ՊՊԾ գնդի գործով փաստաբանները պահանջեցին իրենց պաշտպաններին բերել դատական նիստերի դահլիճ

Իրավունք 14:30 20/07/2017 Հայաստան

ՊՊԾ գնդի գործով փաստաբանները պահանջեցին իրենց պաշտպաններին բերել դատական նիստերի դահլիճ

Երևանի Ավան և Նոր Նորք վարչական շրջանների ընդհանուր իրավասության դատարանն այսօր շարունակում է ՊՊԾ գնդի գրավման գործով 18 անդամի դատավարությունը:

Պաշտպանական կողմը հանդես եկավ միջնորդությամբ՝ ապահովել ամբաստանյալների ներկայությունը նիստերի դահլիճում: Նշեցին, որ այդպես նաև հնարավոր կլինի շարունակել նիստերը:

«Գտնում ենք, որ մեր պաշտպանյալներին կարելի է բերել դատական նիստերի դահլիճ և շարունակել նիստերը: Կարծում եմ՝ արդարադատության շահից է բխում նրանց ներկայությունը դատական նիստերի դահլիճում ապահովելը»,- հավելեց հանրային պաշտպանը:

Նշենք, որ ամբաստանյալների նկատմամբ սանկցիա էր կիրառվել և հեռացվել էին նիստերի դահլիճից՝ դատարանի նկատմամբ անհարգալից վերաբերմունք դրսևորելու համար:

Դատավոր Արտուշ Գաբրիելյանը դիմելով փաստաբաններին՝ ասաց. «Միջնորդում եք, որ մինչև սանկցիայի լրանալը նրանց հրավիրել նիստերի դահլիճ: Գիտեք՝ ինչու են հեռացվել: Հիմա միջնորդում եք, որ վերականգնենք: Դուք երբևէ խոսե՞լ եք նրանց հետ, որ եթե միջնորդեք, պետք է հարգալից վերաբերմունք դրսևորեն: Բացատրե՞լ եք օրենքը»:

Փաստաբաններից մեկն ասաց, որ իրավունք չունեն դաստիարակչական, դասախոսական աշխատանք կատարել:

Դատավոր Արտուշ Գաբրիելյանը հեռացավ խորհդակցական սենյակ՝ միջնորդության վերաբերյալ որոշում կայացնելու: Վերադառնալուց հետո հայտարարեց, որ բավարարվել է փաստաբանների միջնորդությունը՝ ամբաստանյալների ներկայությունը դատական նիստին ապահովելու մասին:
Դատական նիստն ընդմիջվել է ամբաստանյալների ներկայությունն ապահովելու համար:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: