Ձեր վստահելի աղբյուրը

Կառավարությունը ծախսերը տնտեսելու նպատակով ծառայողական մեքենաների կրճատման ուղղությամբ քննարկում է երկու ճանապարհ: Այդ մասին այսօր ԱԺ-ում լրագրողների հետ ճեպազրույցում հայտարարեց կառավարության աշխատակազմի ղեկավար-նախարար Դավիթ Հարությունյանը:

Ներկայացնելով մոտեցումները՝ Հարությունյանը ասաց. «Մոտեցումներից մեկը կարող է լինել այն, որ տեղափոխենք այն պետական մարմիններ, որտեղ կա պակասորդ, օրինակի համար, որտեղ պետք է նոր մեքենա գնեին, մենք ասում ենք` եկեք գումարը տնտեսենք, ձեզ տանք օգտագործված մեքենա:

Երկրորդ տարբերակը հետևյալն է` ենթադրենք մի մարմնին մենք ֆինանսավորում ենք պայմանական` յոթ մեքենայի հաշվարկով, բայց պետական մարմնում առկա է ինը մեքենա: Կախված, թե այդ յոթ մեքենայի վիճակն ինչպիսին է, երբ են սպառելու իրենց ռեսուրսները, մենք կարող է որոշում կայացնենք երկու մեքենան կոնսերվացնենք, չօգտագործենք, ֆինանսական ծախսեր չանել դրա վրա, բայց երբ գոյություն ունեցող մեքենան շարքից դուրս գա, սպառելով իր ռեսուրսը, նոր մեքենա չգնենք եղածը տանք այդ մարմնին»:

Դիտարկմանը` բայց չէ՞ որ այդ մեքենաների համար գույքահարկ է վճարվում, Հարությունյանը նկատեց. «Այո, գույքահարկ վճարվում է: Դրա համար եմ ասում` դա որոշելիք հարց է: Մեքենան, որը դու վերցրել ես և մեկ կմ քշել ես, ապա դա շուկայում անհամեմատ էժան է»:

Հիշեցնենք` ավելի վաղ հայտարարվել էր, որ կառավարությունը մտադիր է 797 ծառայողական մեքենա կրճատել. բյուջեից  ուղղակի ֆինանսավորվող մեքենաների քանակը կրճատվում է 109-ով, իսկ առընթեր մարմիններին ենթակա ՊՈԱԿ-ներում, Փակ բաժնետիրական ընկերություններում և հիմնադրամներում կրճատվելու է 690 ավտոմեքենա:

Հարցին, թե դրամային արտահայտությամբ ինչքա՞ն խնայողություն է արվում, Դավիթ Հարությունյանը պատասխանեց, որ մեկ մեքենայի մեքենայի գույքահարկի, վառելիքի և այլ հարցերի վրա ծախսվում է 1,2 մլն դրամ:

«Դուրս գրված մեքենաները, որոնք պիտանի են վաճառքի վաճառվում են», -նկատեց պաշտոնյան:

Հարցին, ինչ ճանապարհով են վաճառվելու մեքենաները, հաշվի առնելով այն, որ երեկ ԱԺ պատգամավոր Նաիրա Զոհրաբյանը հայտարարել էր, որ մեքենաները վաճառելու հետ կապված գերատեսչություններում աժեոտաժ է սկսվել, կառավարության աշխատակազմի ղեկավար նախարարը պատասխանեց. «Եթե որոշենք մեքենաները վաճառել, ապա դա պետք է լինի դասական աճուրդ, ով ցանկություն ունի, կգնի»:

Անդրադառնալով Զոհրաբյանի հայտարարությանը, ասաց. «Այն մարդիկ, ովքեր լավ են ճանաչում իրենց մեքենայի դրական-բացասական կողմերը, ունեն արտոնյալ դիրք, որովհետև գիտեն իրենց մեքենան»:

Անդրադառնալով քննադատություններին, որ կառավարությունը ճոխ ծախսերի փոխարեն, կրճատում է պետական համակագի աշխատողներին ու շարքից դուրս եկած մեքենաները, Դավիթ Հարությունյանը ասաց.

«Եթե խոսքը գնում է պետական համակարգի ծախսերի մասին, մարդիկ, ովքեր օգտագործում են ուռճացված բառը, փոքր-ինչ մեղանչում են: Մեր պետական համակարգի վրա արվող ծախսը պետք է համեմատվի այլ երկրների ծախսի հետ, և դուք կտեսնեք, որ Հայաստանը ոչ թե ուռճացված է, այլ հակառակը՝ գտնվում է սանդղակի ամենաներքևում: Բայց մենք բավարարված չենք մեր համակարգով, որովհետև մենք կարծում ենք, որ մեր պետական համակարգը նոր խնդիրներ պետք է իր ուսերի վրա վերցնի՝ միաժամանակ չմեծացնելով պետական ապարատը»: