Ձեր վստահելի աղբյուրը

Հայաստանի կառավարության ապրիլի 30-ին կայանալիք նիստի օրակարգում ընդգրկված է ԱԺ «Ժառանգություն» խմբակցության պատգամավոր Թևան Պողոսյանի ներկայացրած ԱԺ կանոնակարգ օրենքում փոփոխություն և լրացում կատարելու մասին նախագիծը, որը կառավարությունը մտադիր է չընդունել:

Ընդդիմադիր անդամ խմբակցության պատգամավորը կառավարությանն առաջարկում է փոխել ԱԺ-կառավարություն հարցուպատասխանի ձևը և առաջինը հնչեցնել բանավոր հարցերը, իսկ գրավոր հարցերը թողնել վերջում: Նշենք, որ այժմ առաջինը պատգամավորները հնչեցնում են կառավարությանն ուղղված գրավոր հարցերը, այնուհետև՝ բանավոր հարցերը:

«Երբեմն գրավոր հարցերի առատության պատճառով պատգամավորները զրկվում են բանավոր հարցերով հանդես գալու հնարավորությունից, այդ պատճառով ավելի նպատակահարմար է նիստի սկզբում առաջինը հնչեցնել բանավոր հարցերը, այնուհետև՝ գրավոր հարցերը»,-հիմնավորել է նախագիծը ներկայացրած պատգամավորը:

Բացի այդ, նա ներկայացրած օրինագծով փորձել է հստակեցնել բանավոր հարցերով կառավարությանը դիմելու կարգը: Գործող կարգով առաջինը բանավոր հարցերով կարող են հանդես գալ ընդդիմադիր խմբակցությունների 3-ական հերթագրված պատգամավորներ, որից հետո բանավոր հարցերով հանդես են գալիս հերթագրված մյուս պատգամավորները: Բանն այն է, որ նշված կարգով, ըստ պատգամավորի, ստեղծվում է մի իրավիճակ, որի պայմաններում ոչ ընդդիմադիր և անկախ պատգամավորները շատ հաճախ չեն կարողանում հասցնել նիստի ընթացքում իրենց հարցը հնչեցնել: «Ներկայացված նախագծով առաջարկվում է, որ նիստը սկսելուց մեկ ժամվա ընթացքում ընդդիմադիր խմբակցությունների պատգամավորները հնչեցնեն 2-ական հարցեր, այնուհետև, 1 ժամ հետո 2-ական հարցերով հանդես գան ոչ ընդդիմադիր և անկախ պատգամավորները, որից հետո բանավոր հարցեր տրվեն հերթագրված մյուս պատգամավորների կողմից: Այսպիսով, նախագծի շնորհիվ կստեղծվեն ՀՀ կառավարությանը հարցեր տալու համար համեմատաբար հավասար պայմաններ թե´ ընդդիմադիր, թե´ ոչ ընդդիմադիր և թե´ անկախ պատգամավորների համար», հիմնավորել է պատգամավորը:

Կառավարությունը սակայն, մտադիր է վաղվա նիստում չհաստատել պատգամավորի հեղինակած նախագիծը: Արդարադատության նախարար Հովհաննես Մանուկյանը, որը պատրաստվում է վաղը նիստում ներկայացնել կառավարության դիրքորոշումը, ԱԺ նախագահ Գալուստ Սահակյանին ուղարկած բացատրության մեջ նշել է, որ Հայաստանի օրենսդրական աշխատանքի փորձը վկայում է, որ Հայաստանի Հանրապետության կառավարությանն առնչվող հարցերի քննարկման ժամանակ նախապես գրավոր ձևակերպված և կառավարությանն ուղղված հարցերի առաջնահերթությունը բանավոր հնչեցվող հարցերի նկատմամբ բխում է «պառլամենտական ժողովրդավարության և նպատակահարմարության սկզբունքներից»:

«Չստվերելով Ազգային Ժողովի պատգամավորների կողմից բարձրացվող բանավոր հարցերի կարևորությունը, առարկայականությունը և դրանց հրատապությունը՝ այդուհանդերձ նշենք, որ, որպես կանոն, գրավոր ձևակերպված հարցերն իրենց մեջ պարունակում են խորքային վերլուծության և ուսումնասիրման առարկա հանդիսացող մասնագիտական խնդիրներ: Կառավարությունն էլ իր հերթին հնարավորություն ունի իրավիճակային պատասխանի փոխարեն ներկայացնել լիարժեք ու հիմնավոր պատասխան: Ուստի, խնդիրը բարձրաձայնելու և նախապես աշխատանք կատարած պատգամավորի գրավոր հարցն ու դրա պատասխանը, պատգամավորի կարծիքը և կառավարության անդամի արձագանքն ուշադրության արժանանալու և լսելի լինելու իրավունքի տեսանկյունից ավելի արդարացված է»,- նշել է նախարարը:

Այնուհետև պաշտոնյան ներկայացրել է վիճակագրություն, որի համաձայն գրավոր հարցերի իսպառ բացակայության դեպքում նիստի ժամանակը բավարարում է 13-14 բանավոր հարցերի համար, մինչդեռ յուրաքանչյուր անգամ բա¬նավոր հարցեր տալու համար հերթագրվում է 19-20 պատգամավոր:

Արդյունքում, ըստ նախարարի, ներկայացված առաջարկության ընդունումը խնդիրը լուծելու փոխարեն կառաջացնի նոր խնդիր՝ ընդհանրապես կվտանգվի պատգամավորի գրավոր հարցերը և հարցերի պատասխանները Ազգային Ժողովի նիստում հնչեցնելու սահմանադրական իրավունքի իրականացումը:

«Հարկ ենք համարում նշել նաև, որ պատմության մեջ ընդհամենը մեկ դեպք է գրանցվել, երբ նիստի ժամանակը չի բավարարել բանավոր հարցերով հանդես գալու համար»,- նշել է Մանուկյանը՝ և այդ հիմքով էլ դեմ արտահայտվելով պատգամավորի ներկայացրած նախագծին: