասիրած լինեն, վերլուծություն արած լինեն, թե հակամարտությունն ինչու վերածվեց լայնածավալ պատերազմի, պետք է իմանան, որ հենց այդպիսի գործողություններով. սկսեցին ավելի շատ կրակել, մենք էլ սկսեցինք շատ պաշտպանվել, հետո երբ սկսեցին ավելի շատ կրակել, մենք էլ սկսեցինք արագ տեմպերով կանոնավոր բանակի կառուցում։
Ադրբեջանը ճիշտ կաներ ոչ թե ուժի լեզվով հարաբերություններ կառուցել, քանի որ ոչ մի տեղ չի հասնելու։ Լավ, այսօր հաջողություն արձանագրեցին, բայց դրանից հետո պետք է կայունություն ապահովես։ Քարոզ չեմ անում, թե Ադրբեջանն ինչ պետք է անի։ Իրենք անում են այն, ինչ ուզում են»։
Ըստ նրա, որ այս լարվածությունն էլ, ինչպես օրեր առաջ, կհագնուցալուծվի, բայց վերջնահաշվարկում ամեն մի նման գործողությունից հետո պետք է գիտակցել, որ Հայաստանից ու Արցախից է կախված՝ նման գործողությունները Արցախում կլինե՞ն շարունակական, թե՞ ոչ։
«Մեր ազգաբնակչությունը պետք է լինի շատ ավելի զգոն ու պատրաստված»,-ասաց Անդրանիկ Քոչարյանը։
Հարակից հրապարակումներ`
- Արցախի լիազոր պետական մարմինները ձեռնարկում են բոլոր հնարավոր միջոցները իրավիճակի կարգավորման ուղղությամբ
- Ադրբեջանցիներն Արցախում կրկին «բողոքի ակցիա» են իրականացնում
- Քաղաքագետ. Ու՞մ հետ և ի՞նչ է պատրաստվում քննարկել Արցախի իշխանությունը
- Ադրբեջանցիների այցերն Արցախ պետք է բացառել՝ ինչ նպատակ ու հիմք էլ առաջ քաշվի. Աբրահամյան
- Ադրբեջանցիների այցը Դրմբոնի և Կաշենի հանքավայրեր համաձայնեցված չի եղել Արցախի իշխանությունների հետ. Տեղեկատվական շտաբ
- Արցախի իշխանությունը պետք է պարզաբանի, թե ինչպես են ադրբեջանցիները հայտնվել Արցախի՝ հայկական վերահսկողության տակ գտնվող հատվածում. Աբրահամյան
- Ադրբեջանը պետք է ընդունի, որ Արցախն անկախ երկիր է լինելու. Ռուբեն Վարդանյան
- Լաչինի միջանցքը թեկուզ մի քանի ժամով փակելը հղի է անդառնալի հումանիտար հետևանքներով. Արցախի ՄԻՊ
- Չպետք է թույլ տալ Արցախի փոխարեն ուրիշներն իրենց շահերից ելնելով որոշեն Արցախի ճակատագիրը. Վահե Հակոբյան