Ձեր վստահելի աղբյուրը

«Եթե կան բնապահապական այնպիսի վտանգներ, որոնք կառավարելի չեն, չի աշխատելու հանքը, իսկ եթե կան երաշխիքներ, որ այդ բնապահպանական ռիսկերը կառավարելի են, պետք է աշխատի հանքը»,- ասաց վարչապետ Նիկոլ Փաշինյանը՝ Ամուլսար տանող ճանապարհը փակած քաղաքացիների հետ հանդիպմանը:

«Մենք չենք թողնելու աշխատի, թող գան մեր վրով անցնեն»,- արձագանքեց ներկաներից մեկը:

«Ձեր վրով անցնելու լինեին, հազար անգամ կանցնեին: Չեք թողնելու, մի թողեք, ձեր ցավն էլ տանեմ: Չեք թողնում էլի, էլ ինձնից ինչ եք ուզում»,- ասաց վարչապետը: 

Նրա խոսքով, եթե պետք է Ամուլսարը սար մնա, կմնա, եթե պետք չի որ մնա, չի մնա, իսկ պետքն ու պետք չի-ն էլ կորոշվի միայն փաստարկների հիման վրա:

«Ես ձեզ հետ բանավեճ չունեմ: Ես ունեմ մի հարց. իմ պատասխանատվությունն է և ես պետք է կրեմ այդ պատասխանատվությունը, պետք է մինչև վերջ խորանամ ու հասկանում՝ ինչ է կատարվում»,- ասաց վարչապետը:

Ներկաներից մեկը ցույց տվեց, թե որտեղ է գտնվում սարը՝ նշելով. «Ո՞նց կարող է այնտեղ հանքարդյունաբերությունն աշխատի, մենք այստեղ ապրենք: Որպես հայ մարդ՝ ո՞նց եք պատկերացնում այդ երկու սարը, որ մինչև վերջ  քանդեն, այստեղ մարդ կարո՞ղ է ապրի»:

Վարչապետ Փաշինյանը պատասխանեց. «Ես էլ ուզում եմ այդ հարցի պատասխանը ստանամ: Ես չեմ պատկերացնում: Մասնագիտությամբ լրագրող մարդ եմ, որպեսզի հասկանամ իմ պատկերացումները ճիշտ են թե սխալ, ինձ պետք է մասնագիտական վստահելի եզրակացություն:
«Էլարդի» հետ էլ եմ խոսել, «Լիդիանի»  հետ էլ, իրար դեմ նստացրել, խոսացրել ենք: Ասենք, որ «Էլարդի» ասածները փաստարկված չեն, սխալ է,  բայց ասել, որ «Լիդիանի» ասածները փաստարկված չեն, էլի սխալ է: Այն ռիսկերը, որոնք ներկայացրել է «Էլարդը», «Լիդիանն» ասում է, որ «Էլարդի» ասածի մեջ նորություն չկա, իրենք էլ այդ ամեն ինչը կանխատեսել են, պլանավորել են ռիսկերը կանխատեսել 1,2,3,4 քայլերով:

Կներեք, չնեղանաք, բայց ձեր արած գործողության արդյունավետությունը զրո է: Ինչո՞ւ, որովհետև եթե դուք  այստեղ էլ չկանգնեիք, այնտեղ այսօրվա դրությամբ ոչ մի բան փոխված չէր լինի»:

Ներկաներից մեկն ասաց. «Ձեր տունը հեռու է, դրա համար այդպես է…»:

«Եթե մտածում եք, որ ես այդպիսի մարդ եմ՝ վայ իմ տունը հեռու է, թող ջերմուկցու տունը քանդվի, ինձ հետ խի էք վաապշե խոսում, խի եք թողնում ընդհանրապես մտնեմ  ձեր քաղաք»,- զայրացած արձագանքեց Նիկոլ Փաշինյանը:

Երբ  Նիկոլ Փաշինյանը  հեռանում էր, հավաքվածները կրկին ասում էին՝ «չենք էլ թողնելու, թող ոչ մեկ էլ չմտնի Ջերմուկ, եթե այդպես է, այդպես է»: