Ընտանի կենդանիներ պահելու թույլտվություն չունեցողներին փաստորեն տուգանք է սպառնում
Երևանցիները տարեցտարի ավելի շատ տուրք են վճարում ընտանի կենդանիներին պահելու թույլտվություն ստանալու համար:
Քաղաքապետարանի աշխատակազմի առևտրի և սպասարկումների վարչության` Panorama.am-ին տրամադրած տվյալների համաձայն, 2014թ. ընթացքում Երևան քաղաքի բնակիչները 235 ընտանի կենդանի պահելու թույլտվության համար վճարել են 1175000 դրամ տեղական տուրք: 2015թ. ընթացքում Երևան քաղաքի բնակիչները 448 ընտանի կենդանի պահելու թույլտվության համար վճարել են 2240000 դրամ տեղական տուրք:
Պարզ չէ, երևանցինե՞րն են սկսել ավելի շատ կենդանիներ պահել, թե՞ քաղաքային իշխանություններն են սկսել «լավ աշխատել»:
Դատելով վերջերս Խարբերդի բնակիչներից մեկի՝ կառավարության ղեկավարին ուղղված բաց նամակից՝ վերջին տարբերակն ավելի իրատեսական է: Հիշեցնենք, որ քաղաքացուն կանչել էին վարչական շրջանի շենք՝ առանց թույլատվության ընտանի կենդանի պահելու փաստի կապակցությամբ հարուցված վարչական վարույթի շրջանակներում բացատրություն կամ միջնորդություն ներկայացնելու համար:
Նամակին ծանոթանալուց հետո Երևանի ավագանու անդամ Անհաիտ Բախշյանը զարմանք հայտնեց, որ հավերի համար ևս տուրք են պահանջում: Նրա խոսքով, որոշման նախագծի մասին խոսելիս միշտ մատնանշել են շներին ու կատուներին:
«Նախորդ տարիներին տեղական տուրք է գանձվել հիմնականում շներ, ինչպես նաև մանր և խոշոր եղջերավոր անասուններ պահելու թույլտվության համար»,-Panorama.am-ին ասացին քաղաքապետարանի վերը նշված վարչությունից:
Ի՞նչ է սպառնում տուրքը չվճարած երևանաբնակներին:
««Տեղական տուրքերի և վճարների մասին» ՀՀ օրենքով սահմանված ընտանի կենդանիներ պահելու թույլտվության համար տեղական տուրք չվճարած քաղաքացիներին վարչական իրավախախտումների վերաբերյալ արձանագրության առկայության դեպքում «Վարչական իրավախախտումների վերաբերյալ» ՀՀ օրենսգրքի 113-րդ հոդվածով նախատեսված է տուգանքի նշանակում 5000-10000 դրամի չափով»,-պարզաբանեցին առևտրի և սպասարկումների վարչությունից, ավելացնելով, որ ընտանի կենդանիներ պահելու համար (հավերը, հնդկահավերը ու այլ ընտանի թռչունները ևս ընտանի կենդանիներ են համարվում) տեղական տուրքի տեսակ է սահմանվել ՀՀ ազգային ժողովի կողմից ընդունված «Տեղական տուրքերի և վճարների մասին» ՀՀ օրենքով, իսկ նշված օրենքով նախատեսված տեղական տուրքերի դրույքաչափերի սահմաններում Երևանի ավագանին սահմանում է Երևան քաղաքի տարածքում տվյալ տարվա համար տեղական տուրքերի դրույքաչափերը:
Հարցին, թե քանի ընտանի կենդանի է հաշվառված Երևանի տարածքում, քաղաքապտարանից պատասխանեցին, որ հաշվառումը կատարվում է վարչական շրջանների ղեկավարների աշխատակազմերի կողմից և Երևանի քաղաքապետարանի աշխատակազմի առևտրի և սպասարկումների վարչությունում բացակայում է նման տեղեկատվությունը:
Գյուղատնտեսության նախարարության հասարակայնության հետ կապերի վարչությունից հարցի վերաբերյալ մանրամասն տեղեկատվություն տրամադրեցին, միաժամանակ հայտնեցին, որ չեն պատրաստվում հարցին որևէ կերպ միջամտել. «Հարցը ՀՀ գյուղատնտեսության նախարարության լիազորության սահմաններում չէ։ Որոշումն ընդունվել է Երևանի քաղաքապետարանի կողմից և վերաբերում է միայն մայրաքաղաքին»:
Հիշեցնենք, որ Խարբերդի բնակիչը վարչապետին ուղղված նամակում մտահոգություն էր հայտնել, որ «սոցիալական այս ծանր պայմաններում նման որոշումը դրդում է բնակչությանը դադարել ընտանի կենդանիներ պահել՝ վնաս հասցնելով գյուղատնտեսության զարգացմանը»:
Երևան քաղաքում հաշվառված գյուղատնտեսական կենդանիների տվյալները 01.01.2015 թվականի դրությամբ՝ ըստ վարչական շրջանների տրամադրած տեղակտվության։
Երևան |
հ/հ |
համայնք |
կենդանու տեսակը |
|||||
խ.ե.կ |
մ.ե.կ. |
խոզեր |
թռչուններ |
ձի |
մեղուներ |
|||
1 |
Մալաթիա-Սեբաստիա |
339 |
0 |
76 |
620 |
0 |
0 |
|
2 |
Նուբարաշեն |
83 |
650 |
0 |
17 |
0 |
0 |
|
3 |
Դավիթաշեն |
11 |
0 |
521 |
2000 |
6 |
760 |
|
4 |
Շենգավիթ |
1956 |
4760 |
870 |
1949 |
2 |
0 |
|
5 |
Կենտրոն |
0 |
0 |
0 |
0 |
0 |
0 |
|
6 |
Արաբկիր |
29 |
20 |
200 |
3500 |
0 |
150 |
|
7 |
Նորք |
0 |
0 |
0 |
0 |
0 |
0 |
|
8 |
Ավան |
208 |
520 |
0 |
2000 |
0 |
0 |
|
9 |
Քանաքեռ-Զեյթուն |
0 |
0 |
0 |
0 |
0 |
0 |
|
10 |
Աջափնյակ |
338 |
300 |
1213 |
5100 |
4 |
5480 |
|
11 |
Էրեբունի |
526 |
270 |
3000 |
5000 |
6 |
4802 |
|
Ընդամենը |
3490 |
6520 |
5880 |
20186 |
18 |
11192 |
Նկատենք, որ խնդիրը իրոք առկա է՝ քաղաքամայր Երևանը այնքան ընդարձակ է սփռված, որ հասնում է Խարբերդ ու տարբեր շեներ։ Իսկ այնտեղ մարդիկ ապրում են ամենևին ոչ քաղաքային պայմաններում ու պայմաններով։ Մարդը փաստացի ապրում է ավանում, սեփական տանը, բակով, գյուղի կենցաղով, կարելի է ասել, բայց պահանջներն իրենից որպես քաղաքաբնակի են։
Միգուցե ժամանակն է գոնե այս հարցում երևանյան ձևականությունները թողնել ու այնպես անել, որ Երևանի վարչական տարածքը անպայմանորեն չհամընկնի ընտանի կենդանիներ պահելու թույլտվության, կամ տուգանքի հետ։
Մի տարածքում, որտեղ հանրապետության համարյա կես բնակչությունն է ապրում, ժամանակն է պահանջները դնել ըստ տրվող պայմանների ու խելամտության սահմաններում։
Հարակից հրապարակումներ`
- Բախշյանին զարմացրեց, որ հավի համար ևս տուրք են պահանջում
- Բաց նամակ վարչապետին. Նման որոշումը ստիպում է մարդկանց հույսը դնել միայն «Փարոս»-ի վրա
- Երևանցիներն ավելի շատ են սկսել ընտանի կենդանիների համար տուրք վճարել
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին