Ձեր վստահելի աղբյուրը

Արցախում Անվտանգության խորհրդի քարտուղարի պաշտոնում Սամվել Բաբայանի նշանակումը տարբեր խմբերի համար եղել է  զարմանալի՝ հաշվի առնելով մեծ թվով  հանգամանքներ։ 168.am-ի «Պրեսսինգ» հաղորդման ժամանակ ասել է «Հենակետ վերուծական կենտրոն» ՀԿ ղեկավար, Արցախի նախկին նախագահ Բակո Սահակյանի անվտանգության հարցերով խորհրդական Տիգրան Աբրահամյանը։

«Հույս ունենք, որ Արցախի Սահմանադրության  համաձայն  ձևավորված, կազմավորված իշխանությունները կգործեն դրա տրամաբանության շրջանակներում ու Արցախի մասին տեղեկատվությունը կստանանք ավելի շատ  Արցախի  զարգացման, անվտանգության աստիճանի բարձրացման մասին, այլ ոչ թե ներքին հակասությունների ու ինտրիգների մասին, որը ոչ մեկիս համար էլ ցանկալի չէ»,- նշել է փորձագետը։

Տ.Աբրահամյանի խոսքով, անկախ այն հանգամանքից, որ Արցախը ճանաչված պետություն չի եղել, սակայն այս տարիների ընթացքում մշտապես Արցախի ղեկավարները տարբեր շրջանակների միջոցով տարբեր մակարդակներում շփում են  ունեցել ոչ միայն ՌԴ, այլ մեծ թվով երկրների ղեկավարների հետ։

«Արցախի արտաքին գործերի նախարար Մասիս Մայիլյանի և Սամվել Բաբայանի հետ կապված չեմ կարող փաստել, հաստատել, միանշանակ ասել, որ նրանց մուտքը ՌԴ արգելված է անկախ այն հանգամանքից, որ դրա մասին բազմաթիվ հրապարակումներ եմ հանդիպել։ Բայց միանշանակ պետք է նշել, որ եթե Արցախի կարևոր պաշտոններում գտնվող  պաշտոնյաները խնդիր ունեն Ռուսաստանի մուտքի հետ, կարող է բավականին ցավալի իրադարձութունների բերել ոչ միայն Ղարաբաղի համար։ Ժամանակը ցույց կտա՝ ունենք այդ խնդիրը, թե ոչ։ Եթե իրականում մենք ունենք այդ խնդիրը և եթե իրականում  այդ նշանակումները եղել են գիտակցված ձևով, քաղաքական առումով բավականին մեծ թվով հետևանքների է  հանգեցնելու»,- ասաց Տ. Աբրահամյանը։

Խոսելով զինվորական վերնախավի մասին, արդյո՞ք մարդկային, պրոֆեսիոնալ ռեսուրսն օգտագործում է Արցախի իշխանությունը,  փորձագետը նշեց. «Պրոֆեսիոնալ զինվորականների խնդիր մենք ունենք ոչ միայն Արցախում, նաև Հայաստանում։ Այսօր մեծ թվով զինվորականներ տարբեր իրավական գործընթացներով են անցնում, դրանով  պայմանավորված, ըստ էության, պրոցեսներից  դուրս են։ Իսկ մենք այս պայմաններում մեզ նմանատիպ ճոխություն չենք կարող թույլ տալ։ Հենց միայն այն հանգամանքը որ Արցախի դեպքում Լևոն Մնացականյանը, ով բավական փորձառու, բավականին լավ  ռազմական կրթություն ստացած մեր գեներալներից է, այս պահին որևէ պաշտոն չի զբաղեցնում Հայաստանում կամ Արցախում, ինքնին ինձ համար արդեն խնդիր է։ Միայն այս օրինակը ցույց է տալիս, որ մեր ռեսուրսներն արդնուավետ չենք օգտագործում։ Հաշվի առնենք նաև այն զինվորականներին, որոք իրավական տարբեր պրոցեսներով անցում են տարբեր քրեական գործերով՝ Սեյրան Օհանյան, Յուրի Խաչատուրով, Միքայել Հարությունյան, ևս մի քանի զինվորականներ։ Ըստ էության, պետք է նկատենք, որ այս իրավիճակում մեծ թվով զինվորականներ խաղից դուրս վիճակում են մնացել, որը, չգիտեմ ներիշխանական այս զարգացումներում ում է  ձեռնտու կամ ում ոչ, կոնկրետ Հայաստանի ու Արցախի համար սա բավականին վտանգավոր է։ Մենք պարտավոր ենք ցանկացած իրավիճակում օգտվել այս մարդկանց  հնարավորություններից»։

Տիգրան Աբրահամյանը հույս ունի, որ Հայաստանի, Արցախի իշխանություններում որոշակի փուլում շատ ավելի հաշվենկատ կլինեն ու այդ մարդկանց տարբեր ձևերով, կապ  չունի  ինչ կարգավիճակով, կներգրավեն մեր պաշտպանական համակարգի զարգացման, արդիականացման ուղղված  գործընթացներում։

Ինչ վերաբերում է ադրբեջանական հաքքերների ձեռքում հայտնված Հայաստանին վերաբերող  փաստաթղթերին, այդ թվում նաև բանակի վերաբերյալ, փորձագետն ասաց, որ 2018 թվականի իրադարձություններից հետո ավելի շատ կենտրոնացել են ներքաղաքական զարգացումների, սևերի ու սպիտակների վրա, բայց կան համապատասխան ինստիուտներ, որոնք ունեն հնարավորություններ և պարտավորվածություն պայքարելու տեղեկատվական անվտանգության առկա սպառնալիքների դեմ։ 

«Այն խնիդրները, որոնք այսօր կան, դրանք  շատ բարդ լուծումներ չունեն»,- ասաց Տ.Աբրահամյանը։ 

Հարցազրույցն ամբողջությամբ՝ տեսանյութում։