Ձեր վստահելի աղբյուրը

«Հայրենիք» զարգացման հիմնադրամը կազմակերպել է «Գյումրին այսօր» պանելային քննարկում նվիրված Գյումրու օրվան։

«Հայրենիք» կուսակցության խորհրդի անդամ Արսեն Բաբայանն ասաց, որ ընտրել են, իրենց կարծիքով, ամենահետաքրքիր ոլորտները, որոնց շուրջ ուզում են քննարկում ծավալել գյումրեցիների հետ, հենց գյումրեցիները ներկայացնեն իրենց տեսակետները՝  նպատակ ունենալով երկարատև արդյունքում այդ թեմաներից յուրաքանչյուրով ունենալ ավելի խորացված, մասնագիտացված քննարկում։

Փաստաբան Թամարա Յայլոյանը խոսեց իրավական խնդիրների, դատական իշխանության մասին, որը, նրա գնահատմամբ, այսօր չափազանց անմխիթար վիճակում է։

«Դատական իշխանությունն առանց այն էլ, մինչև հեղափոխությունը, բավականին բարդ վիճակում էր գտնվում, հեղափոխությունից հետո, որքան զարմանալի է, ավելի հետընթաց ապրեց։ Հիմնականում պրոբլեմներն այն են, որ դատական պրոցեսները տարիներով, ամիսներով ձգձգվում են, մարդիկ չեն կարողանում իրենց խախտված իրավունքների լուծումը գտնել։ Կարծում եմ՝ շատերը նույնիսկ չեն էլ ցանկանում արագ կարգով գործերի քննությունը կատարվեն։ Սա կախված է ոչ միայն դատավորներից, նաև իշխանությունից, որն ամեն պարագայում, չունենալով այդ իրավունքը, սպառնում է դատական իշխանությանը, շրջափակում է, ռեֆորմային բաներ է ցանկանում անել, որոնք չի քննարկում մասնագետների, հասարակական լայն շրջանակների հետ։ Այս պատճառով էլ շատ մարդկանց խախտված իրավունքների վերականգնումը հարցականի տակ է դրվում»,- ասաց փաստաբանը։

Նա նշեց, որ շինարարության, վիրավորանքի, զրպարտանքի, ապօրինի շինարարության, աղբահանության, ՏԻՄ և այլ մարմինների հետ կապված հարցեր կան, որոնց համար քաղաքացիները դիմում են դատարան, ամիսներով, տարիներով քաշքշուկի մեջ են ընկնում։

Թամարա Յայլոյանն ասաց, որ պետական տուրքի վերաբերյալ օրենքում են ուզում փոփոխություններ կատարել, բարձրացնել, ինչի հետևանքով դատարանները կլինեն ավելի անհասանելի ու անմատչելի։

Գործարար, կառավարաման մագիստրոս, կառավարման խորհրդատու Բաբկեն Մկրտչյանն ասաց, որ չի նկատել, որ որևէ բրենդի ցանկանում է գալ Գյումրի։ Ըստ նրա, երկու հարկային արտոնություն կարող է բավականին մոտիվացնող լինել. «Առաջին՝ կապիտալ ներդրումների անմիջապես մաշվածության առումով ծախսային հոդվածով դուրս հանելն է։

Երկրորդ հարկային արտոնությունն ավելացված արժեքի հարկից ազատումն է։
Այս երկուսը կիրառվել է Վրաստանում, օգուտ է տվել»։

Բ.Մկրտչյանն ասաց, որ պետությունը պետք է գործ անի յուրաքաչյուր ոլորտի համար, նույնիսկ ըստ շրջանի, ու վերահսկելի պահի բիզնեսը։

«Բիզնեսին պետք չի երես տալ, նաև պետք չի սահմանափակել իրենց շահագրգռվածության մեջ»,- ասաց կառավարման խորհրդատուն։

Նա նշեց, որ պետությունը պետք է էժան վարկային միջոցների հարցը կարգավորի, խրախուսի ընտանեկան ձեռնարկությունները, այդ մշակույթը ձևավորվի։

Քննարկմանը ուղիղ եթերը կարելի է դիտել «Հայրենիք» զարգացման հիմնադրամի յութուբյան էջում։