Ձեր վստահելի աղբյուրը

Բելգիայի իրավապահ մարմինները հայտնաբերել են հայ-բելգիական հանցավոր կազմակերպություն, որի անդամները մի քանի տարի շարունակ պրոֆեսիոնալ թենիսիստների հետ պայմանավորված խաղեր են կազմակերպել: Բռնագրավվել են բջջային հեռախոսներ, համակարգիչներ, դրամական միջոցներ:

«Europol»  ոստիկանական գործակալության փոխանցմամբ, Բելգիայի 12 վայրերում տեղակայված 21 տներում իրականացրած խուզարկությունների հետևանքով 13 կասկածյալ է ձերբակալված:  Քննության ընթացքում Բելգիայի իրավապահ մարմինները համագործակցել են  բուլղարացի, գերմանացի, հոլանդացի, սլովակ, ամերիկացի քննիչների հետ՝  ԱՄՆ հետաքննությունների դաշնային բյուրոյի աջակցությամբ:

Հավաքած փաստերն ու տեղեկությունները վերլուծելով, Բելգիայի ոստիկանությունը հայտարարել է, որ գործ ունեն սպորտային կոռուպցիայի հետ:

Քննության արդյունքները ցույց են տվել, որ հայ-բելգիական հանցավոր խմբի անդամները  տարբեր երկրներում, ինչպես Եվրոպայի տարածքում, այնպես էլ դրանից դուրս, կազմակերպել են խաղեր՝ նախապես պայմանավորված լինելով թենիսիստների հետ, խաղադրույքներ են կատարել ու  մեծ գումարներ են ձեռք գցել բուքմեյքերական ընկերություններից: Թիմի անդամներից յուրաքանչյուրն ունեցել է հստակ հանձնարարություն,  ընդ որում կարողացել են անանուն կերպով հսկա գումարներ տեղափոխել արտասահման:

Քննությունը սկսվել է 2015-ից, երբ մարզական մի քանի հիմնարկություններից ստացել են տեղեկություններ այն  մասին, որ Բելգիայում ապրող հայերը կարող են խաղային հանցավոր սխեմայի մաս լինել: Կասկածյալները հիմնականում ոչ եկամուտ են ունեցել, ոչ աշխատանք:
Ունենալով հստակ ցուցումները՝  նրանք հանցավոր խմբի անդամների կողմից վերցրած գումարներով՝ 5-15 հազար դոլարի չափով խաղադրույքներ են կատարել այլ երկրներում անցկացվող խաղերի վրա: Այս մրցաշարերը սովորաբար չեն նկարահանվել, ինչը հեշտացրել է հանցագործների աշխատանքը:

Հանցավոր ցանցի անդամներին մեղադրանք է առաջադրվել կոռուպցիայի, փողերի լվացման, հանցավոր կազմակերպության գործունեությանն անդամակցելու հատկանիշներով: