ԲՀԿ-ականի որդին անձեռնմխելի՞. Քիք-բոքսինգի աշխարհի չեմպիոնի գործով վկաները հրաժարվել են վկայություն տալուց
Երկու տարի առաջ, 2011 թվականի սեպտեմբերի 20-ին Նոր Նորքի 4-րդ զանգվածում կատարված երիտասարդ Դավիթ Օհանյանի սպանությունը մինչ օրս չի բացահայտվել, թեպետ գործն արդեն դատարանում է և շատ շուտով կավարտվի դատաքննությունը: Այդ սպանության համար, որը կատարվել էր երեկոյան ժամերին մի քանի տասնյակ մարդու ներկայությամբ, միակ մեղադրյալը ՀՀ քիք-բոքսինգի ազգային ֆեդերացիայի մարզիկ, ԱՊՀ, Եվրոպայի, աշխարհի ոսկե մեդալակիր, գավաթակիր Վարաժ Մանուկյանն է: Հատկանշական է, որ այս գործով վկաներ գրեթե չկան, մինչդեռ սպանության ժամանակ, ինչպես «4-րդ Մասիվի» բնակիչներն են ասում, 3 տասնյակից ավել մարդ է եղել դեպքի վայրում: Վեճը թաղի տղաների միջև ծագել էր աղջկա համար:
Օհանյանի հետ միասին դեպքի վայրում տուժել է նույն թաղամասի բնակիչ Հակոբ Բուդաղյանը, որն այժմ Հանրապետությունում չէ: Գործի նախաքննությունն իրականացրած ոստիկանության Նոր Նորքի բաժնում քննիչների ճնշման արդյունքում Վարաժը ինքնախոստովանական ցուցմունք է տվել և ասել է, որ իբրև դեպքի օրը ինքն է դանակով հարվածել Դավիթ Օհանյանին, իսկ Հակոբ Բուդաղյանին միգուցե դանակը թափահարելու ընթացքում կպել է: Վարաժ Մանուկյանին մեղադրանք է առաջադրվել ՀՀ քր.օր. 34-104-րդ հոդվածի 2-րդ մասի 1-ին կետի (սպանության փորձ), 104-րդ հոդվածի 1-ին մասի (սպանություն), 118-րդ հոդվածի (ծեծ) հատկանիշներով:
Վարաժ Մանուկյանի փաստաբան Լուսինե Մարտիրոսյանը Panorama.am-ի թղթակցի հետ զրույցում ներկայացնելով նախաքննության ընթացքը, ասաց, որ խախտումները բազմաթիվ են եղել: Նախ, ըստ նրա, մեղադրանքի հիմք է հանդիսանում ինքնախոստովանական ցուցմունքը և գործով որպես իրեղեն ապացույց համարվել է քննչական փորձարարության մասին տեսանյութը, որում Վարաժը մատնացույց է արել այն վայրը, որտեղ իբր դանակահարել է Դավիթ Օհանյանին և Հակոբ Բուդաղյանին, ներկայացրել հանցագործության կատարման եղանակն ու հանգամանքները: Փաստաբանի պնդմամբ, այդ նյութերը չեն կարող դրվել մեղադրանքի հիմքում և որպես ապացույց օգտագործվել, քանի որ դրանք ձեռք են բերվել կասկածյալի և մեղադրյալի պաշտպանության իրավունքի խախտմամբ, ինչպես նաև քննչական գործողության կատարման կարգի էական խախտմամբ: «Չնայած սրան, վարույթն իրականացնող մարմնի կողմից քրեադատավարական օրենքի կոպիտ խախտմամբ Վարաժ Մանուկյանից վերցված խոստովանական ցուցմուքները դրվել են մեղադրանքի հիմքում, և գործը նման ապացույցներով ուղարկվել դատարան, այնինչ դրանք ի սկզբանե պետք է բացառվեին ապացույցների շարքից», -պնդեց փաստաբանը:
Սեպտեմբերի 24-ին Ավան և Նոր Նորք վարչական շրջանների ընդհանուր իրավասության դատարանում կայացած հերթական դատական նիստում նիստը նախագահող դատավոր Դավիթ Հարությունյանին փաստաբանն այս մասին միջնորդություն է ներկայացրել և խնդրել է գործով անթույլատրելի ապացույց ճանաչել Վարաժի մասնակցությամբ իրականացված քննչական փորձարարության արձանագրությունները, Վարաժի ցուցմունքները, տեսաձայնագրությունները: Փաստաբան Լուսինե Մարտիրոսյանի ներկայացրած միջնորդության մասին մեղադրող կողմը դիրքորոշում կհայտնի հաջորդ` հոկտեմբերի 8-ին կայանալիք դատական նիստում:
«Երբ Վարաժը մեքենայով եկել է 4-րդ զանգված, չի ցանկացել իջնել մեքենայից, տղաներից Լևոն Խաչատրյանը բացում է մեքենայի դուռը, ասում է իջի: Վարաժն էլ պատասխանում է, թե եթե բան ունես ասելու, իջնենք ներքև խոսենք: Վարաժին ծեծելով իջեցնում են մեքենայից», -մատնանշելով սպանության գործից անջատված մասով վկա Լևոն Խաչատրյանի ցուցմունքը, ներկայացնում է փաստաբանը: Նրա խոսքով, Վարաժն այժմ մեղադրվում է սպանություն կատարելու համար, մինչդեռ ինքը սպանության նպատակ չի ունեցել, անգամ չի ցանկացել իջնել մեքենայից: Ավելին, իր մոտ եղած դանակը մնացել է մեքենայի մեջ:
Փաստաբանն իր միջնորդության մեջ նաև անթույլատրելի ապացույց է համարում ոստիկանության Նոր Նորքի բաժնի աշխատակից Արթուր Հակոբյանի ցուցմունքները: «Դատարանում իմ հարցին, թե որտեղից է նրան հայտնի որ Վարաժ Մանուկյանն է հարվածել Դավիթ Օհանյանին և Հակոբ Բուդաղյանին, Հակոբյանը պատասխանեց, որ` ո՞նց, Վարաժը տվել էր խոստովանական ցուցմունք», ներկայացրեց փաստաբան Մարտիրոսյանը:
Տուժողի իրավահաջորդ Դավիթ Օհանյանի մայրը` տիկին Արուսյակը, դատարանում հայտարարել է, թե իր որդուն սպանողը Վարաժ Մանուկյանը չէ, քանի որ նա այդպիսի բան չէր անի: Փաստաբանն ասաց, որ իր պաշտպանյալը Ֆիզիկական կուլտուրայի պետական ինստիտուտի մագիստրատուրայի բաժինն ավարտել է կարմիր դիպլոմով և այժմ էլ քրեակատարողական հիմնարկում չի դադարում կարդալ, սովորելը:
Դեռ երկու տարի առաջ դեպքից հետո Նոր Նորքի 4-րդ թաղամասի մի խումբ բնակիչներ բաց նամակ էին հղել ՀՀ նախագահին, ՀՀ նախկին դատախազ Աղվան Հովսեփյանին և նախկին ոստիկանապետ Ալիկ Սարգսյանին` պնդելով, որ սպանության հեղինակը Վարաժ Մանուկյանը չէ: «Ինչո՞ւ մինչ այսօր չի ասվում, որ կռիվ սարքողն ու անմիջական մասնակիցը «Բարգավաճ Հայաստան» կուսակցության հայտնի ավագանի Արտակ Ավետիսյանի որդի Նարեկն ու նրա ոհմակն են: 2 տարի է՝ հանգիստ չենք քնում էտ լակոտների պատճառով, կասեք՝ չգիտենք ովքեր են, ասում ենք, բոլորը գիտեն` Նարեկ Ավետիսյան, Տարոն Ավետիսյան, Ռաֆայել Ավետիսյան, Թադևոս Ավետիսյան, սրանք Արտակ Ավետիսյանի տղաներն են: Չգիտեք, որ դեպքի վայրում եղել են իրենց մեքենաներով` «Մերսեդես 19-004», «Մերսեդես 99-991», «Վազ 2121 65-555», «Գրանդ Չերոկի 08-778»,-բաց նամակում գրել էին բնակիչները:
Նկատենք, որ այս գործի անջատված մասով Արտակ Ավետիսյանի որդիները մեղադրվել են ու դատապարտվել խուլիգանության համար, սակայն այժմ նրանք ազատության մեջ են:
Նախորդող հրապարակումներ
Քիք-բոքսինգի չեմպիոնը կասկածվում է Նոր-Նորքում 25-ամյա երիտասարդի սպանության մեջ
Երևանի ավագանու ԲՀԿ-ական անդամի որդիների նկատմամբ քրեական գործ կհարուցվի
«Ընկերուհի, լսի…». Ավագանու ԲՀԿ-ական անդամը հերքում է Նոր Նորքի ոստիկանապետին
Լրահոս
Տեսանյութեր
Բագրատ Սրբազան. ՔՊ անդամներ արդեն իսկ ներքին ուղերձներ են հղում, թե ինչպես կարող են միանալ մեզ