Ձեր վստահելի աղբյուրը

Երևանի կոնյակի գործարանի Բերդի մասնաճյուղում ավարտվել է խաղողի մթերման գործընթացը:  Panorama.am-ը խաղողի մթերման վերջին օրը հետևել է ամբողջ ընթացքին:

Երևանի կոնյակի գործարանի հետ համագործակցող յուրաքանչյուր խաղողագործ նախապես տեղեկացված է իր բերքի հանձնման օրվա, ժամի և քանակի մասին՝ մթերումը հստակ և ճշգրիտ կազմակերպելու համար:

Խաղողով բեռնված մեքենաները հերթով մտնում են «Բերդ»-ի մասնաճյուղի տարածք, անցնում են խաղողի որակի նախնական զննում, այնուհետև ուղևորվում կշռատուն, որտեղ մասնագետը ստուգում է շաքարայնության աստիճանը: Կոնյակի սպիրտ ստանալու համար խաղողի անհրաժեշտ նվազագույն շաքարայնությունը պետք է լինի 17 տոկոս: Շաքարայնության ստուգումից հետո վերցվում է որակի լրացուցիչ  փորձանմուշ, ինչից հետո միայն որակի պատասխանատուի վերահսկողությամբ, կատարվում է բեռնաթափումը:  Խաղողը մեքենայից բեռնաթափվում է բունկերի մեջ և բունկերում տեղադրված պոմպերի  օգնությամբ տեղափոխվում է դեպի  մամլիչներ, որտեղ խաղողը մամլվում է և վերածվում քաղցուի: Նշենք, որ խաղողի սորտերը մամլման ընթացքում չեն խառնվում միմյանց հետ և յուրաքանչյուր տեսակից ստացված քաղցուն հետագայում առանձին է ուղարկվում խմորման:

Ի դեպ ԵԿԳ Բերդի մասնաճյուղում, բացի մթերումից և խաղողի վերամշակումից, առկա են նաև գինենյութի պատրաստման, թորման և հնեցման արտադրամասեր: Գործարանն ամեն տարի վերազինվում է, նախորդ տարի ներդրվել է թվով չորրորդ՝ ֆրանսիական արտադրության օդամղիչ մամլիչը: Դրանցից յուրաքանչյուրը մամլում է 25 տոննա խաղող:

Երևանի կոնյակի գործարանի արտադրության տնօրեն Համլետ Անտոնյանի խոսքերով՝ այս տարի Բերդի մասնաճյուղում կմթերվի 3,5 հազար  տոննա խաղող, ինչը նախորդ տարվա համեմատ 1000 տոննայով ավելի է: Ընդհանուր առմամբ, այս տարի Երևանի կոնյակի գործարանը կմթերի 30 000 տոննա խաղող, ինչի համար տրամադրելու է մոտ 4 մլրդ դրամ:

Բերդի մասնաճյուղում, մթերման գինը 130 դրամ է 1 կգ-ի դիմաց: «Տավուշի մարզից ընդունում ենք այնքան խաղող, որքան առաջարկ կա: Այսինքն՝ սահմանամերձ գյուղերի բնակիչները, որքան խաղող աճեցնեն, գործարանը կմթերի, որպեսզի խաղողի ոչ մի հատիկ դաշտում չմնա և գյուղացին լրիվ վարձատրվի իր աշխատանքի համար: Մենք ամեն ինչ անում ենք, որ սահմանամերձ, սահմանապահ գյուղերի բնակիչները խնդիրներ չունենան»,- ասում է  Համլետ Անտոնյանը:

Շուրջ 850 պայմանագիր ունեն խաղողագործների և գյուղացիական տնտեսությունների հետ, վճարումները կատարում են բերքը հանձնելուց հետո` 10 բանկային օրերի ընթացքում, սակայն խաղողագործների հավաստմամբ՝ գումարները վճարվում են հանձնելուց երկու-երեք օր հետո:

Գյուղացիները գոհ են մթերման գործընթացից, ասում են, որ մինչ բուն մթերելը գործարանը աշխատում է տնտեսությունների հետ, տրամադրում են  խորհրդատվություն, իսկ գարնանից ստանում են բուժանյութեր՝ բերքատվության բարձրացման և բարձր որակի խաղող ստանալու նպատակով:

«Տավուշի խաղողը համային բացառիկ հատկանիշներ ունի: Որպեսզի պատկերացնեք՝ ասեմ, որ այս մասնաճյուղի արտադրած կրկնակի թորումով կոնյակի սպիրտի գրեթե 70 տոկոսը սուպեր պրեմիում կատերգորիայի են: Այստեղ սպիրտը կհնեցվի և կհասնի «Նաիրի» և ավելի բարձր տեսակի կոնյակի կատեգորիաների»,- նշում է Համլետ Անտոնյանը:

Կոնյակագործության հաջորդ փուլը թորումն է, որը կատարվում է երկու անգամ: Կոնյակի սպիրտներին հատուկ հմայք է հաղորդում «գոլորշային» մեթոդով թորումը:

ԵԿԳ-ի արտադրության տնօրենի խոսքերով՝  Երևանի կոնյակի գործարանում նոյեմբերի 1-ից սկսվում է թորումը, որը կավարտվի մարտի 30-ին:

Թորմանը հաջորդում է հնեցման գործընթացը: Երևանի կոնյակի գործարանում կոնյակի հնեցումը ամբողջովին կատարվում է  կաղնու փայտից պատրաստված տակառներում: 2002թ. գործարանը վերականգնել է իր սեփական տակառագործական արտադրամասը, որտեղ տակառները պատրաստվում են դասական տեխնոլոգիայի համաձայն և միայն կաղնեփայտից: Հնեցման ընթացքում ARARAT կոնյակների սպիրտները ձեռք են բերում իրենց անկրկնելի տեսքը՝ չորամրգերի, համեմունքների, վանիլի և շոկոլադի արտահայտիչ համով և բույրով:

Սպիրտի հնեցման ընթացքում, յուրաքանչյուր տակառի ծավալից տարեկան գոլորշիանում է մոտ 3 % սպիրտ: Կոնյակագործները, ըստ Համլետ Անտոնյանի, գոլորշիացող սպիրտը կորուստ չհամարելով, այն անվանում են «հրեշտակների բաժին»:

Կոնյակի հնեցմանը հաջորդում է կուպաժը, որը կոնյակագործության ամենաստեղծագործական փուլն է: Կուպաժի ընթացքում սպիրտների միախառնուրդին ավելացնում են ջուր: ԵԿԳ-ն կոնյակների համար օգտագործում է Կաթնաղբյուր բնական աղբյուրի ջուրը, որն ունակ է վերհանել խմիչքի համային հարստությունը: Այնուհետև պատրաստի կուպաժը կրկին ուղարկվում է կաղնեփայտե տակառներ՝ «հանգստանալու», որի ընթացքում սպիրտները ընտելանում են միմյանց և դառնում են կոնյակ: