Ձեր վստահելի աղբյուրը

«Նիկոլ Փաշինյանը խորը թյուրմացության մեջ է, երբ այս գործընթացի խորքային պատճառը  չի ընկալել, ըմբռնել կամ առնվազն իրեն զեկուցել են  մակերեսորեն: Սա պայքար է ազգայինի համար ապազգային  մտածողության ու երևույթների շրջանակներում»,- լրագրողների հետ զրույցում ասաց ՀՅԴ-ական գործիչ Արծվիկ Մինասյանը, որը կրթության, գիտության, մշակույթի և սպորտի նախարարության դիմաց էր, որտեղ նստացույց են անում ՀՅԴ երիտասարդական թևի ներկայացուցիչներն ու ուսանողներ՝ պահանջելով ԿԳՄՍ նախարար Արայիկ Հարությունյանի հրաժարականը:

Նա նշեց, որ Նիկոլ Փաշինյանը որպես վարչապետ չի կարող իրեն վերագրել նախարարության գործառույթները:

«Օրենքը սահմանում է, որ կառավարության անունից ոլորտի  քաղաքականությունն իրականացնում է  կրթության, գիտության, մշակույթի, սպորտի նախարարությունը: Օրենքով հստակ է ձևակերպված, թե ինչ քաղաքականություն պետք է իրականացվի:  Այն, ինչ իրականացնում է  այս  նախարարությունը  նախարար Արայիկ Հարությունյանի գլխավորությամբ, հակասում է  օրենքին, այսինքն հակաօրինական ընթացքի մեջ է»,- ասաց Ա. Մինասյանը:

Նրա խոսքով, ակնհայտ է, որ Արայիկ Հարությունյանը, նրա խորհրդատուները, եթե վարչապետն էլ միանա, նաև ինքը, փորձում են ապակողմոնորշել երիտասարդության շրջանում առաջացած այս  պոռթկումը, ընդվզումը:

«ՀՅԴ-ն հանդես է գալիս ազգայինը պաշտպանելու, պահպանելու դիրքերից, գտնվելու է  ցանկացած այն շարժման կողքին, որն ապազգային երևույթները  մեր իրականությունից դուրս մղելու գործողություն է իրականացնելու:

Խոսքը զուտ մեկ, ընդամենն ընթացիկ քաղաքականության մասին չէ, այլ, ըստ էության, արմատային  քաղաքականության մասին և օտարածին օրակարգերը սպասարկելու փոխարեն  ժողովրդի բացարձակ վստահությունը ստացած, թեկուզ և էյֆորիայի պայմաններում, ցանկացած իշխանություն պարտավոր է իր ազգային ուղեգիծը  պահի, ոչ թե արհեստականորեն համադրի հետադիմությունն ու առաջադիմությունը՝  հետադիմական համարելով նրանց, ովքեր ուզում են իրենց արմատներով զարգացում ունենալ, ոչ թե կտրվել արմատներից ու  վերածվել մի երևույթի, որի նպատակն  ընդամենը մեկն է՝ ստամոքսն օր առաջ շուտ լցնել»,- ասաց ՀՅԴ-ական գործիչը:

Արծվիկ Մինասյանն ընդգծեց, որ սա իշխանության կռիվ չէ, այլ ազգայինը պահելու, պահպանելու և առաջ մղելու պայքար է:

«Ազգային կառավարությունը չի կարող ուղղակի այսպիսի ձևով մոտենալ: Ցանկացած հարց քննարկման ենթակա է: Ինչո՞ւ առաջարկներից առաջ քննարկման չի դրվում հայեցակարգ: Սա նշանակում է, որ  իրավիճակային, րոպեական, օտարին  սպասարկելու համար ստեղծված միավորներ են, որովհետև խորհրդարանում ունեն մեծամասնությո՞ւն և  կարող են կնոպկա սեղմել ու անցկացնե՞լ: Բավոնդակային քննարկման անհրաժեշտություն կա: Բայց իրենք բովանդակությունը ներկայացելու փոխարեն հիմքից են կտրում հարցը, քոքահան են անում: Սա է մերժելի, անընդունելի, սա է խոսում այդ  մարդկանց ոչ ազգային պետության ունենալու մտադրության մասին: Ուղիղ հակառակը՝  թուլացնելու»,- ասաց նա:

Ա. Մինասյանի խոսքով, նախարարը, որը խոսում է անդաստիարակ պահվածքի մասին, այնպիսի բառապաշար է իրեն թույլ տալիս, որը վիրավորական է ցանկացած արժանապատվություն ունեցող մարդու համար, այդ  պաշտոնը զբաղեցնելու իրավունք ունի, ընդհանրապես որևէ հանրային պետական պաշտոն զբաղելու իրավունք չունի:

Հիշեցնենք,  ուսանողները, ՀՅԴ երիտասարդների պահանջն է կրթության, գիտության, մշակույթի և սպորտի նախարար Արայիկ Հարությունյանի հրաժարականը, նաև դեմ են կրթության, գիտության, մշակույթի և սպորտի նախարարության կողմից  մշակված «Բարձրագույն կրթության և գիտության մասին» նոր նախագծին, որի համաձայն, բուհերում «Հայոց լեզու», «Հայ գրականություն» և «Հայոց պատմություն» առարկաների դասավանդումը պարտադիր չի լինելու, պահանջում են կրթության, մշակույթի ոլորտում ազգային քաղաքականություն վարել:

Նրանց է միացել նաև հայկական արժեքների պաշտպանության «ԿԱՄՔ» հասարակական նախաձեռնությունը, նրանց աջակցում է «Ադեկվադ» կուսակցությունը, որոնք նույնպես ԿԳՄՍ նախարարության առջև են: