Ձեր վստահելի աղբյուրը

Հոկտեմբերի 11-ին կայացած աշխարհի 2018 թ. գավաթի խաղարկության Լեհաստան-Հայաստան խաղից հետո Վարշավայի «Ազգային» մարզադաշտի մամուլի ասուլիսների սրահում տեղի է ունեցել Հայաստանի ազգային հավաքականի գլխավոր մարզիչ Վարուժան Սուքիասյանի հանդիպումը ԶԼՄ-ների ներկայացուցիչների հետ: Այս մասին տեղեկացնում է ՀՖՖ պաշտոնական կայքը։

- Ռումինիայի ընտրանու հետ խաղից հետո թիմը կարծես վերածնված լիներ: Ինչի՞ հաշվին հաջողվեց վերականգնել թիմի խաղը:
- Բոլոր թիմերն էլ ունենում են վատ և լավ խաղեր: Այս տարվա անհաջողությունների շղթան մեզ շատ անհանգստացնում է: Գիտեք, որ հիմնական կազմի 7 ֆուտբոլիստներ վնասվածքներ ունեն, և տղաներն իրենց մեջ ուժ գտան՝ ծանր պարտությունից հետո հավաքվելու համար:
Մրցավարությունից կոռեկտ չէ խոսել, բայց ուզում եմ ասել ձեզ, նկատե՞լ եք, թե որ րոպեին գոլ խփեցին: Երկրորդը, որպես կանոն, եվրոպական մրցաշարերում մրցավարն սկզբից բանավոր զգուշացնում է, այնուհետև դեղին քարտ ցույց տալիս: Ամեն դեպքում՝ շնորհավորում եմ Լեհաստանի հավաքականին, շնորհակալություն եմ հայտնում տղաներին, այսօր տակտիկապես շատ գրագետ խաղացին, և կարծում եմ, որ եթե Օզբիլիսը, երկու անգամ մնալով դարպասապահի առջև մեն-մենակ, գոնե մեկ գոլ խփեր, ապա մենք կհաղթեինք:

- Կարմիր քարտը կարծես թե ոչինչ չփոխեց խաղի ընթացքում: Ի՞նչ ասացիք տղաներին, որ ավելի հաջող սկսեցին խաղալ։
- Ես տղաներին ասացի, որ նույն մոդելով է պետք խաղալ, որովհետև, ինչպես տեսաք, մենք Մարկոսին հետ քաշեցինք և կարողացանք փակել հենակետայինի դիրքը: Տարոն Ոսկանյանը ճիշտ կատարեց Գաել Անդոնյանի պարտականությունները: Ճիշտ է՝ հակառակորդը լավ պահեր ունեցավ, բայց ամեն դեպքում, հատկապես՝ այսօր, խաղալով 10 հոգով, մենք արժանի չէինք պարտության:

- Երկրորդ խաղն անընդմեջ Գաել Անդոնյանը անթույլատրելի սխալներ է անում: Ինչպե՞ս դա կմեկնաբանեք։
- Խաղը պետք է կրկին նայել, ամեն դեպքում՝ ժամանակ է պետք, որ քննարկենք դա:

- Երբ չհրավիրեցիք Կորյանին, Արշակյանին և Սարկիսովին, Ձեզ շատ քննադատեցին: Հաշվի առնելով այսօրվա հանդիպման ընթացքում ունեցած պահերը՝ չե՞ք կարծում, որ նրանց ներկայության դեպքում հաշիվը այլ կլիներ։
- Կորյանը հայտացուցակում էր: Այնպես ստացվեց, որ չէինք կարող հարձակվող օգտագործել, հույսը դրել էինք մեր եզրային կիսապաշտպանների վրա, որոնք պետք է իրացնեին հակագրոհները: Այդպես էլ եղավ, բայց արդյունքի չհասանք: Արշակյանը չարդարացրեց սպասելիքները, իսկ Սարկիսովն իմ տակտիկական մոդելին չի համապատասխանում։

- Ի՞նչ կասեք Ռոբերտ Լևանդովսկու խաղի մասին: Դանիայի ազգային թիմի դեմ խաղում նա երեք գոլ խփեց…
- Ինձ թվում է, որ ցանկացած մարզիչ կասի, որ Լևանդովսկին բարձրակարգ հարձակվող է, և ցանկացած հավաքական կուզենար նման հարձակվող ունենալ: Բացի վերջին գոլի դրվագից, կարող եմ ասել, որ մեր պաշտպաններին հաջողվեց չեզոքացնել նրան:

- Անցկացված խաղերից ո՞րն էր Ձեզ համար ամենադժվարը։
- Երեքն էլ դժվար էին, բայց վերջին երկուսը՝ առանձնապես, քանի որ խաղում էինք 10 հոգով: Ինձ թվում է՝ որոշակի ժամանակ հետո մեզ կհաջողվի ավելի լավ խաղալ:

- Ես հիշում եմ այն ժամանակները, երբ Հայաստանի հավաքականը Կոպենհագենում հաղթում էր 4:0 հաշվով: Ինչպե՞ս եք հիմա գնահատում հավաքականի վիճակը, և Ձեր կարծիքը խմբում տիրող իրավիճակի մասին։
- Իրավիճակը խմբում լարված է լինելու, այսօր Չեռնոգորիան կրկին միավորներ վաստակեց: Երբ մեր առաջատարները վերադառնան, մեզ հետ էլ դժվար կլինի խաղալ: Ինչ վերաբերում է նախկինում ունեցած հաջողություներին, ապա այն ժամանակ լավ կազմ ունեինք, բոլոր տղաները պատրաստ էին: Հիմա որոշ ֆուտբոլիստներ խաղային պրակտիկա չունեն իրենց թիմերում, ամեն դեպքում՝ աշխատում ենք, որ հետագայում լավ հավաքական ունենանք: