Ձեր վստահելի աղբյուրը

Երևանի ավագանու «Իմ քայլը» դաշինքի խմբակցության 3 անդամ մանդատից հրաժարվելու մասին դիմում է ներկայացրել: Նրանք են՝ վարչապետի խորհրդական Սրբուհի Ղազարյանը, վարչապետի հասարակական հիմունքներով խորհրդական Նիկոլայ Բաղդասարյանը և Տրդատ Սարգսյանը, որն ավագանու մանդատից հրաժարվել է Վայոց ձորի մարզպետ նշանակվելու պատճառով:

Ավագանու անդամությունից հրաժարվելու պատճառների մասին Panorama.am-ի թղթակիցը խոսեց վարչապետի խորհրդական Նիկոլայ Բաղդասարյանի հետ։

Նա նշեց, որ իր՝ ավագանու անդամի մանդատից հրաժարվելու վերաբերյալ դիմում հասցեագրված է Երևանի նորընտիր քաղաքապետին։ Նիկոլայ Բաղդասարանի  և մյուսների հրաժարականի մասին կհայտարարվի նոյեմբեր ամսին կայանալիք ավագանու նիստի ժամանակ։

Իսկ թե որոնք են իր հրաժարականի պատճառները, վարչապետի խորհրդականն ասաց.

«Իրականում այնքան հաջող թիմ է ձևավորվել, որ անգամ իմ կարիքը չի զգացվելու։ Ես, դուրս գալով, կպահպանեմ իմ հարաբերությունները, որպեսզի իրենց աջակցեմ իրավական հարցերում։  Բացի այդ՝ կպաշտպանեմ կառավարությունում իմ ունեցած հաստիքը. երկու աշխատանքները համատեղելը մի քիչ բարդ կլիներ»։

Նիկոլայ Բաղդասարյանը միաժամանակ նշեց, որ իր տեղեկություններով, հրաժարականի դիմում իրենցից բացի ներկայացրել են ևս երկու հոգի։ Նա, սակայն կոնկրետ անուններ նշել չկարողացավ։

Ճշգրտելու՝ ովքե՞ր են մյուս երկու թեկնածուները, զանգահարեցինք «Քաղաքացիական պայմանագիր» կուսակցության մամուլի քարտուղար Վահան Կոստանյանին, սակայն նա հեռախոսազանգերին չպատասխանեց։ Երևանու ավագանու «Ելք» խմբակցություն զանգերը ևս անպատասխան մնացին։