Ծառուկյան. Պետք է քայլեր արվեին, որ մարդիկ ներգաղթի ժամանակ բնակվելու տեղ ունենային
«Օրենքի առաջ բոլորը հավասար են։ Իրավապահները թող գործերը քննեն»,- այսօր խորհրդարանում լրագրողների հետ զրույցում ասաց ԱԺ «Բարգավաճ Հայաստան» խմբակցության ղեկավար Գագիկ Ծառուկյանն՝ անդրադառնալով Աբովյանի քաղաքապետ Վահագն Գևորգյանի դեմ հարուցված դատական գործին։
Հիշեցնենք, որ Աբովյանի քաղաքապետ Վահագն Գևորգյանը որպես մեղադրյալ է ներգարվվել Քրեական օրենսգրքի 315.2 հոդվածով (պետական կամ համայնքային սեփականություն հանդիսացող հողամասերի ինքնակամ զավթումը, ինչպես նաև շենքերի և շինությունների ինքնակամ կառուցումը կասեցնելու, կանխարգելելու ուղղությամբ օրենքով սահմանված կարգով միջոցներ չձեռնարկելը) նախատեսված առերևույթ հանցավոր արարքները կատարելու համար և նրան առաջադրվել է համապատասխան մեղադրանք։
Ծառուկյանը նշեց, որ բոլոր հողատարածքների տերերի հետ պայմանավորվածություն եղել է, և ինքը 4-ի փոխարեն արդեն 20 շենք է կառուցել։
«Քանի որ եղել էր հեղափոխություն, պետք է քայլեր արվեին, որ մարդիկ ներգաղթի ժամանակ բնակվելու տեղ ունենային։ Ես ինքս առաջին քայլն արել եմ, որ պայմաններ լինեն։ Հիմա պրոբլեմներ են սարքում, մեղքը իրենց վիզը։ Ես որպես մարդ իմ խոսքի տեր եմ եղել։ Այսօր ողջ պետությունը չի կարողացել 6 ամսվա մեջ 20 բարձրահարկ շենք կառուցել։ Ես սարքել եմ, գներն էլ ասել եմ։ Հիմա պիտի ասեն ապօրինի են էդ շինությունները, քանի որ 20 սմ դուրս են եկել։ Եթե պետք ա, ես կկանգնացնեմ շինարարությունը, ես այդպիսի խնդիր չունեմ»,- ասաց Ծառուկյանը։
Հարցին՝ արդյոք նա աջակցելու է Վահագն Գևորգյանին, ԲՀԿ ղեկավարը նշեց՝ օրենքի շրջանակում ոչ ոք չի կարող որևէ մեկին աջակցել. «Գնում է քննություն, մեղավորները պատժվում են, անմեղներն էլ՝ արդարացվում»։
Անդրադառնալով սահմանադրական փոփոխությունների հանրաքվեին՝ Ծառուկյանն ասաց, որ արդեն իրենց քաղաքական դիրքորոշումը հայտնել են՝ «Բարգավաճ Հայաստանը» չի մասնակցելու ընտրական գործընթացին։ Սակայն, ԲՀԿ ղեկավարի խոսքով, իրենց համակիրներն ազատ են և կարող են քվեարկությանը մասնակցել, իսկ հանձնաժողովներում կուսակցության կողմից լիցենզավորված մարդիկ չեն լինի։
Հարցին՝ ինչպես է Ծառուկյանը գնահատում կորոնավիրուսի դեմ կառավարության պայքարը, Ծառուկյանը պատասխանեց՝ անկեղծ ասած, շատ վատ.
«Արդեն մեկ ամիս է՝ կորոնավիրուսը աշխարհով մեկ տարածվում է, ընդլայնվում է, արդեն 1 ամիս առաջ պետք է հիվանդանոցներին, դեղատներին հանձնարարություն լիներ՝ անպայման ապահովված լինել գրիպի վիրուսի դեմ միջոցներով և մասկաներով։
Չգիտեմ, մի ամիս հետո խնդիրը չոքել է մեր դեմ՝ մասկա չկա, դեղորայք չկա։ Սեփականատերերը պարտավոր էին 1 ամիս առաջ հրահանգ ստացած լինեին՝ ամեն գնով մասկաներ ձեռք բերել ու ապահովել մարդկանց»։
Հարցին՝ անձամբ ինքը գտե՞լ է բժշկական դիմակ, Ծառուկյանը կատակեց՝ «Ծառուկյանը դրա կարիքը չունի, բարի մարդկանց էդ հիվանդությունը չի կպնում»։։
«Պարսկաստանից եկել են մեր հայրենակիցները, իհարկե նրանց պետք է ընդունեինք, բայց բոլորս էլ գիտեինք, որ կորոնավիրուսի համար կարանտինը 2 շաբաթ է, պարտադիր պետք է գալուց անմիջապես հետո 2 շաբաթով նրանց մեկուսացնին։ Դա էլ հո տնտեսություն չի, որ չհասկանան, հասարակ բան է, պետք է լիարժեք օգտագործեն բժշկական մեթոդներն ու տերմինները։ Թե չէ անընդհատ ուզում են արդարանալ»,- ասաց Ծառուկյանը։
Նա նշեց, որ շատ վատ է վերաբերում փաստին, որ կորոնավիրուսով վարակված լինելու մեջ կասկածվող քաղաքացիներին տեղափոխել են Ծաղկաձոր. «Ամբողջ տուրիստական կամպանիաները դատարկվել են։ Հյուրանոցներն ու ռեստորանները դատարկվել են»։
Հարակից հրապարակումներ`
Լրահոս
Տեսանյութեր
Մելքոնյան. Եկեղեցու, սրբազանների ակտիվացումը ցույց է տալիս, որ գտնվում ենք խորը ճգնաժամի մեջ