Դիմելու ենք ՄԻԵԴ. Վ. Ավետիսյանի փաստաբան

Իրավունք 14:47 27/02/2015

Դիմելու ենք ՄԻԵԴ. Վ. Ավետիսյանի փաստաբան

Վոլոդյա Ավետիսյանի գործը քաղաքական է, ոչ թե դատական: Այսօր լրագրողների հետ հանդիպման ժամանակ ասաց Վոլոդյա Ավետիսյանի փաստաբան Արա Զաքարյանը:

«Դատարանները այս գործի շրջանում հերթական անգամ ցույց տվեցին, որ արդարադատության փոխարեն կատարում են իշխանության պատվեր: Վճռաբեկ բողոքը ևս մերժվել է, մենք դիմելու ենք ՄԻԵԴ»,-ասաց փաստաբանը:

Նշեց, որ այս պահին նախապատրաստում են ՄԻԵԴ դիմելու փաստաթղթերը, քանի որ ուրիշ ճանապարհ այլևս չունեն:

Ա. Զաքարյանի խոսքերով Վ. Ավետիսյանի գործով որոշումը կայացվել է կոպիտ խախտումներով, չկատարած հանցանքի համար նա դատապարտվել է վեց տարվա ազատազրկման, և եթե անգամ նա կատարած լիներ այդ հանցագործությունը, ապա ակնհայտ խնդիր էր դրված հնարավորինս մեծ ցավ պատճառել նրա ընտանիքին

Հանդիպմանը ներկա Հիմնադիր խորհրդարանի պատգամավոր Գագիկ Սարուխանյանը ևս ասաց, որ ՀՀ-ում կան Վ. Ավետիսյանից բացի նաև այլ քաղբանտարկյալներ, որոնց արարքը նորմալ երկրում տուգանքի արժանի գործողություն է:

Հիշեցնենք` պահեստազորի գնդապետ Վոլոդյա Ավետիսյանը մեղադրվում էր ՀՀ քրեական օրենսգրքի 178-րդ հոդվածի 2-րդ մասի 2-րդ կետով կատարած հանցանքի համար` խոշոր չափերի խարդախություն: Մեղադրական եզրակացության համաձայն, Վոլոդյա Ավետիսյանին մեղադրանք է առաջադրվել այն բանի համար, որ նա, հանդիսանալով պահեստազորի գնդապետ, «խարդախությամբ հափշտակություն կատարելու ուղղակի դիտավորությամբ, կաշառք ստանալու պատրվակով, չարաշահելով իր՝ որպես նախկին զինվորական ծառայողի նկատմամբ Երևան քաղաքի բնակիչ Ալբերտ Մաթոսյանի մոտ ձևավորված վստահությունը և դիմելով խաբեության, թե զինվորական բարձրաստիճան պաշտոնատար անձանց միջոցով կարող է կարգավորել ԼՂՀ պաշտպանության բանակի N զորամասում ժամկետային զինվորական ծառայության նշանակված Ալբերտ Մաթոսյանի որդի Արթուր Մաթոսյանին նույն զորամասում համակարգչային օպերատոր նշանակելու հարցը, սակայն չունենալով նման պայմանավորվածություն, 2013-ի հուլիսի 29-ին ժամը 14:00-ի սահմաններում Երևան քաղաքի Թումանյան 54 հասցեում գտնվող Ալեքսանդր Սպենդիարյանի անվան օպերայի և բալետի ազգային թատրոնի հարակից Ազատության հրապարակի տարածքում Ալբերտ Մաթոսյանից պահանջել է դրա դիմաց իրեն տրամադրել զգալի չափերի՝ 205.150 ՀՀ դրամին համարժեք 500 ԱՄՆ դոլար գումար»: Սակայն, ըստ մեղադրանքի, Ալբերտ Մաթոսյանը հրաժարվել է օգտվել Վոլոդյա Ավետիսյանի ծառայությունից:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: