«Հերթական անգամ դատարանները թքեցին արդարադատության երեսին». Ավետիսյանի պաշտպանը նոր քայլերի կդիմի
«Հայաստանում դատավորները պատրաստ են կատարել ցանկացած անօրինություն, միայն թե դեմ չգնան դատախազությանը և իշխանությանը»,- այսօր լրագրողների հետ հանդիպման ժամանակ հայտարարեց ազատամարտիկ, պահեստազորի գնդապետ Վոլոդյա Ավետիսյանի պաշտպան, Փաստաբանների պալատի անդամ Արա Զաքարյանը:
Հիշեցնենք` Վոլոդյա Ավետիսյանը կալանքի տակ է դեռևս նախորդ տարվա սեպտեմբերի 20-ից: Երեկ Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում նիստի ժամանակ Արա Զաքարյանը միջնորդել էր փոխել իր պաշտպանյալի խափանման միջոցը, սակայն դատարանը մերժել էր փաստաբանի միջնորությունը:
Դատարանի այդ որոշումը դահլիճում ներկա ազատամարտիկների շրջանում բուռն էր ընդունվել, և նիստերի դահլիճը որոշ ժամանակով վերչածվել էր հանրահավաքային հրապարակի:
Կալանքի վերացման միջնորդությունը փաստաբան Արա Զաքարյանը բացատրում էր նրանով, որ վկաների ցուցմունքներն արդեն հրապարակվել են, հետևաբար նրան կալանքի տակ պահելու անհրաժեշտություն արդեն չկա:
«Երեկ դատավորին ինքնաբացարկ տալու միջնորդության հիմքում դրեցի այն հանգամանքը, որ բոլոր վկաներն արդեն ցուցմունք տվել են, ցավոք սրտի, մեր դատարանն իրեն պահեց այնպես, ինչպես կպահեր արդարադատություն իրականացնելու մի անընդունակ մարմին: Սակայն դատարանը միջնորդությունս մերժեց առանց որևէ հիմնավորման», -այսօր ասուլիսում հայտարարեց ազատամարտիկի պաշտպանը:
Բացի այդ որոշումից, դատավոր դատավոր Լևոն Ավետիսյանը հետաձգել էր փաստաբանի մեկ այլ միջնորդության քննարկումը, որը վերաբերում էր 4 վկաների ցուցմունքներն անթույլատրելի ապացույց ճանաչելուն և հայտարարել, որ միջնորդությանը անդրադարձ կլինի ապացույցների գնահատման փուլում:
Փաստաբանն այսօր հայտարարեց, որ պատրաստվում է դատավորին պատասխանատվության ենթարկելու հարց բարձրացնել Արդարադատության խորհրդում: «Հերթական անգամ դատարանները թքեցին արդարադատության երեսին», -հայտարարեց Զաքարյանը:
Նշենք, որ մեղադրական եզրակացության համաձայն, Վոլոդյա Ավետիսյանին մեղադրանք է առաջադրվել այն բանի համար, որ նա, հանդիսանալով պահեստազորի գնդապետ, «խարդախությամբ հափշտակություն կատարելու ուղղակի դիտավորությամբ, կաշառք ստանալու պատրվակով, չարաշահելով իր՝ որպես նախկին զինվորական ծառայողի նկատմամբ Երևան քաղաքի բնակիչ Ալբերտ Մաթոսյանի մոտ ձևավորված վստահությունը և դիմելով խաբեության, թե զինվորական բարձրաստիճան պաշտոնատար անձանց միջոցով կարող է կարգավորել ԼՂՀ պաշտպանության բանակի N զորամասում ժամկետային զինվորական ծառայության նշանակված Ալբերտ Մաթոսյանի որդի Արթուր Մաթոսյանին նույն զորամասում համակարգչային օպերատոր նշանակելու հարցը, սակայն չունենալով նման պայմանավորվածություն, 2013-ի հուլիսի 29-ին ժամը 14:00-ի սահմաններում Երևան քաղաքի Թումանյան 54 հասցեում գտնվող Ալեքսանդր Սպենդիարյանի անվան օպերայի և բալետի ազգային թատրոնի հարակից Ազատության հրապարակի տարածքում Ալբերտ Մաթոսյանից պահանջել է դրա դիմաց իրեն տրամադրել զգալի չափերի՝ 205.150 ՀՀ դրամին համարժեք 500 ԱՄՆ դոլար գումար»: Սակայն, ըստ մեղադրանքի, Ալբերտ Մաթոսյանը հրաժարվել է օգտվել Վոլոդյա Ավետիսյանի ծառայությունից:
Ավետիսյանի նկատմամբ մեղադրանքն առաջադրվել է միանգամից երկու հոդվածներով` ՀՀ քրեական օրենսգրքի 34-178-րդ հոդվածի 2-րդ մասի 5-րդ կետով և 178-րդ հոդվածի 2-րդ մասի 2,5 կետով:
Հարակից հրապարակումներ`
Արդեն յոթ ամիս է, որ իմ քաղաքական հայացքների համար բանտարկված եմ. Վոլոդյա Ավետիսյանի հայտարարությունը
Իմ նկատմամբ քաղաքական հետապնդում է իրականցվում. Վոլոդյա Ավետիսյանը մանրամասներ է ներկայացրել
Վոլոդյա Ավետիսյանի գործով առաջին դատական նիստը կկայանա մարտի 26-ին
Լրահոս
Տեսանյութեր
Ոստիկանները Բագրատ Սրբազանին և ԱԺ պատգամավորներին թույլ չեն տալիս մուտք գործել Կիրանց