Ձեր վստահելի աղբյուրը

«Արտահերթ նիստի պահանջով հանդես ենք եկել, որպեսզի Ազգային ժողովն ընդունի հայտարարության տեքստ, որում այն կարմիր գծերն են, որոնցով պետք է առաջնորդվի ցանկացած հայամետ իշխանություն»,-Ֆրանսիայի հրապարակում լրագրողներին տված հարցազրույցում հայտնեց «Դիմադրության» շարժման համակարգող, ԱԺ փոխխոսնակ Իշխան Սաղաթելյանը:

Նա հիշեցրեց, որ իշխանությունները պարբերաբար հայտարարում են, թե ընդդիմությունը օրակարգ չունի և վախենում է գնալ խորհրդարան, թե ընդդիմության պայքարի նպատակը ոչ թե Հայաստանն ու Արցախն է, այլ իշխանության գալը, և դրան ի պատասխան ընդդիմադիր խմբակցություններն առաջարկել են արտահերթ նիստ՝ ՀՀ-ի գոյության նվազագույն պահանջների ամրագրմամբ:

«Մի հարց ենք տվել՝ ամբողջ իշխանությամբ՝ 72 հոգով չեն կարողանում պատասխանել: Պարզ ձևակերպել ենք՝ եկե՛ք, ասե՛ք, որ որևէ պարագայում չեք պատկերացնում լուծում, երբ Արցախը կարող է լինել Ադրբեջանի կազմում, իրենք (Ալեն Սիմոնյանը) պատասխանել են, որ իրավունք չունեն այն ասել, որովհետև դրանով կխանգարեն գլխավոր բանակցողին»,-ասաց Սաղաթելյանը և հարց տվեց. «Ո՞վ է գլխավոր բանակցողը, Ալիևը՞: Այո, Ալիևին կխանգարեք դրանով, մտածում եք Ալիևի և Ադրբեջանի շահերի՞ մասին»:

Նրա խոսքով՝ իշխանությունները քաղաքական փակուղում են և երբ ասում են, որ հունիսի 3-ը քաղաքական ջրբաժան է և իրենց քաղաքական գերեզմանը, դա նկատի ունեն:

«Դրանից հետո նրանք այլևս որևէ մեկին պետք չեն՝ բացառությամբ մեր թշնամիների, որովհետև ակնհայտորեն հայտարարում են, որ իրենք չունեն կարմիր գիծ, սկզբունք, ժողովրդի թիկունքում երկիրը փորձում են տանել նոր կապիտուլյացիայի»,-հայտարարեց Սաղաթելյանը և շեշտեց, որ ընդդիմության խնդիրն այդ ամենը կանխելն է, իսկ դրա համար իշխանութուններին պետք է հեռացնել:

«Դիմադրության» շարժման համակարգողը կարծիք հայտնեց, որ ՔՊ խմբակցության ոչ բոլոր պատգամավորներն են պատրաստ կիսել դավաճանության պատասխանատվությունը և բացատրեց, որ երբ ընդդիմությունը Արցախի կարգավիճակի մասին հարցեր է փորձում ուղղել նախարարներին կամ պատգամավորներին՝ նրանց շանս է տալիս կողմնորոշվելու, տարանջատվելու Նիկոլից:

«Իհարկե, մենք հասկանում ենք նախարարների վախի աստիճանը, որ այդ պաշտոններն իրենց համար թանկ են, բայց հակառակ կողմում դրված է հայրենիքը»,-ասաց Սաղաթելյանը՝ հավելելով, որ 10-12 պատգամավորների  ճակատագիրը և պահվածքը պարզ է, բայց մյուս մասը պետք է իրեն հարց տա, թե ինչո՞ւ են մտնում այդ բեռի և պատասխանատվության տակ:

Սաղաթելյանն անդրադարձավ նաև էկոնոմիկայի նախարար Վահան Քերոբյանի՝ նախօրեին հնչեցրած հայտարարությանը, թե ո՞ւր էր Իշխան Սաղաթելյանը 44-օրյա պատերազմի ժամանակ:

«Ինչ որ մի անմեղսունակ նախարար ունեն՝ Վահան Քերոբյան, որը լեզվին է տվել: Չեմ ուզում ես իրեն անդրադառնալ: Պատերազմում Դաշնակցությունը և ես ինչով որ զբաղվել ենք՝ իրենք իրենց ողջ կառավարությունով, խմբակցությունով դրա 1 %-ը չեն արել, այլ՝ ընդհակառակը: Մենք աշխատում ենք այդ կալիբրի երևույթների չանդրադառնալ»,-ասաց նա:

Պատասխանելով սահմանազատման և սահմանագծման հանձնաժողովի աշխատանքների վերաբերյալ հարևցին՝ ԱԺ նախագահի տեղակալը նկատեց, որ հայկական պատվիրակության կազմում ՔՊ-ական չկա, ինչը հատկանշական է և նրա աշխատանքը լավ տեղ չի տանում:

«Մենք ասել ենք, որ պետք է դադարեցնել հանձնաժողովի աշխատանքները, քանի դեռ Ադրբեջանի զորքերը ՀՀ տարածում են»,-հայտարարեց ԱԺ փոխխոսնակը: