Ու հիմա մենք լուրջ խնդիր ունենք. Հովիկ Չարխչյան
Պարոն Չարխչյան: Շատ անգամ Ձեզ ենք դիմում, երբ փնտրում ենք իրավիճակի սրտացավ, օբյեկտիվ, խորը գնահատական: Չգիտեմ՝ նկատել եք, թե չէ, կամ՝ կհամաձայնեք, թե չէ, բայց հասարակությունում քաղաքական ընդհարումները նույն կերպ փոխանցվում են քաղաքականության հետ կապ չունեցող, կամ՝ ուղղակիորեն կապ չունեցող ոլորտներ:
Այժմ այնպիսի իրավիճակ է, երբ ցանկացած քննադատություն դիտվում է որպես հեղափոխության ուղիղ քննադատություն, ու սկսվում է հասարակության մի կոնստանտ մասի հակահարվածը՝ անկախ նրանից, թե քննադատականը ճիշտ է, թե ոչ:
Խոսքս Զորաց քարերի մասին է: Ֆեյսբուքում առաջին ընդհարումը եղավ, երբ սյունեցիները բողոքի ալիք բարձրացրեցին, թե՝ ներկվում են քարերը: Ընդդիմադիրները բարկացան, թե՝ արդեն մաքրվել է: Այնուհետև սյունեցիները նկարներ դրեցին, որ պեղումները հենց Զորաց քարերում են ու որ իրենք խիստ անհանգստացած են պեղումների կոպիտ որակից ու միջամտությունից:
Նորից հակադրության ալիք բարձրացավ, թե՝ մի նկարը հին է: Լավ, մի նկարը հին է, բայց ոչ ոք չխորացավ բուն նյութի մեջ, որ՝ մյուսները նոր են: Պեղումն իրականացնողները սկսեցին իրենց տրված հարցերին խուսափողական պատասխանել, թե՝ պեղումները մի 100 մետր այն կողմ են: Այդ դեպքում անհասկանալի էր, թե ինչու են պեղումները անում ուրիշ վայրում, բայց կասկածի տակ են դնում Զորաց քարերի նշանակությունը: Դա գիտնականների համար առնվազն սեփական կնոջը հարևանի կնոջ հետ խառնել է նշանակում:
Հիմա վերջապես խոստովանեցին, որ՝ այո, պեղումները կատարվում են հենց Զորաց քարերում: Մի՞թե հնարավոր չէր հասարակությանը հենց սկզբից ճիշտն ասել, բացատրել, պատասխանատվություն վերցնել… Հիմա ուղղակի ՊՈԱԿ-ի տնօրեն Արա Թարվերդյանը Ա. Եղյանին զգուշացրել է. «Քեզ վրա շատ մեծ պատասխանատվություն է դրվում, չլինի սրանից հետո գան ու ասեն, որ տուրիստը բարձրացել է հուշարձանի վրա: Պետք է ծանոթանաս բոլոր ենթահուշարձաններին, պահպանության հետ կապված ամենաշատը քեզանից եմ պահանջելու: Հետևաբար եթե մի քար վնասվի դու պետք է պատասխան տաս»:
Բայց դե՝ փորձ ունենք, ոնց չանհանգստանանք. «Հին Երևան», «Փակ շուկա», Աֆրիկյանների ակումբ, Աբաս Միրզայի մզկիթ…:
Ինչպես եք դուք տեսնում իրավիճակը՝ մեզ շատ հետաքրքիր է Ձեր կարծիքը:
Գրականագետ Հովիկ Չարխչյանը ներկայացրեց իր կարծիքը.
«Ցանկացած երկրում, ցանկացած իրավիճակում հասարակության գերքաղաքականացումն իր ետևից ավերածություններ է թողնում: Մենք այս իմաստով, ցավոք, բացառություն չկազմեցինք: Այսօր ներքին բևեռացումը շատ դեպքերում ձեռք է բերում ագրեսիվ որակներ, ընդդիմախոսներին ոչնչացնելու հիվանդագին մոլուցք, նպատակին հասնելու համար միջոցների մեջ ընտրություն չկատարելու հանցավոր հետևողականություն: Ու եթե նույնիսկ ընդունենք, որ հեղափոխական իրավիճակներում գրեթե անհնար է խուսափել առճակատումներից, ամեն դեպքում չենք կարող նաև չարձանագրել, որ հակազդեցությունը ոչ միշտ է ազնիվ և ոչ միշտ են ընտրվում ճիշտ թիրախներ:
Արդյունքում, ինչպես ժողովուրդն է ասում, թացն էլ այրվում է չորի հետ: Վարկաբեկվում, անվանարկվում են պատվարժան մարդիկ, ովքեր այս երկրի ու ժողովրդի առաջ նշանակալի ավանդ ունեն: Եվ նրանց միակ «մեղքն» այն է, որ որոշակի հարցերի շուրջ պաշտպանում են այլ տեսակետ և իրենց սկզբունքների մեջ փոփոխական չեն: Մերկապարանոց, չհիմնվորված, մտացածին մեղադրանքներ են նետվում հրապարակ և ոչ ոք չի մտահոգվում, թե որն է ճշմարությունը:
