Ձեր վստահելի աղբյուրը

«Շենգավիթ» բժշկական կենտրոնի մանկաբարձության գծով փոխտնօրեն Աշոտ Սիրունյանը տեղյակ չի եղել, որ ծննդկան Մերի Մարգարյանի առողջական վիճակը լավ չի եղել, և նա հոսպիտալացվել է հուլիսի լույս 27-ի գիշերը ժամը 4-ին:

«Ես այդ մասին իմացել եմ միայն առավոտյան ժամը 10-ի կողմերը», -այսօր Շենգավիթ վարչական շրջանների ընդհանուր իրավասության դատարանում ծննդկան Մերի Մարգարյանի մահվան վերաբերյալ քրեական գործով նիստում պատասխանելով տուժող կողմի ներկայացուցիչ, փաստաբան Մարինե Թովմասյանի հարցերին ասաց Աշոտ Սիրունյանը:

Նրա ներկայացմամբ, ինքը առավոտյան ծանոթացել է բոլոր հետազոտությունների արդյունքներին, բայց նրա համար ուշադրության արժանի են եղել արյան միոքիմիական հետազոտության արդյունքները, որոնց համաձայն, լյարդի ֆերմենտները «շատ բարձր են եղել, դրանից էն կողմ էլ ո՞ւր»:

Հարցին, թե շուրջ 35 շաբաթական հղիություն ունեցող հղիի համար դա անհանգստացնո՞ղ է, Սիրունյանը պատասխանեց կարճ՝ «Միանշանակ»:

Հաջորդեց փաստաբանի մյուս հարցը. «Լյարդի ֆերմենտների նման բարձր լինելը արդյոք հիմք չէ՞ր, որ Մերի Մարգարյանը կեսարյան հատման ենթարկվեր»:

«Եթե մենք ցուցում չունենք հղիի և պտղի համար, իսկ նման ցուցում չկար: Եթե չկա ցուցում, հո միանգամից կեսարյան չե՞նք անի», -արձագանքեց Սիրունյանը:

Մանկաբարձության և գինեկոլոգիայի բաժանմունքի ղեկավարն ասաց նաև, որ Մերի Մարգարյանի մոտ այդ ժամանակ եղած հղիի սակավաջրությունը իրենց չի անհանգստացրել, քանի որ դա մեծ խնդիր չի եղել:

Տուժող կողմի ներկայացուցիչ փաստաբանը համառորեն փորձում էր հասկանալ՝ արդյոք սակավաջրությունը, լյարդի ֆերմենտների բարձրացումը, բիլիռուբինի տեղաշարժը հիմք կամ ցուցում չի՞ եղել, որ Մերիին ծննդալուծեին կեսարյան հատման միջոցով:

«Դրանք ցուցում չեն կեսարյան հատման համար: Պետք է պտղի կամ ծննդկանի կյանքին սպառնացող վտանգ լինի, որ ցուցում լինի կեսարյան հատման համար», -փաստաբանին արձագանքեց վկա Սիրունյանը:

Կեսարյան հատման անհրաժեշտության վերաբերյալ տուժողի ներկայացուցիչ, փաստաբան Մարինե Թովմասյանի մյուս հարցերին ի պատասխան Աշոտ Սիրունյանը հակադարձեց հարցով. «Ինչո՞ւ եք դուք մեզ անընդհատ դրդում, որ մենք կեսարյան հատում անեինք»:

«Որովհետև այսօր գոնե երեխան կենդանի կմնար», -Սիրունյանին արձագանքեց փաստաբան Թովմասյանը:

Այս երկխոսությունից հետո Մերիի մայրը չդիմացավ և արտասվելով հեռացավ դատարանի դահլիճից:

Պատասխանելով արդեն նիստը նախագահող դատավոր Դավիթ Բալայանի հարցերին, Սիրունյանն ասաց, որ «Շենգավիթ» ԲԿ-ի բժիշկները նեղ քննարկման արդյունքում ենթադրել են Մերի Մարգարյանի մոտ կա արյան զեղում, հետևաբար նրան պետք է տեղափոխել բազմապրոֆիլ բժշկական կենտրոն: Նա պատմեց, որ հեռախոսով խոսել է «Էրեբունի» բժշկական կենտրոնի ներկայացուցիչներ Պողոսյանի ու Ռոստոմյանի հետ, ինչից հետո հնարավոր է եղել Մերիի տեղափոխումը:

Դատավորը փորձեց հստակեցնել կեսարյան հատման անհրաժեշտություն կարո՞ղ էր առաջանալ, երբ նրա մոտ հաստատվեր արյան զեղման ախտորոշումը, Սիրունյանը դրական պատասխան տվեց:

Դատավոր Բալայանը դատավարության ընթացքում հնչած մտավախությունները բարձրացրեց և ասաց. «Մտահոգություններ կան, որ դուք կամ ավելի շատ Շուշանիկ Բախշյանը, Մերի Մարգարյանին տեղափոխել եք «Էրեբունի», որպեսզի նրանից ազատվեք ու պատասխանատվությունը գցեք ձեր վրայից»:

Ի պատասխան Սիրունյանն ասաց, որ դրանք «ֆանտազիաներ են»:

Այս գործով, հիշեցնենք, ամբաստանյալներ են «Շենգավիթ» բժշկական կենտրոնի մանկաբարձ-գինեկոլոգներ Շուշանիկ Բախշյանն ու Անի Բաբելյանը, որոնք մեղադրվում են հղի Մերի Մարգարյանին ոչ պատշաճ բուժօգնություն ցուցաբերելու համար (ՀՀ Քրեական օրենսգիրք 130-րդ հոդվածի 2-րդ մաս):