Ձեր վստահելի աղբյուրը

«Մեր պահանջն է ողջ ապօրինի գործընթացը դադարեցնել։ Մեզ համար խնդիրը ստի ու ճշմարտության մասին է, թե ինչ զարգացում կլինի, չգիտեմ, իսկ մեր պահանջն է՝ ավարտել այս գործընթացը»,- Կիրանցից Երևանի քայերթի ժամանակ լրագրողներին ասաց ՀԱԵ Տավուշի թեմի առաջնորդ Բագրատ արքեպիսկոպոս Գալստանյանը:

Սրբազանը նշեց, որ սահմանազատում չի կարող լինել առանց խաղաղության պայմանագրի ստորագրման։

«Բազմիցս ասել եմ... Ընդամենը երկու տարի առաջ Ջերմուկ, Վարդենիս Սյունիք, չէ՞։ Մեր տարածքներն արյունով գրավել են։ Երկու տարվա խնդիրը թողածէ գնացել են հետ, 90-ականների հարցը լուծելու։ Եթե սա բարի կամքի դրսևորում է, ինչո՞ւ մյուս կողմից դա չկա։ Ի՞նչն է պատճառը։ Կապ չունի, որ պարտվողի դերում ենք։ Ոչ երաշխիք կա, ոչ երաշխավոր կա, ոչ պատերազմից խուսափելու երաշխիք կա։ Ես չեմ ասում այս ամենը, դրանք ասվել են։

Ոչ թե պետք է սահմանազատում, սահմանագծում լինի, նաև և առաջ խաղաղության պայմանագիր պետք է լինի, որ հետո կարողանաս հանգիստ պայմաններում սահմանազատում անել, ոչ թե ուժի սպառնալիքի ներքո ինչ թելադրեն, դա էլ անես։

Հիմա էլ քանդում ես Տավուշը, բնագծերը, կահավորանքը,  գյուղացիների տներն ես քանդում առանց հիմնավոր կոորդինատների, քարտեզի։ Ինչպե՞ս է դա տեղի ունենում, ո՞ր երկրում է գրված։ Մի օր մեր գյուղացիները գնում են հանդիպելու, ասում են՝ այս տարածքն է, մյուս օրը գնում են՝ մի բան է փոխվել, հաջորդ օրը գնում են՝ մի քիչ մեծացել է կամ փոքրացել»,- ասաց Բագրատ Սրբազանը։

Հարցին՝ եթե Նիկոլ Փաշինյանն այս պահանջներին ընդառաջ գնա, սահմանազատման գործընթացում  փոփություններ մտցնի, կդադարեցնե՞ն այս ամենը, Բագրատ Սրբազանն ասաց. «Ոչ, խնդիրը կհասնենք տեղ, կիմացվի ինչ է։ Ինչ  կանենք ինչ չենք անի, ոչ ձեզ եմ պատմելու, ոչ էլ որևէ մեկին»։ 

Հիշեցնենք, որ «Տավուշը հանուն հայրենիքի» շարժման անդամները Բագրատ Սրբազանի առաջնորդությամբ մայիսի 4-ին կեսօրից Կիրանցից քայլերթով սկսել են շարժվել Երևան։ Նրանք Երևան կհասնեն մայիսի 9-ին։

«Միակողմանի զիջումների այս աղետալի ընթացքը վերջ ու սահման չունի. հյուսիսից հարավ մենք մեծ, անհասկանալի արյունահոսության գործընթացում ենք գտնվում։ Այս գործընթացը պետք է դադարեցվի»,- քայլերթից առաջ հայտարարել էր Բագրատ Սրբազանը։

Քայլերթին բացի տավուշցիներից, միացել են Հայաստանի այլ շրջաններից քաղաքացիներ, արվեստագետներ, զոհված զինծառայողների հարազատները։ Քայլերթի մասնակիցները շարքերն անընդհատ համալրում են նոր քաղաքացիներ։