Ձեր վստահելի աղբյուրը

«Մեզ համար ցավալի է, որ Ադրբեջանի խաղաղ բնակչության շրջանում կան զոհեր, բայց դրա ամբողջական պատասխանատվությունը կրում է ադրբեջանական կողմը»,- «Ապրիլյան երկրորդ օրը» ֆիլմի շնորհանդեսին լրագրողների հետ զրույցում ասաց ԱԺ ՀՀԿ խմբակցության անդամ Միհրան Հակոբյանը:

Նրա խոսքով, խաղաղ բնակելի վայրերում հրետանային, հրթիռային կայանների տեղակայումը միջազգային իրավունքի բոլոր բարոյական կանոնների, իրավական ակտերի բացահայտ խախտում է:

«Ադրբեջանի իշխանությունն իր երկրի խաղաղ բնակչությանը դարձրել է թիրախ հայկական կողմից պատասխան կրակի համար: Ադրբեջանի իշխանությունը ցանկանում է իրենց համար ձեռնտու իրավիճակ ստանալ, որպեսզի զոհ ունենան ու ներկայացնեն միջազգային հանրությանը»,- նշեց նա:

Հիշեցնենք, որ հակառակորդի նախահարձակ ակտիվությունը ճնշելու համար Արցախի ՊԲ առաջապահ զորամասերը հուլիսի 4-ին ժամը 20:31-20:40-ի սահմաններում ստիպված են եղել ձեռնարկել պատասխան գործողություններ, ինչի արդյունքում վնաս է հասցվել Ալխանլու գյուղում տեղակայված կրակակետին: Ըստ ադրբեջանական աղբյուրների, խաղաղ բնակիչներ են զոհվել, այդ թվում երկու տարեկան երեխա: 

Ֆիլմի հեղինակներից Մարինա Գրիգորյանն ասաց, որ Ադրբեջանը մի քանի նպատակ էր հետապնդում այդ սադրանքը կազմակերպելով. «Ուզում էր ուշադրությունը շեղել իր համար  վերջին ամիսների մի քանի սկանդալային հրապարակումներից, նաև ԵԽԽՎ-ում այն բացահայտումներից, որոնք շատ վտանգավոր են Ադրբեջանի համար, բուլղարական թերթում հրապարակումից, որտեղ փաստաթղթեր էին ներկայացվում, որ Ադրբեջանը զենք է մատակարարել այդ թվում «Իսլամական պետության» ահաբեկիչներին:

Սա առաջին դեպքը չէ, երբ Ադրբեջանը, անձամբ Ալիևը, փորձում են ուշադրությունը շեղել ամենաստոր ձևերով՝ օգտագործելով նաև երեխայի մահվան փաստը»:

Միաժամանակ Մ. Գրիգորյանը նշեց, որ այդ մահվան հանգամանքները դեռևս իր համար անձնապես պարզ չեն:

«Չգիտեմ՝ այդ երեխան սպանվել է արդյոք հայկական կողմի պատժիչ  միջոցառումների ներքո, թե այլ պատճառներ են եղել: Մի այլ հարց է, հույս ունեմ՝ հետագայում կպարզվի: Այդ տեսակետից ուղղակի անհրաժեշտ է, որպեսզի միջազգային անկախ որևէ ատյան անցկացանի անկախ, պրոֆեսիոնալ հետաքննություն՝ ինչ է կատարվել այդ գյուղում, ինչքանո՞վ են  հայկական կողմի պատժիչ գործողությունները բերել այդ արդյունքին, թե՞ այնտեղ ուրիշ բան է եղել»,- ասաց նա:

Նրա խոսքով, երեկ, այսօր հետևելով ադրբեջանական լրահոսին,  ուղղակի չես կարող չգալ եզրակացության, որ այդ ամենը նախօրոք պատրաստված էր. բոլոր միջոցառումները, երթերը, նամակները տարբեր ատյաններին, հարցազրույցները, մի քանի ժամվա ընթացքում պատրաստելն ուղղակի անհնար էր:

Մ. Գրիգորյանը նաև նշեց, որ Ադրբեջանը փորձում է ստեղծել քարոզչական, քաղաքական փուչիկ, որպեսզի հայերին մեղադրի հանցագործությունների մեջ, և այդ փուչիկը նրանք ստեղծում են հենց իրենց կողմից շահարկվող քաղաքական, անձնական շահերից ելնելով: 

«Նրանց համար մեկ է, թե ով կմահանա՝ երեխա է, կին, թե մեծահասակ: Ալիևը  հետապնդում է  իր կողմից իր անձնական, քաղաքական շահերը, այդ ճանապարհին չի խորշում օգտագործել ցանկացած մեթոդ, միջոց, այդ թվում երեխաների սպանությունները»,- ասաց նա:

Ֆիլմի հեղինակներից Լարիսա Ալավերդյանի խոսքով, ադրբեջանական քարոզչական, քաղաքական մեքենայի ձեռագիրը չի փոխվում:

«Երեխայի մահը մանրադրամ դարձնելն առաջին անգամ չէ: Պրիմիտիվ միջոցները մնում են նույնը, նպատակը՝ ստոր, խորշելի: Մեզ դա պետք է միայն ու միայն զգոն պահի, մղի ամենօրյա որակյալ, արդյունավետ աշխատանքի»,- ասաց նա:

Ֆիլմի շնորհանդեսին ներկա ԱԺ ՀՀԿ խմբակցության անդամ Արման Սաղաթելյանն ասաց, որ Ադրբեջանի վարքագիծը չի փոխվում Խոջալուից ի վեր:

«Բնակելի թաղամասերում տեղակայում էին հրետանի, ռմբակոծում Ստեփանակերտը: Հասկանալի չէր, որ  հայկական կողմի համար կյանքի հարց էր, որ պետք է ճնշեր կրակակետերը: Նույնը տեղի ունեցավ այս վերջին օրերին, նաև ապրիլին:

Ապրիլին ինչ էին արել, որը արձանագրել էր lifenews  գործակալության լրագրողը ու դարձրել ողջ աշխարհի սեփականությունը:  Նկարահանումներ էին անում զինված ուժերի և հատուկ ծառայությունների խիստ վերահսկողությամբ, նրանց թույլ չէին տալիս ինքնուրույն մի քայլ անել: Տարել էին կարծես թե հումանիտար աղետը ցույց տալու, որ տեսեք-տեսեք՝ հայերը ռմբակոծել են բնակելի թաղամասերը: Լրագրողներից մեկն իր մասնագիտական պարտականությունները կատարելու նպատակով մի կերպ դուրս էր պրծել իրենց վերահսկողությունից, բնակելի շենքի արանքում տեսել թրթուռավոր տեխնիկայի, հրետանու հետքեր, արձանագրել այդ փաստը: Դրա համար վտարեցին երկրից: Սա է իրենց քաղաքականությունը»,- նշեց նա:

Մանրամասները՝ տեսանյութում: