Ձեր վստահելի աղբյուրը

«Եթե իշխանությունները չդադարեցնեն այս շինարարությունը, մենք ենք կանգնեցնելու. գալու-կանգնելու ենք այստեղ մտնող մեքենաների առաջ ու թող մեքենան մեր վրայով անցնի»,-լրագրողներին ասաց բողոքի դուրս եկած Տերյան 23 շենքի բնակիչ Վարդան Գերավետյանը:

Տերյան 19, 23, 25, Լալայանց 37, Կողբացի 42, Պուշկին 40 շենքի բնակիչները դուրս էին եկել բողոքի ակցիայի` պահանջելով դադարեցնել Պուշկին 38 հասցեում կառուցվող շենքի շինարարությունը: Բնակիչներն ասացին, որ շինարարության թույլտվություն ստացել է «Լոկալ դիվիլոփերզ» ՍՊԸ-ն (ըստ նրանց պատկանում է Սամվել Մայրապետյանին). կառուցվելու է 12 հարկանի շենք:

«Մենք նամակ ենք գրել նախագահին, քաղաքապետին, սակայն պատասխանը զրոյական է: Ամիսուկես առաջ, երբ քաղաքապետը եկել էր կողքի բակում մանկական խաղահրապարակի բացմանը, մենք նրան բերեցինք այստեղ: Եկավ, նայեց, մենք հարցրեցինք` նորմալ է, ինչ տեսնում եք, ասաց` ոչ»,- պատմեց բնակիչն ու շարունակեց, որ իրենք առաջարկել են այստեղ կառուցել սպորտդահլիճ, իսկ քաղաքապետն էլ ասել է, որ կառուցապատողն արդեն գումար է ծախսել ու պետք է հաշվեն` ինչպես փոխհատուցել նրան, ու Կենտրոն վարչական շրջանի ղեկավար Գագիկ Գյանջումյանին էլ ասել էր, որ հետևի, թե ինչ է կատարվելու:

«Որոշ ժամանակ անց Գյանջումյանն ասել է, որ Երևանի գլխավոր ճարտարապետ Նարեկ Սարգսյանը մեզ հետ չի ցանկանում հանդիպել, որպեսզի քննարկում կազմակերպեն, ու ասել է, որ այն, ինչ կառուցվում է, նորմալ է»,- ասաց Վ. Գերավետյանը:

«Երևանի ամբողջ ճարտարապետական ֆոնը քանդել են: Քաղաքապետն եկավ ու ասաց` ձեր հարցին լուծում կտանք, ասաց նաև` եկեք մի քիչ իրար զիջող լինենք: Ինչ է` մենք պետք է զիջենք բիզնեսմենի՞ն»,- ասաց Եզնիկ Կողբացի 42 շենքի բնակիչ Լաուրա Գասպարյանը:

Բնակիչ, փաստաբան Անահիտ Բեգլարյանը տեղեկացրեց, որ երկուշաբթի հայցադիմում է ներկայացնելու դատարան` անվավեր ճանաչել շինթույլտվությունը և բակի նախկին տեսքը վերականգնել: Նա ասաց, որ շինթույլտվություն տրվել է բազմաթիվ օրենքներ ու ենթաօրենսդրական նորմել խախտելով. նախ` չի կազմակերպվել հասարակական քննարկում, իրականացվել է պարզ փորձաքննություն, մինչդեռ պետք է համալիր փորձաքննություն իրականացվեր, չի անցկացվել ինժեներաերկրաբանական հետազոտություն և այլն. «Եթե ամեն բան արվեր ըստ օրենքի, թույլտվություն չէր լինի»,- վստահեցրեց նա ու ընդգծեց. «Մենք պայքարելու ենք, քանի որ մեր պայքարն օրինակ է: Եթե կառուցվի, ապա կխախտվի 500 անձի իրավունքներն ու շահերը»: