Ձեր վստահելի աղբյուրը

ՀՀ քիք-բոքսինգի ազգային ֆեդերացիայի մարզիկ, ԱՊՀ, Եվրոպայի, աշխարհի ոսկե մեդալակիր, գավաթակիր 26-ամյա Վարաժ Մանուկյանը այսօր Ավան և Նոր Նորք վարչական շրջանների ընդհանուր իրավասության դատարանի դատավոր Դավիթ Հարությունյանի կայացրած դատավճռով դատապարտվել է 12 տարի ազատազրկման:

Վարաժ Մանուկյանի փաստաբան Լուսինե Մարտիրոսյանն ասաց, որ այդ դատավճիռը անակնկալ էր իր համար, քանի որ գործով ոչ մի ապացույց չի եղել և ոչինչ չի հիմնավորել Վարաժ Մանուկյանի մեղքը Դավիթ Օհանյանի սպանության մեջ:

Նկատենք, որ մեղադրող դատախազը դատարանին միջնորդել էր Վարաժ Մանուկյանին դատապարտել 15 տարվա ազատազրկման:

Panorama.am-ը ավելի վաղ անդրադարձել էր այս գործին. Նոր Նորքի 4-րդ զանգվածի բնակիչ Դավիթ Օհանյանի սպանությունը տեղի էր ունեցել դեռ 2011 թվականին: Այդ սպանության համար, որը կատարվել էր երեկոյան ժամերին մի քանի տասնյակ մարդու ներկայությամբ, միակ մեղադրյալը ՀՀ քիք-բոքսինգի ազգային ֆեդերացիայի մարզիկ, ԱՊՀ, Եվրոպայի, աշխարհի ոսկե մեդալակիր, գավաթակիր Վարաժ Մանուկյանն է: Հատկանշական է, որ այս գործով վկաներ գրեթե չկային, մինչդեռ սպանության ժամանակ, ինչպես «4-րդ Մասիվի» բնակիչներն էին ասում, 3 տասնյակից ավել մարդ է եղել դեպքի վայրում: Վեճը թաղի տղաների միջև ծագել էր աղջկա համար:

Օհանյանի հետ միասին դեպքի վայրում տուժել էր նույն թաղամասի բնակիչ Հակոբ Բուդաղյանը: Գործի նախաքննությունն իրականացրած ոստիկանության Նոր Նորքի բաժնում քննիչների ճնշման արդյունքում Վարաժը ինքնախոստովանական ցուցմունք է տվել և ասել է, որ իբրև դեպքի օրը ինքն է դանակով հարվածել Դավիթ Օհանյանին, իսկ Հակոբ Բուդաղյանին միգուցե դանակը թափահարելու ընթացքում կպել է: Վարաժ Մանուկյանին մեղադրանք էր առաջադրվել ՀՀ քր.օր. 34-104-րդ հոդվածի 2-րդ մասի 1-ին կետի (սպանության փորձ), 104-րդ հոդվածի 1-ին մասի (սպանություն), 118-րդ հոդվածի (ծեծ) հատկանիշներով:

Ի դեպ, Ավան և Նոր Նորք վարչական շրջանների ընդհանուր իրավասության դատարանը Վարաժ Մանուկյանին արդարացրել է ՀՀ Քրեական օրենսգրքի 118-րդ հոդվածի (ծեծ) հատկանիշներով առաջադրված մեղադրանքում:

Փաստաբանը Panorama.am-ին տեղեկացրեց, որ վաղը կհանդիպի իր պաշտպանյալի հետ և կքննարկեն դատավճիռը բողոքարկելու հարցը: «Հաստատ պետք է բողոքարկեմ, որովհետև իմ պաշտպանյալը չի ընդունում իրեն մեղասգրվող արարքը», -հավելեց Լուսինե Մարտիրոսյանը:

Այս գործի վերաբերյալ մեր նախորդ հրապարակումները`
 
«Նորքի 4-րդ զանգվածը գիտի, որ սպանողը Վարաժը չէ». քիք-բոքսինգի աշխարհի չեմպիոնի գործով դատական նիստն ավարտվում է

ԲՀԿ-ականի որդին անձեռնմխելի՞. Քիք-բոքսինգի աշխարհի չեմպիոնի գործով վկաները հրաժարվել են վկայություն տալուց