Ձեր վստահելի աղբյուրը

«Այս գործը, որ քննվում է դատարանում, չի վերաբերում ոչ սպանություններին, ոչ մարմնական վնասվածքներին և ոչ էլ գույքային վնասին։ Հենց այս հիմնավորումներով մենք միջնորդել էինք, որ դադարեցվի տուժողների իրավահաջորդների ու նրանց ներկայացուցիչների մասնակցությունը այս դատական գործին այդ կարգավիճակով»,- հայտարարեց ՀՀ երկրորդ նախագահ Ռոբերտ Քոչարյանի փաստաբան Հայկ Ալումյանը լրագրողների հետ հանդիպմանը՝ անդրադառնալով երեկվա դատական նիստում իր միջնորդության քննարկմանն ու արդյունքում կայացված որոշմանը։

Փաստաբանն առաջարկել էր, որ տուժողի իրավահաջորդները, նրանց ներկայացուցիչները  սահմանադրական կարգի ենթադրյալ տապալման գործով հանդես գան վկայի կարգավիճակով, քանի որ նրանց հայտնած տեղեկությունները կարող են կարևոր նշանակություն ունենալ։

Ալումյանը հիշեցրեց, որ օգոստոսի 4-ի նիստում ներկայացված միջնորդության քննարկումը ընդհատվեց, քանի որ Տիգրան Եգորյանը նիստի երկրորդ մասին չէր ներկայացել։

«Դատարանն անհրաժեշտ համարեց նրա կարծիքը լսել, և նիստը հետաձգվեց պարոն Եգորյանի չգալու ու դատարանի այն փաստարկի պատճառով, որ առանց նրա այդ հարցը չպետք է քննարկվի»,-ասաց նա՝ հիշեցնելով, որ երեկվա նիստին Եգորյանը չեկավ, մինչդեռ դատարանը որոշում կայացրեց։

ՀՀ երկրորդ նախագահի փաստաբանն ընդգծեց, որ մարտի 1-ի սպանությունների ու մարմնական վնասվածքների վերաբերյալ գործը քննվում է Հատուկ քննչական ծառայությունում, և հենց այդ գործով պետք է տուժողները ներկայացնեն իրենց պահանջները ու ունենան տուժողի իրավահաջորդի կարգավիճակը։

«Պետք է բոլորս հույս ունենանք, որ հենց այդ գործով են բացահայտվելու սպանություն կատարած անձինք, նրանց հրահանգ տված անձինք, մարդկանց մարմնական վնասվածք պատճառած անձինք։ Բայց ոչ այս գործով, քանի որ, կրկնեմ, այս գործը չի քննում ոչ սպանությունները, ոչ մարմնական վնասվածքներ ստանալու դեպքերը»,- ասաց նա։

Անդրադառնալով սահմանադրական կարգի ենթադրյալ տապալման գործով մեղադրող կողմի՝ միջնորդության վերաբերյալ հնչեցրած առարկություններին, որոնց համաձայն ՀՔԾ-ում քննվող գործով տուժողի դատավարական կարգավիճակ ունեցող անձինք կարգավիճակը պահպանում են նաև առանձնացված մասով, Ալումյանը նկատեց՝ այդ դեպքում ինչո՞ւ եք 268 տտուժողից ընդամենը 102 հոգու առանձնացրել ու այդ գործում նրանց ներգրավել, որո՞նք են այդ ընտրության չափանիշները։

«Միգուցե դուք ընտրության հիմք եք ընդունել այն փաստը, որ այդ մարդիկ պատրաստ են մարտի մեկի իրադարձությունների ամբողջ մեղքը բարդել պարոն Ռոբերտ Քոչարյանի վրա։ Միգուցե դա է ձեր չափանիշը, եթե ոչ, ապա բացատրեք, թե որն է ձեր չափանիշը։ Ինչո՞ւ 268 անձանցից դուք 102-ին եք ընդգրկել դատական նիստին կանչման ենթակա անձանց ցուցակում, իսկ 126-ին չեք ընդգրկել։  Միգուցե այն մարդկանց մարմնական վնասվածքները տարբերվում են այդ անձանց մարմնական վնասվածքներից։ Նայում ենք փորձագիտական եզրակացությունները, տեսնում ենք՝ տարբերություն չկա։ Չափանիշը ո՞րն է»,- ասաց պաշտպանը։

Ալումյանը հիշեցրեց՝ այս հարցերը երեկ բարձրացրել են դատավոր Աննա Դանիբեկյանի նախագահությամբ տեղի ունեցած նիստում, բայց փաստաբանի տպավարությամբ, դատավորն ամբողջությամբ հանդես է եկել մեղադրողների կողմից։

«Այնպիսի հստակ տպավորություն կա, որ դատախազներն այս գործով քննարկվող հարցերի վերաբերյալ ունեն վետոյի իրավունք։ Այսինքն, եթե նրանք առարկում են որևէ միջնորդության դեմ, ապա այդ առարկությունը դատարանը դիտում է որպես վետո, որից հետո անընդունակ է որևէ այլ որոշում կայացնել, քան այն, ինչ նսիտի ժամանակ հայտարարել են դատախազները։ Ահա այս մթնոլորտում է տեղի ունենում դատավարությունը»,- նշեց բանախոսը։

Ալումյանի խոսքով, բացի ընդմիջումների վերաբերյալ միջնորդությունների բավարարումից, միակ դեպքը, երբ պաշտպանական կողմի միջնորդությունը բավարարվել է, եղել է պաշտպանության նախկին նախարար Սեյրան Օհանյանին հանրապետությունից կարճ ժամանակով բժշկական ծառայություններ ստանալու նպատակով բացակայելու վերաբերյալ հարցը։

«Պաշտպանական կողմի որևէ այլ միջնորդություն, կրկնում եմ ընդմիջումներից բացի, չի բավարարվել։ Դատախազներն առարկում են, ինչը խնդիր չէ, խնդիրն այն է, որ դատախազների առարկությունը դատարանը դիտարկում է որպես իր համար վետո։ Արդյունքում ունենք այն, ինչ ունենք»,- ասաց Քոչարյանի փաստաբանը։