Ձեր վստահելի աղբյուրը

ՀՀ բնապահպանության նախարար Արծվիկ Մինասյանը գործադիրի նիստից հետո լրագրողների հետ զրույցում անդրադառնալով Գառնիի կիրճում գտնվող «Քարերի սիմֆոնիա» հուշարձանի մոտ շինարարական աշխատանքների մասին ահազանգին՝ նշեց, որ այս պահին կասեցված է այնտեղ որևէ գործողություն:

«Երեկվանից՝ ահազանգը ստանալու առաջին իսկ պահից, տեսչական մարմինը գործողություններ է ձեռնարկում, կասեցված է այնտեղ որևէ գործողություն շինարարության տեսքով՝ մինչև հստակ պարզվեն իրավական բոլոր հիմքերը»,- ասաց նախարարը:

Նրա խոսքով՝  «Քարերի սիմֆոնիան» համարվում է բնության հուշարձան, մի քանի ամիս առաջ հաստատվել են հուշարձանի սահմաններն ու անձնագիրը. «Ներկայումս ուսումնասիրություն է իրականացվում՝  պարզելու, թե արդյոք այդ շինաշխատանքները կատարվում են սահմանների մեջ: Ցանկացած գործողություն, որը կարող է տարածքի համար սպառնալիք հանդիսանալ, ապա լիազորված մարմինն իրավասու է ձեռնարկելու խախտումը վերացնող գործողություն»:

Արծվիկ Մինասյանը նշեց, որ  նախնական գնահատմամբ, տարածքը մասնավոր է, ժամանակին սեփականաշնորհված, բացի այդ, այդ տարածքն ամբողջությամբ գտնվում է համայնքի վարչական սահմաններում: Ըստ նրա՝ դեռևս մեկ տարի առաջ քննարկում էին «Քարերի սիմֆոնիան»՝ որպես բնության հատուկ պահպանվող տարածք, կառավարման հանձնել Խոսրովի անտառ արգելոցին, որպեսզի պահպանության ռեժիմն ուժեղացվեր: «Այս հարցը ներկայացրել ենք համայնքի ավագանուն, սակայն մինչ օրս չունենք նրանց որոշումը»,- ընդգծեց նախարարը:

Միևնույն ժամանակ Արծվիկ Մինասյանը հայտնեց, որ տվյալ տարածքը գտնվում է Բնապահպանության նախարարության լիազորության ներքո, ուստի իրավասու է խախտումները վերացնող միջոցառումներ  իրականացնել: «Առաջիկա ժամերին տեղեկություն կունենանք, թե ինչ իրավական հիմքերով է իրականացվում շինարարությունը: Եթե այն իրականացվում է հուշարձանի տարածքում, բացառվում է, որ իրավական հիմք լինի, և այն ենթակա է վերացման»,- նշեց բնապահպանության նախարարը: