Սերժ Սարգսյան. Հայաստանում լիահույս են, որ ԵԱՏՄ-ն զարգացման մեծ հեռանկար ունի
Նախագահ Սերժ Սարգսյանը ՀԱՊԿ-ի կազմավորման 25 ամյակին ընդառաջ հարցազրույց է տվել ռուսական «Միր» հեռուստաընկերությանը՝ անդրադառնալով կազմակերպությանը Հայաստանի անդամակցությանը, միջազգային ահաբեկչությանը և դրա դեմ պայքարին, ինչպես նաև ամփոփել է ԵԱՏՄ-ում Հայաստանի անդամակցությունը:
«Ահաբեկչությունն այնպիսի չարիք է, որը կարող է հայտնվել ցանկացած վայրում: Այդ պատճառով միշտ պետք է զգոն լինել: Պետք է անընդհատ միջոցներ ձեռնարկել: Ես հիանալի հասկանում եմ, որ և՛ Լոնդոնում, և՛ Փարիզում շատ միջոցներ են ծախսվում անվտանգության համար, բայց ահաբեկչությունն իրականում հանցագործություն է, որն անհնար է կանխատեսել: Մի բան է, երբ կա տեսանելի թշնամի: Մեկ այլ բան, երբ փախստականների անվան տակ Եվրոպա կարող են ներթափանցել մարդիկ, որոնք բոլորովին այլ խնդիր ունեն: Դրա դեմ շատ դժվար է պայքարել»,- ասել է Սերժ Սարգսյանը՝ մեկնաբանելով տեղի ունեցող ահաբեկչական ակտերը:
Խոսելով ՀԱՊԿ-ին և մասնավորապես Հայաստանին սպառնացող հիմնական վտանգների մասին, Սերժ Սարգսյանն ասել է.
«Ժամանակակից աշխարհում սպառնալիքները և վտանգները ի հայտ են գալիս տարբեր եղանակներով: Անվտանգության սպառնալիքները բազմաշերտ են: Կոնկրետ մեզ համար սպառնալիք է մեր տարածաշրջանում ստեղծված իրավիճակը: Խոսքն Ադրբեջանի մասին է, որը ցանկանում է զենքի միջոցով լուծել Ղարաբաղյան հակամարտությունը: Մենք Լեռնային Ղարաբաղի բնակչության անվտանգության երաշխավորն ենք, այդ պատճառով մեզ համար առաջին սպառնալիքը, առաջին մարտահրավերը հենց դա է»:
Պատասխանելով հարցին, թե որն է ՀԱՊԿ-ի օգուտը կազմակերպության անդամ հանդիսացող պետությունների համար՝ նախագահ Սարգսյանը նշել է, որ Հավաքական անվտանգության պայմանագրի կազմակերպությունը ինչ-որ մեկի դեմ ուղղված չէ. «Պայմանագիրը ստորագրած պետությունները ելել են կազմակերպության գոտում անվտանգության ապահովման անհրաժեշտությունից, այդ իսկ պատճառով էլ այստեղ խոսքը մասնավոր օգուտի մասին չի կարող լինել, խոսքը հավաքական օգուտի մասին է, որը ձեռք է բերվում հավաքական ջանքերով: Մեր մոտեցումը հենց այդպիսին է և որքան արագ իրականանա ՀԱՊԿ-ի ադապտացիան արդի իրողություններին, այդքան լավ կլինի ՀԱՊԿ-ի անդամ բոլոր պետությունների համար»:
Անդրադառնալով ՀԱՊԿ-ում Հայաստանի դերին՝ նախագահ Սարգսյանը նշել է, որ Հայաստանն իր դերը տեսնում է կազմակերպության կողմից դրված պահանջները և պարտավորությունները կատարելու մեջ.
«Հայաստանը համարվում է ՀԱՊԿ հիմնադիր պետություններից մեկը և այս հանգամանքը Երևանի ուսերին լրացուցիչ պարտավորություններ է դնում: Մենք մեր դերը տեսնում ենք կազմակերպության կողմից դրված պահանջները և պարտավորությունները կատարելու մեջ: Որովհետև, ես կարծում եմ, որ դա առաջին գործն է, որ պետք է անեն կազմակերպության անդամ բոլոր երկրները, որոնք ցանկանում են, որ կազմակերպությունն ուժեղ լինի: Աշխարհը փոփոխվում է: 25 տարի առաջ, հավանաբար, ոչ ոք չէր մտածում, որ ահաբեկչությունն ընդհանրապես ի հայտ կգա ու այսքան մեծ մասշտաբների կհասնի: Դրա համար մեր կազմակերպությունը պետք է ադապտացվի, զարգանա: Անցած տարի Երևանում ՀԱՊԿ խորհրդի նիստի ժամանակ մենք ընդունել ենք հավաքական անվտանգության ռազմավարությունը մինչև 2025թ.: Կազմակերպությունում մեր նախագահության հենց սկզբից դա մեզ համար առաջնահերթություն էր, և մենք կարողացանք այն կյանքի կոչել: Այդ ռազմավարության մեջ հստակ մատնանշված են բոլոր ուղղություններով մեր կազմակերպության զարգացման հիմնական դրույթները: Ես կարծում եմ, որ թե Հայաստանի, թե մյուս հետաքրքրված անդամների համար կարևոր է ՀԱՊԿ-ի զարգացումը»:
Նախագահ Սերժ Սարգսյանը, անդրադառնալով հարցին, թե ՀԱՊԿ-ն հաճախ են համեմատում այլ կազմակերպությունների հետ, հետևաբար որն է ՀԱՊԿ-ի առանձնահատկությունը, նշել է, որ տեղին չէ համեմատականներ անցկացնելը, քանի որ ցանկացած կազմակերպություն ստեղծման պահից հետապնդում է իր նպատակները, իր առաջադրանքները և յուրաքանչյուր կազմակերպություն յուրովի է կայանում:
Խոսելով ԵԱՏՄ-ին Հայաստանի անդամակցության մասին, Սերժ Սարգսյանը նշել է, որ համաշխարհային տնտեսությունում արձանագրված բացասական երևույթները թեև Հայաստանի քաղաքացիների համար դժվարացրել են անմիջապես տեսնել ԵԱՏՄ-ին անդամակցության օգուտները, սակայն Հայաստանում լիահույս են, որ կազմակերպությունը զարգացման մեծ հեռանկար ունի:
Լրահոս
Տեսանյութեր
«Տավուշը հանուն հայրենիքի» շարժման անդամները քայլերթով գալու են Երևան. Բագրատ Սրբազան