Առաջնային նպատակ է դառնում ամեն գնով չեզոքացնել այլակարծությունը, հոգեբանորեն ճնշել նրանց, ովքեր չեն կիսում մյուսների կարծիքը: Նման երևույթներն, ինչ խոսք, չեն կարող ստվեր չնետել հեղափոխության որդեգրած արժեքների վրա: Այդ իսկ պատճառով էլ բոլոր այն մարդիկ, ովքեր սթափ մտածությամբ են օժտված, ահազանգում, տագնապ են հնչեցնում ձևավորվող մթնոլորտի առնչությամբ: Այլապես ի՞նչ արժե սիրո ու հանդուրժողականության մասին կարգախոսը, եթե շրջապատում ոչ սեր ես տեսնում, ոչ էլ առավել ևս` հանդուրժողականություն: Հայտնի բան է, որ մեծ ալիքներն իրեն հետ բերում են նաև շատ փրփուր և շատ աղբ: Ու հիմա մենք լուրջ խնդիր ունենք` ձերբազատվել հեղափոխության վերափոխիչ հորձանքի հետ ներթափանցած ավելորդություններից, մաքրաջրել, զուլալեցնել, հանդարտեցնել տարերքը, կյանքը տեղափոխել բնականոն հուն: Իսկ եթե իրոք ուզում ենք մաքրել մեր երկիրը աղտեղությունից, դա պիտի անել մաքուր ձեռքերով ու մաքուր խղճով: Ուրիշ ճանապարհ չկա, քանի որ հակառակ դեպքում կասկածի տակ կդրվի ողջ գործընթացի բարեհաջող ելքը: Հեղափոխությունը պիտի ինքնամաքրվի: Պիտի մերժվի սևերի ու սպիտակների բաժանելու հանցավոր մտայնությունը, որը պառակտումների սերմ է բերում: Պիտի փակվեն զազրախոսների բերանները: Պիտի սանձվեն բոլոր նրանք, ովքեր պատեհապաշտության դիրքերից հաշվեհարդար են տեսնում մյուսների հետ և դա մատուցում են իբրև պայքար նոր Հայաստանի համար: Պետք է վերջ տրվի ոհմակային մտածողությանը: Չէ՞ որ մարդիկ հենց դրա դեմ ոտքի կանգնեցին»:
Հարակից հրապարակումներ`
- Զորաց քարերի պեղումներին պետք է մասնակցեն այլ մասնագետներ ևս. Գ.Բրուտյան
- Փրկենք Քարահունջը պեղումների՞ց, թե՞ պրովոկացիաներից
- Նախարարի շտապողականությունը միայն ծիծաղ է հարուցում. Գրականագետ
- «Հին Երևան» նախագիծը մեր օրերի ամենամեծ սխալն է. Մկրտիչ Մինասյան
- «Զորաց քարեր»-ում աստղադիտարանի ոչ խողովակն ենք գտել, ոչ գործիքները. Աշոտ Փիլիպոսյան
- «Զորաց քարեր»-ում վերսկսվել են պեղումները
- «Փակ շուկայի» մասին մշակույթի նախարարի այսօրվա պատասխանը նախորդից վատն էր
- Մշակույթի նախարար. «Փակ շուկան» ներառված չէր ցանկում
- Հին Երևան, թե «Հին Երևան». Ճարտարապետ Ժորժ Շեխլյան
- Հին Երևան, թե «Հին Երևան». Ճարտարապետ Անահիտ Թարխանյան
- Հին Երևան, թե «Հին Երևան». Արվեստագետ Ռուբեն Բաբայան
- Հին Երևան, թե «Հին Երևան». Արվեստաբան Ռուբեն Արևշատյան
- Հին Երևան, թե «Հին Երևան». Գրականագետ Հովիկ Չարխչյան
- «Ինչո՞վ է Օպերան ավելի կարևոր, քան Փակ շուկան»
- Չպահպանված հուշարձաններ. Աբաս միրզայի մզկիթի պատն այլևս մատաղ է արված
- «Աֆրիկյանների շենքը փրկելու տարբերակ չկար»
- Աֆրիկյանների շենքի հարցով դատարանի պատասխանը դեռ չի ստացվել
- «Աֆրիկյանների ակումբից» մնաց փոշին ու աղբը. Լուսանկարներ
- Աճառյանի դպրոց. Առայժմ այնպես է, ինչպես Փակ շուկայի դեպքում
- Մշակույթի նախարարությունն արձագանքել է ՄԻՊ-ի՝ Փակ շուկայի խնդրին վերաբերող մեղադրանքին
- Սամվել Ալեքսանյանը «Փակ շուկան» չմաքրեց առնետներից
- Քարմեջ արված Հին Երևան
- Ովքեր չեն ասում ու ովքեր են ասում ամբողջ ճշմարտությունը Փակ շուկայի մասին- մաս 2
- Ովքեր չեն ասում ու ովքեր են ասում ամբողջ ճշմարտությունը Փակ շուկայի մասին- մաս 1
- «Հուշարձանը չի քանդվելու- ով ա կասկածում»... Փակ շուկա (տեսանյութ)
- Գարեգին Եղոյան. Այսպես, ի վերջո, Երևանը կդառնա… «բուխանկա»
Լրահոս
Տեսանյութեր
«Տավուշը հանուն հայրենիքի» շարժման անդամները քայլերթով գալու են Երևան. Բագրատ Սրբազան