Արա Բուդաղյանը կալանքի տակ է առանց որևէ հիմքի. Հայկ Ալումյան
Սյունիքի մարզպետ Սուրիկ Խաչատրյանի մահափորձի գործով կալանքի տակ գտնվող գործարար Արա Բուդաղյանի մասով քննչական գործողություններ չեն կատարվում: Այդ մասին Panorama.am-ին տեղեկացրեց Բուդաղյանի պաշտպան Հայկ Ալումյանը:
«Այս գործով նախաքննության ընթացքը ինձ չի գոհացնում, իմ պաշտպանյալը անարդար է գտնվում կալանքի տակ: Մեզ հետ կապված քննչական գործողություններ չեն իրականացվում: Երբ իմ պաշտպանյալը գտնվեր ազատության մեջ, ինչքան ուզում է, թող քննեին», -հավելեց փաստաբանը:
Փաստաբանի ներկայացմամբ, իրեն հայտնի չէ, թե ինչ քննչական գործողություններ են իրականացվում այս գործով մյուս մեղադրյալների մասով, բայց իր պաշտպանյալի մասով որևէ գործողություն չի կատարվում:
Ալումյանը տեղեկացրեց նաև, որ իր պաշտպանյալի մասով բողոքարկումներն առայժմ անարդյունք են:
Անդրադառնալով այն տեսակետներին, թե Արա Բուդաղյանը պատանդի կարգավիճակում է և նրան այնքան կպահեն, մինչև լուծվի Սդղի գյոլի գործով կալանավորված Սուրիկ Խաչատրյանի հարազատների հարցը, Հայկ Ալումյանն ասաց. «Լուրջ չեմ համարում նման տեսակետները: Ես չգիտեմ` որտեղից են որոշել նման բան տարածել, բայց այն, որ Արա Բուդաղյանը ակնհայտ ապօրինի կալանավորված է, հայտնի է: Ես չեմ պատկերացնում երևակայության ինչ թռիչք է պետք ունենալ, որ մահափորձի գործը կապեն Սդղի գյոլի գործի հետ»:
Սուրիկ Խաչատրյանի մահափորձի գործով կալանավորվել է 4 անձ, որոնց թվում է նաև Գորիսում հայտնի գործարար Արա Բուդաղյանը: Վերջինի նկատմամբ մեղադրանքն առաջադրվել է ՀՀ քրեական օրենսգրքի 38-34-104-րդ հոդվածի 2-րդ մասի 6-րդ կետի հատկանիշներով՝ շատերի կյանքի համար վտանգավոր եղանակով սպանության փորձին դրդելը:
Թեմային առնչվող հրապարակումներ`
Սուրիկ Խաչատրյանի նկատմամբ մահափորձի գործով ձերբակալվել է Արա Բուդաղյանը և ևս 3 անձ. ԱԱԾ
«Լիսկայի» դեմ մահափորձի գործով փաստաբանը միջնորդում է պաշտպանության միջոց տրամադրել Ավագյանի ընտանիքին
Բուդաղյանի նկատմամբ կայացրած որոշումների մեջ ամեն ինչ գլխիվայր շուռ տված է. փաստաբան (տեսանյութ)
Սուրիկ Խաչատրյանի մահափորձի գործով դատավարական գործողությունները մեկը մյուսից անօրինական են. Փաստաբան