Վարդան Պետրոսյանի գործով վերաքննիչ բողոքը պատրաստ է, բայց փաստաբանը դեռ չի ներկայացնում

Իրավունք 11:40 27/02/2015

Վարդան Պետրոսյանի գործով վերաքննիչ բողոքը պատրաստ է, բայց փաստաբանը դեռ չի ներկայացնում

Դերասան Վարդան Պետրոսյանի գործով տուժող կողմի փաստաբան Ռուբեն Բալոյանն արդեն պատրաստել է վերաքննիչ բողոքը, սակայն դեռ չի ներկայացրել: Վերջնաժամկետն է մարտի 2-ը: Panorama.am-ի հետ զրույցում նա ասաց, որ տուժող կողմի դիրքորոշման մեջ որևէ փոփոխություն չկա:

«Ես հնարավորություն ունեի դեռ տասն օր առաջ բողոքը ներկայացնել, սակայն դա չարեցի: Մտածում եմ՝ մարդ են, կարող է փորձեն ինչ-որ լուծում տալ խնդրին: Գոնե այդ հնարավորությունը ես տալիս եմ»,- ասաց փաստաբանը:

Հիշեցնենք, որ հունվարի 29-ին Կոտայքի մարզի ընդհանուր իրավասության առաջին ատյանի դատարանի վճռով Վարդան Պետրոսյանին մեղավոր է ճանաչվել ՀՀ քրեական օրենսգրքի 242-րդ հոդվածի 3-րդ մասով (Ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ) նախատեսված հանցագործության կատարման մեջ, նրա նկատմամբ պատիժ է նշանակել` ազատազրկում 5 տարի ժամկետով` տրանսպորտային միջոցներ վարելու իրավունքից զրկելով` 2տարի ժամկետով: Պատժի կրման սկիզբը հաշվել 2013թ. նոյեմբերի 6-ից: Բացի այս, դատավճռով տուժողների և տուժողների իրավահաջորդների ներկայացուցիչներ Ռ. Բալոյանի և Զ. Վարդանյանի կողմից ներկայացված քաղ. հայցը թողնվել է առանց քննության:

Նշենք, որ եթե տուժող կողմը վերաքննիչ բողոք չներկայացնի, Վարդան Պետրոսյանի նկատմամբ դատական ակտը ուժի մեջ մտնելուց հետո գործելու է բաց տիպի կալանքի ռեժիմը, այսինքն մարդն իր պատիժը կրում է ազատության մեջ. ՀՀ քրեակատարողական օրենսգրքի 100-րդ հոդվածի 2-րդ մասի 1-ին կետով՝ «անզգուշությամբ կատարած հանցագործության համար որոշակի ժամկետով ազատազրկման դատապարտվելու դեպքում՝ բաց ուղղիչ հիմնարկ»:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: