Ձեր վստահելի աղբյուրը

«Կուտակային կենսաթոշակների հիմնադրամը դեռևս պետության համար բեռ է»,- այսօր ԱԺ-ում «ՀՀ 2018թ. պետական բյուջեի մասին» ՀՀ օրենքի նախագծի նախնական քննարկմանը նման կարծիք հայտնեց «Ելք» խմբակցության պատգամավոր Մանե Թանդիլյանը։

Պատգամավորը դիմելով աշխատանքի և սոցիալական հարցերի նախարար Արտեմ Ասատրյանին՝ ասաց. «Սոցիալական ծախսերը գրեթե բոլոր դրույթներով կրճատվել են, բացառությամբ կենսաթոշակային հիմնադրամին հատկացվող գումարների. այն աճել է 48 տոկոսով, որը ամբողջ պատկերը չի արտացոլում: Այս գումարը 42 մլրդ-ից վերածվելու է գրեթե կրկնակիի՝ 57 մլրդ-ի։ Սա այն բեռն է, որը պարբերաբար պետք է կրի նախարարությունը, և այն աճելու տենդենց ունի, այն չի նվազելու առաջիկա 20 տարում, որովհետև աշխատավարձն է աճելու»:

Թանդիլյանի խոսքով՝ տարեկան այդ 57 մլրդ-ը կազմում է միայն այս տարվա դեֆիցիտի մեկ- երրորդ մասը. «Այսինքն պարբերաբար այս բեռը պետք է կրենք, և սրա հաշվին նախարարության այլ ծախսեր կրճատվում են: Ուզում եմ հարցնել, թե 5 տարում այս տենդենցն աճելով՝ որտեղի՞ց եք այս գումարները հայթայթելու, որպեսզի կարողանաք կենսաթշակային ծախսերի տակից դուրս գալ»։

Արտեմ Ասատրյանը պատասխանեց, որ կուտակային համակարգի ներդրման հաշվարկները իրականացվել են՝ հաշվի առնելով օրենքի դրույթները, որ 2018թ-ի հունիսից շուրջ 50 հազարով պետք է ավելանա կուտակայինին միացած մասնակիցների թիվը և համապատասխան գումարներն ավելացած են. «Պետք է ուղղակի հաշվի առնել, որ դրա համար գումարները ոչ միայն բյուջեով հատկացումներն են, այլ կատարվող վճարումները»։

Ինչ վերաբերում է կուտակայինի արդյունավետությանը՝ նախարարն ասաց, որ ժամանակին ներկայացված բոլոր հաշվարկներով կանխատեսվել են, թե որոշակի կարճ ժամանակում ՀՆԱ-ի մեջ ինքն աճելու է, հետագայում սկսելու նվազել. «Բեռը՝ որպես այդպիսին պետք է  տարաբաշխել սերունդների միջև՝ այսօրվա կատարած վճարումների հաշվին, լրացուցիչ ներդրումների հաշվին՝ ապահովելով վաղվա կենսաթոշակառուին ավելի բարձր կամ ընդունելի կենսաթոշակ»։

«Ելք»-ի պատգամավոր Նիկոլ Փաշինյանն էլ դիմելով նախարարին՝ հետաքրքրվեց. «Եթե կենսաթոշակները, նպաստները, նվազագույն աշխատավարձը չենք բարձրացնում, մարդկանց ի՞նչ ուղերձ ենք հղում, չենք ասում արդյոք, որ ևս 10 տոկոսով պիտի վատ ապրեն։ Բյուջեի նախագծից ինձ համար հասկանալի չէ, թե կառավարությունն ի՞նչ կոնկրետ խնդիր ու ցուցանիշ է դնում աղքատության նվազման հետ կապված»։

Նախարարի պատասխանի համաձայն՝աղքատության վերացման վրա ամենամեծ ազեցությունը տնտեսական աճն է ունենում, սակայն մյուս կողմից դա չի նշանակում, որ սոցիալական պաշտպանվածության ծրագրերը չունեն ազդեցություն։

«Յուրաքանչյուր տարի, ըստ պաշտոնական տվյալների, կենսաթոշակառուների շրջանակում ուենցած աղքատության նվազեցում է արձանագրվում»,- ասաց Ասատրյանը։

Պատգամավորն առաջարկեց վերանայել քաղաքականությունը, ավելացնել առաջին և երկրորդ երեխաների ծննդյան միանվագ նպաստները՝ 50 հազարից դարձնելով 500 հազար՝ պնդելով, որ ցուցանիշները ցույց են տալիս՝ թեև ծնելիությունը նվազում է, բայց երրորդ, չորրորդ և հինգերորդ երեխաների ծննդյան թիվն ավելանում է, ինչը, հավանաբար, պայմանավորված է միանվագ նպաստի չափով, որը 1 մլրդ և ավելի է։

Արտեմ Ասատրյանն ասաց, որ միանվագ նպաստի ավելացում չի ակնկալվում. «Նպաստների համար նախատեսված 10 մլրդից միայն 71 տոկոսը հատկացվում են երրորդ և ավելի երեխաներ ունեցող ընտանիքներին»։