Ձեր վստահելի աղբյուրը

Իրանի նախագահ Հասան Ռոհանին զանգահարել է ՌԴ նախագահ Վլադիմիր Պուտինին՝ քննարկելու իրավիճակը Լեռնային Ղարաբաղում։ Այս մասին գրում է Ռիա նովոստին՝ հղում անելով Կրեմլի ծառայությանը։

«Իրանական կողմի նախաձեռնությամբ կայացել է ՌԴ նախագահ Վլադիմիր Պուտինի և Իրանի նախագահ Հասան Ռոհանիի հեռախոսազրույցը։ Մանրամասն մտքեր են փոխանակել  Լեռնային Ղարաբաղի հակամարտության գոտում տիրող իրավիճակի վերաբերյալ»,- նշված է հաղորդագրության մեջ։

Զրույցի ընթացքում Ռոհանին աջակցություն է հայտնել ՌԴ նախագահին Ղարաբաղում ձեռքբերված հրադադարի պահպանման և բանակցություններ սկսելու հարցում՝ հանուն արագ կարգավորման։

«Իրանի նախագահը աջակցություն է հայտնել Հայաստանի, Ռուսաստանի, Ադրբեջանի արտաքին գործերի նախարարների եռակողմ խորհրդատվությունների արդյունքում ձեռք բերված պայմանավորվածությունների՝ մարդասիրական նպատակներով հրադադարի հաստատման, ինչպես նաև առարկայական բանակցություններ մեկնարկելու հարցում` խաղաղ կարգավորմանը շուտափույթ հասնելու նպատակով»,- նշված է հայտարարության մեջ։

Հոկտեմբերի 9-ին Մոսկվայում հանդիպել էին Հայաստանի, Ադրբեջանի և Ռուսաստանի արտաքին գործերի նախարարները Լեռնային Ղարաբաղում տիրող իրավիճակի շուրջ խորհրդակցություններ անցկացնելու համար։ Հանդիպումից հետո արտաքին գործերի նախարարները հանդես էին եկել հայտարարությամբ.
1. 2020թ. հոկտեմբերի 10-ի ժամը 12:00-ից մարդասիրական նպատակներով հայտարարվում է կրակի դադարեցման մասին` ռազմագերիների և պահվող այլ անձանց, զոհվածների մարմինների փոխանակման համար` Կարմիր Խաչի Միջազգային Կոմիտեի միջնորդությամբ և վերջինիս չափանիշների համաձայն։
2. Կրակի դադարեցման հստակ պարամետրերը կհամաձայնեցվեն հավելյալ։
3.Հայաստանի Հանրապետությունը և Ադրբեջանի Հանրապետությունը, ԵԱՀԿ Մինսկի խմբի համանախագահների միջնորդությամբ, կարգավորման հիմնարար սկզբունքների հիման վրա ձեռնամուխ են լինելու առարկայական բանակցությունների` խաղաղ կարգավորմանը շուտափույթ հասնելու նպատակով։
4.Կողմերը վերահաստատում են բանակցային գործընթացի ձևաչափի անփոփոխությունը»։

Հիշեցնենք՝ սեպտեմբերի 27-ին ժամը 07:15-ի սահմաններում, Ադրբեջանը, օգտագործելով հրետանային միջոցներ ու հարվածային ԱԹՍ-ներ, հարձակման է անցել արցախա-ադրբեջանական ողջ շփման գծով։ Հրետակոծվել են նաև խաղաղ բնակավայրերը, այդ թվում մայրաքաղաք Ստեփանակերտը, Մարտունին, Մարտակերտը, Հադրութը: Բնակչությանը կոչ է արվել պատսպարվել։ Կան տասնյակից ավելի զոհեր քաղաքացիների և հարյուրավոր զոհեր զինծառայողների շրջանում:
Թե Հայաստանում, թե Արցախում հայտարարված է ռազմական դրություն և ընդհանուր զորահավաք։